TEJ kyetz Jesús kyukʼe t-apóstol toj ninja, i eʼx toj jun tembʼil Getsemaní tbʼi. Otaqxi chi ul nim maj tuj tembʼil lu. Xi tqʼamaʼn Jesús kye t-xnaqʼtzbʼen tuʼn miʼn kyikʼ jtan ex tuʼn kynaʼn Dios, eltzun laqʼe Jesús kyiʼj ex kubʼ mutzeʼ naʼl Dios.

Yajxitl, ul meltzʼaj Jesús jatumel ateʼtoq t-apóstol. ¿Tiʼteqtzulo nbʼaj kye? ¡Nchi wtantaq! Oxe maj xi tqʼamaʼn Jesús kye tuʼn miʼn kyikʼ jtan, mitiʼ bʼant jlu kyuʼn; quʼn tej nmeltzʼajteq Jesús kyukʼe nchi jtantoq. ‹¿Tiquʼn in che tane toj jun ambʼil ik tzeʼn jlu?›, chi Jesús kye tej tmeltzʼaj toj toxin maj. Ex tqʼamatl: ‹Lu ma pon or tuʼn nxi qʼoʼne tuj kyqʼabʼ ajqʼoj›.

Tojx ambʼil aju kybʼi tqʼajqʼojel kywiʼ txqan xjal. ¡E pon txqan xjal iqʼin kyespada ex kytzeʼ! Ax ikx iqʼen kytzaj tuʼn tzpikʼumax tuj kybʼe tuʼn. Tej kypon laqʼeʼ, etz jun xjal kyxol ex pon tukʼe Jesús. El ttzʼubʼen (tmaʼtzin) twitz Jesús ik tzaʼn tkuʼx toj tilbʼilal. ¡Aju xjal lu atzun Judas Iscarioteju! ¿Tiquʼn el ttzʼubʼan Judas Jesús?

Xi tqʼmaʼn Jesús te Judas: ‹¿Maj noq tuʼnju nneʼl ttzʼubʼana nwitze in nchinx tqʼoʼna tuj kyqʼobʼ xjal?› Ikju, a jlu naq jun techaljo. Bʼant jlu tuʼn naq tuʼn tel kynikʼ xjal alkye Jesús aju nchi jyontaq tiʼj. Tuʼntzunju, ex laqʼe qe ajqʼoj tuʼn ttzyet Jesús kyuʼn. Atzunte Pedro mitiʼ xi tqʼoʼn ambʼil tuʼn t-xi qʼiʼn Jesús. Jatz tiʼn espada ex ok ttxʼemin jun xjal toktaq ttxlaj. Bʼiʼx el t-ẍkyin xjal tuʼn. Atzunte Jesús ok tmakoʼn t-ẍkyin xjal ex qʼanet tuʼn.

Xi tmaʼn Jesús te Pedro: ‹Qʼonkuxa espada toj tjayil. ¿Mintiʼpe bʼiʼn tuʼna qa jaku txi nqanine te nmane tuʼn ttzaj t-samaʼn nimxix anjel tuʼn nklete kyuʼn?› ¡Jakuteq bʼant jlu tuʼn Jesús! Pero mitiʼ xi tqanin Jesús te Dios tuʼn kytzaj t-samaʼn anjel, quʼn ojtzqiʼntaq tuʼn qa otaq pon ambʼil tuʼn t-xi qʼiʼn kyuʼn qe ajqʼoj. Xi tqʼoʼn ambʼil tuʼn tbʼaj jlu. Qo xnaqʼtzal tiʼj tiʼ tzaj tiʼj Jesús.