Ul samaʼn anjel Gabriel tukʼe jun tbʼanel txin María tbʼi. Xi tqʼamaʼn te María qa tzulteq itzʼj jun tal aju kkawil te jumajx. Atz ul itzʼj Jesús aju tal María toj kyja aluʼmaj ex atz e ul junjun xqʼuqil ẍneʼl, mo rit, keʼyilte. Yajxitl, kubʼ nej jun cheʼw kywitz junjun xjal tzajniqeʼ jatumel njatza qʼij, tuʼntzun kypon jatumel taʼtoq Jesús. Ok kʼelel qnikʼ tiʼj alkye tzaj yekʼente cheʼw kye, ex tzeʼn klet Jesús tuj kyqʼobʼ qejo kyajtoq tuʼn tkubʼ kybʼiyoʼn.

Yajxitl kʼelel qnikʼ tiʼj Jesús, tej qʼiʼntaq 12 abʼqʼi tuʼn, nyolintaq kyukʼe xnaqʼtzal tiʼj ley toj tja Dios. Tej tikʼtl wajxaqlaj (18) abʼqʼi, kuʼx Jesús tuj aʼ tuʼn tjaw aʼ twiʼ (tbʼyan), tzyettzun tuʼn tpakbʼan ex tuʼn t-xnaqʼtzan tiʼj tKawbʼil Dios, aju taqʼen otaq tzaj tqʼon Dios tuʼn tul bʼinchelte twitz txʼotxʼ. E jaw tjyoʼn Jesús 12 xjal tuʼn kyonin tiʼj tuʼn tbʼent aqʼuntl lu, ex e ok tqʼoʼn te t-apóstol.

Bʼant nim tiʼchaq tbʼanel tuʼn Jesús naq tuʼn tipumal Jehová. Xi tqʼoʼn kywa nimxix xjal naq tukʼe jteʼ kiẍ ex noq tukʼil jteʼ pan. E qʼanet qe yabʼ tuʼn, axpe ikx e jaw itzʼje qe kyimni tuʼn. Yajxitl, kelel qnikʼ tiʼj tiʼchaq tzaj toj tanqʼibʼil Jesús tej chʼixtaq tkyim, ex tzeʼn tten kubʼ bʼiyoʼn. Chʼixmelo oxe abʼqʼi tukʼe mij (nikʼjan) pakbʼan Jesús. Ajo TWAQAQIN Kʼloj txʼolbʼabʼil lu, in xi tiʼn masle chʼintl twitz 34 abʼqʼi.