MA TZIKʼ mas chʼintl twitz 10 abʼqʼi kyxilen tiʼn Nabucodonosor aqeju aj Israel mas xnaqʼtzaʼnqe. ¡Kaʼyinka jaʼlo ajo nbʼaj! Lu Jerusalén ma tzʼok qʼoʼn tqʼaqʼal, aqetzenju aj Israel mitiʼ ẍi kyim luqe nchex qʼiʼn tuj Babilonia.

Naʼntza, kyaj kyqʼamaʼn tsanjel Dios tuʼn tikʼ jlu qa kukxteq xkubʼ kybʼinchen aj Israel aju mya bʼaʼn. Atzun kye aj Israel mitiʼ xi kybʼiʼn aju tzaj kyqʼamaʼn tsanjel Dios kye. Kukx e kʼulin kywitz nya axtok dios ex nya twitz Jehová. Kyajtaq tuʼn ttzaj kastiw kyibʼaj. Nel qnikʼ tiʼj jlu tuʼnju ntzaj tqʼamaʼn Ezequiel aju tsanjel Dios tiʼjju mya bʼaʼn nkubʼtaq kybʼinchan aj Israel.

¿Ojtzqilaʼn Ezequiel tuʼna? Atzun jun qʼaju kyxol qejo ex tiʼn Nabucodonosor atz Babilonia tej atxtoq mas te 10 abʼqʼi tuʼn ttzajteq xitbʼil lu tibʼaj Jerusalén. Junx xi qʼiʼn tukʼe Daniel, Sadrac, Mesac ex Abednego toj Babilonia.

Tej atztoq taʼ Ezequiel tuj Babilonia tzaj tyekʼe Jehová te, tkyaqilju mya bʼaʼn nbʼajteq toj tja atz Jerusalén. Bʼent jlu naq tuʼn tipumal Jehová. Axtok atztoq taʼ Ezequiel tuj Babilonia, pero tzaj tqʼoʼn Jehová ambʼil te tuʼn tok tkeʼyin tkyaqilju nbʼajtoq toj tja. ¡Mya bʼaʼnjo ok tkiʼn!

‹Kaʼyinka nim mya bʼaʼn nkubʼ kybʼinchaʼn xjal tzalu tuj njaye›, chi Jehová te Ezequiel. ‹Keʼyinka aju twitz ja te nabʼil Dios tok nim tilbʼilal kan, moqa lobʼaj, twitz ex kyilbʼilal (kywutzbʼiyil) txqantl txkup. ¡Kiʼnk qeye aj Israel nche kʼulin kywitz! Tkyaqil jlu til, mo tlom, Ezequiel ex kubʼ ttzʼibʼin aju nbʼajtaq.

Tzaj tqanin Jehová te Ezequiel kyjalu: ‹¿Ntila aju nbʼent kyuʼn qe nejenel kye aj Israel toj ewaj?›. Ikjo, tli Ezequiel tkyaqil jlu. Atteq 70 xinaq nchi nimen kywitz qe nya ax dios. Ex in kyqʼamaʼntoq kyjalu: ‹Mintiʼ in qo til Jehová, ex ma kyaj tkolin qtanmi›.

Xitzun tyekʼen Jehová qe xuʼj (qya) ateʼkutaq ttzi jun tpwertil ja te nabʼil Dios. Qʼuqleqeʼteq in che kʼulentoq tejo nya ax dios Tamuz. Ex xi tkaʼyin Ezequiel aqeju xjal ateʼkutaq ttzi tja Jehová, atteq chʼixme 25 kybʼet. ¡In che nimentoq te Qʼij!

‹Mixtiʼ nchinx kynimene xjal lu›, chi Jehová. ‹¡Nya oʼkx nkubʼ kybʼinchen aju mya bʼaʼn, axpe ikx nche ul bʼinchal teju mya bʼaʼn tuj njaye!› Tuʼntzunju tzaj tqʼamaʼn Jehová jlu: ‹Tzul nqʼoje kyiʼj. Ex mlay tzaj qʼaqʼan nkʼuʼje kyiʼj aj kykubʼ najsaʼn›.

Tzmateqlo nikʼ oxe abʼqʼi ttzajlen tyekʼin Jehová jlu te Ezequiel, mitiʼtl okx kybʼiʼn aj Israel aju ajkawil Nabucodonosor. Kyjuʼtzun tzaj Nabucodonosor qʼojil kyiʼj. Tej tikʼ jun abʼqʼi tukʼe mij mo nikʼjan, okx kyxoptzʼiʼn aj Babilonia tmuro Jerusalén ex kubʼ kypatin (kytzʼeysaʼn, kypoqen) tkyaqil tnam. Chʼixme kykyaqil xjal e kyim moqa ex qʼiʼn toj Babilonia.

¿Tiquʼn xi tqʼoʼn Jehová ambʼil tuʼn ttzaj xitbʼel kyibʼaj aj Israel? Tuʼnjo mitiʼ xi kybʼiʼn tkawbʼil Jehová. A jlu ntzaj tyekʼe qe qa iltiʼj tuʼn kyokx qbʼiʼn qeju tkawbʼil Dios.

Tnejilku kyaj qʼoʼn ambʼil te jun tal kʼloj xjal tuʼn kykyaj ten atz Jerusalén. Kyaj tqʼoʼn Nabucodonosor jun aj Israel aju Guedalías tbʼi tuʼn kyok t-xqʼuqin qejo xjal lu. Kubʼ kybʼiyoʼn aj Israel Guedalías. E tzaj xobʼ qe xjal tuʼnju xi kyximin qa che kbʼel bʼiyoʼntaq kykyaqil kyuʼn aj Babilonia tuʼnjo otaq bʼent kyuʼn. Tuʼntzunju xi kyjukʼuʼn Jeremías tuʼn t-xiʼ kyukʼe ex i kubʼ oq tuj Egipto.

Tuʼn jlu mitiʼx jun xjal kyaj ten toj txʼotxʼ te Israel. 70 abʼqʼi ten tnam mitiʼ xjal tuj. Atzunte Jehová tzaj ttziyen qa chi meltzʼajeltoq juntl maj aj Israel tuʼn, ojxi tikʼ 70 abʼqʼi. Atzun jaʼle, ¿tiʼ tzaj tiʼj ttnam Dios tuj Babilonia? Qo xnaqʼtzal tiʼj.