KEʼYINK qeye xjal nchi tzeʼn tiʼj qʼa lu. ¿Nel tnikʼe alkye kuʼxin lu? Atzun Jeremíasjo, jun tsanjel Dios nim toklen.

Tej otaqxi che bʼaj tbʼuchen Josías qejo sant tuj tnam, tzaj tqʼamaʼn Jehová te Jeremías tuʼn tok te tsanjel. Naqtzun tuʼnj kubʼ t-ximin Jeremías qa tzma qʼaxtoq tuʼn tok te tsanjel Jehová. Atzunte Jehová tzaj tmaʼn qa tzulteq tqʼoʼn onbʼil te.

Xi tqʼamaʼn Jeremías kye aj Israel tuʼn miʼ tkubʼ kybʼinchentl mya bʼaʼn, ax ikx xi tmaʼn kye qa aqejo dios nok kykʼulen txqantl tnam nya axtok diosqeʼ. Mas kyajbʼiltaq aj Israel tuʼn kynimen kye qeju sant, ex nya te Jehová ajo axix Dios. Tej t-xi tqʼamaʼn Jeremías qa kbʼel tqʼoʼn Dios kykastiw tuʼnju mya bʼaʼn in kubʼ kybʼinchan, noq i jaw tzeʼn xjal tiʼj Jeremías.

Tej tbʼet ambʼil, kyim Josías. Tikʼtzuntl oxe xjaw ok Jehoiaquim ajo tkyʼajal te ajkawil. Kukx xi tqʼamaʼn Jeremías kye xjal kyjalu: ‹Kbʼel xitin Jerusalén qa mitiʼ xkubʼ kychʼixpun kyibʼe›. Tzyet Jeremías kyuʼn qe pal ex e jaw ẍchʼin kyjaʼ: ‹Iltiʼj tuʼn tkyim Jeremías, quʼn ma yole mya bʼaʼn yol tiʼj qtnam›.

¿Tiʼ bʼent tuʼn Jeremías? ¡Mitiʼ tzaj xobʼ! Xi tqʼmaʼn kye kykyaqil xjal kyjalu: ‹Ate qMan saj samante weye tuʼn t-xi nqʼamaʼne jlu kyeye. Qa mixtiʼ xkubʼ kychʼixpon kymode, ok kbʼel t-xiten Dios Jerusalén. Qatzen ma chin kubʼ kybʼiyoʼne, tzʼelx kynikʼe tiʼj, kbʼel kybʼiyoʼne jun xjal mitiʼ til›.

Aqejo nejenel te tnam mitiʼ xi kyqʼoʼn ambʼil tuʼn tkubʼ bʼiyoʼn Jeremías, atzun kye aj Israel kukxtaq nchi bʼinchen tiʼj mya bʼaʼn. Yajxitl, ul Nabucodonosor aju ajkawel te Babilonia, ex ok ten qʼojel tiʼj Jerusalén. Kubʼ tiʼj tnam tuʼn ex e ok tqʼoʼn Nabucodonosor qe aj Israel te tmajen. Nim kybʼet xjal ex tiʼn tuj Babilonia. ¿Tzeʼntzula jaku tzʼela toj twitza naqwit ikjo sikʼ tiʼje?