¿NEL tnikʼe alkyeju tal neʼ lu? Ikjo, a Jesús. Tzma sul itzʼj toj kyja aluʼmaj. Lu María nkubʼ tkuẍbʼaʼn Jesús jatumel nkubʼ qʼoʼn kywa chej ex txqantl txkup. ¿Tiquʼn tokx María tukʼe José toj kyja aluʼmj? ¿Atzpetzulo nchi ul itzʼj tal kʼwal tzalu?

Nya atz. ¿Tiquʼn at María tukʼe José tzalu? Tuʼnjo tzaj tqʼoʼn César Augusto, aju ajkawil te Roma, jun kawbʼil tuʼn kyxiʼ xjal toj kytnam atz jatumel e ule itzʼj ex tuʼn tkux kytzʼibʼin kybʼi toj jun uʼj. Atz ul itzʼj José tzalu toj Belén. Tejtzun kypon José tukʼe María mitiʼ kanet jun ja kyuʼn. Tuʼntzunju, atz e kyaja ten tuj kyja aluʼmaj. ¡Tujxtzun qʼij aju, ul itzʼj Jesús! Bʼaʼn taʼ te Jesús, ik tzeʼnj tkuʼx toj tilbʼilal.

¿Nchi tila qe xqʼuqil rit aqeju che ul keʼyil Jesús? Tej nchi xqʼuqintaq tiʼj kyẍneʼl toj kojbʼil te qonikʼan kubʼ qoptzʼaj spikʼen kyiʼjele. ¡Jun anjelteq jlu! Nim e tzaj xobʼ qejo xqʼuqil rit. Atzunte anjel xi tqʼamaʼn kye: ‹¡Miʼn che xobʼe! Quʼn kxel nmaʼne tbʼanel tqanil kyeye. Jaʼlo ma tzul itzʼji Cristo toj Belén aju qAjaw. ¡A kkolel tiʼj tnam! Ok kknetel tal neʼ kyuʼne bʼalqʼiʼnku tuj bʼuʼẍ, ex koẍl tuj kywabʼl aluʼmj›. Ex minabʼen kubʼ kyyekʼun kyibʼ txqantl anjel ex e ok ten nimsal tbʼi Dios. I extzun ojqelan (rinin) naj xqʼuqil ẍneʼl jyolte Jesús, ex kanet kyuʼn.

¿Nel tnikʼa tiquʼn nya ikteq Jesús ik tzeʼn qe xjal? ¿Ojtzqilaʼn tuʼna alkyexix Jesús? Naʼntza, toj tnejil txʼolbʼabʼil tkuʼx tuj uʼj lu, o qo yolin tiʼj tnejil tKʼwaʼl Dios. Aju aqʼunan tukʼe Jehová tuʼn tbʼaj bʼinchet kyaʼj ex Txʼotxʼ ex tkyaqil tiʼchaq. ¡Atzun Jesús jlu!

Ok tqʼoʼn Jehová tkʼwaʼl tuj talbʼil María. Chebʼele chʼiy neʼ toj tkʼuʼj María ik tzeʼnj nbʼant kyuʼn kykyaqil neʼẍ toj tkʼuʼj kynan. Atzunte neʼ lu tKʼwal Diostaq te. Ultzun itzʼj tal neʼẍ lu toj kyja aluʼmj atz Belén. ¿Nel tnikʼa tiquʼn e jaw tzalaj qe anjel tej t-xi kymaʼn kye xjal qa otaq tzul itzʼj Jesús?