¿TIʼ O tbʼixiye kyiʼj qejo oxe kuʼxin lu? Ikjo, aqeju tamiw Daniel aʼyejo mitiʼ xi kywaʼn wabʼj aju mya bʼaʼn tuʼn t-xi kywan. Otaq tzʼok kyqʼoʼn aj Babilonia kybʼi te Sadrac, Mesac ex Abednego. Keʼyinka jaʼlin. ¿Tiquʼn mitiʼ nchi kubʼ mejeʼ twitzju sant nimxix twaʼlil ik tzeʼnj nbʼent kyuʼn qeju txqantl xjal? Qo xnaqʼtzal tiʼj.

¿Naʼnx tuʼna aqeju kawbʼil e kubʼ ttzʼibʼin Jehová, aju lajaj kawbʼil kybʼi? Atzun tnejil jlu: «Miʼn che kʼulune kywitz junxitl dios, oʼkx nwitze tuʼn kykʼulune». Atzen jlu nkubʼ kybʼinchaʼn kuʼxin, maske kwest tuʼn tbʼent jlu kyuʼn.

E tzaj ttxkoʼn Nabucodonosor, aju ajkawil te Babilonia, nimxix xjal tuʼn kynimen twitz sant lu ajo jaw tbʼinchaʼn. Ex xi tqʼamaʼn kye xjal kyjalu: ‹Ok t-xi kybʼiʼne aj tqʼajt chun, qe arpa ex mastl chnabʼ, bʼaʼn tuʼn kykubʼ ẍmejeʼye ex tuʼn kykʼulune twitz tilbʼilal qʼan pwaq ttxʼotxʼil ex qa at jun xjal mintiʼ xkʼulen twitz tilbʼilal lu, jun rat naj kʼokex xoʼn tuj jorni aju nkʼant qʼaqʼ tuj›.

Tejtzun tok tbʼiʼn Nabucodonosor qa mitiʼ e kubʼ mejeʼ Sadrac, Mesac ex Abednego twitz sant, tzaj nim tqʼoj tuʼn jlu ex xi tmaʼn tuʼn kytzaj qʼiʼn Sadrac, Mesac ex Abednego twitz. Xi tqʼoʼn juntl maj ambʼil kye tuʼn kykubʼ mejeʼ twitz tilbʼilal. Atzun kye qʼa qʼuqliteq kykʼuʼj tiʼj Jehová, ex kyqʼama kyjalu: ‹Aju qeye qDios, aju nqo kʼulune te, jaku qo klete tuʼn, ex qatzun mlay qo klete tuʼn tzʼelx tnikʼe tiʼj mlayx qo kubʼ ẍmejeʼye twitz ju tilbʼilal qʼan pwaq ttxʼotxʼil, aju ma bʼaj tbʼinchaʼna›.

Tej tbʼinte Nabucodonosor aju yol lu tzaj mastl tqʼoj, nqakutoq taʼ jun horno, ex tqʼama jalu: ‹¡Kymeqʼtzaʼnkxe wuq maj jorni mas ik tzaʼn nejtaq!› Ex xi tmaʼntl kye qejo tsoldad mas nim kyipun, tuʼn kybʼaj kykʼaloʼn (xmoʼn) Sadrac, Mesac ex Abednego ex tuʼn kyokx xoʼn tuj horno aju nkʼant qʼaqʼ tuj. Tuʼnju in kʼant-xix qʼaqʼ tuj jorni, aju tqan qʼaqʼ pon kanun kyiʼj qe soldad nim kyipumal. ¿Tiʼtzun tzaj kyiʼj qeju kuʼxin e okx xoʼn toj qʼaqʼ?

Bʼiʼx naj tnabʼl Nabucodonosor tej tokx tkaʼyin tuj horno, ex xi tqanin: ‹¿Myapetzun oxe xjal kʼaloʼnqeʼ ẍe okx qxoʼn tuj qʼaqʼ?›

‹Ikju›, che chi tmajen tzaj kytzaqʼweʼn.

‹Pero ma wile, mo ma nlome, kyaje xjal pjuʼmajqeʼ in che bʼet tuj qʼaqʼ ex mintiʼ in che tzʼeʼy. Ex aju tkyajin xjal ik keʼyin ik tzaʼn jun dios›, chi ajkawil. Pontzun laqʼeʼ Nabucodonosor ttzi jorni aju nkʼant qʼaqʼ tuj ex tma: ‹¡Aya Sadrac tukʼix Mesac ex Abednego, aqeye tmajen Dios nimxix toklen! ¡Kyetze ex ku kytzaje tzalu!›

Tejtzun kyetz kuʼxun lu, bʼaj kykiʼn kykyaqil xjal mintiʼ chʼin otaq chi tzʼeʼy tuʼn qʼaqʼ. Atzunte Nabucodonosor tma: ‹¡Nimanxwit tbʼi kyDios Sadrac, Mesac ex Abednego! Ma tzaj tsamaʼn t-anjel ex ma che klet tuʼn, tuʼnju mintiʼ ẍi kubʼ mejeʼ twitz juntl dios naq oʼkx aju kye kyDios›.

A jlu jun tbʼanel techal tuʼn qajbʼen oʼkxix te Jehová.