LU Jesús chleʼn tal kʼwaʼl tuʼn. Kʼujlaʼn qe tal kʼwal tuʼn. Aqejo xjal nchi kaʼyinx aʼyetzun t-apóstolju. ¿O tbʼiya tiʼ xi tqʼamaʼn Jesús kye?

Tzma ẍi ul meltzʼaj Jesús kyukʼe t-xnaqʼtzbʼen toj jun kybʼe nimxix tqan. E jaw kyaqpaj qe t-apóstol toj bʼe. Tuʼntzunju, tej kyul meltzʼaj xi tqanen Jesús kye: ‹¿Alkye yol in che yoline tiʼj kyxolxe tuj bʼe?› Ojtzqiʼntaq tuʼn Jesús alqiʼj nchi yolintoq. Xitzun tqanin kye tuʼn tel tnikʼ qa jakuteq tzaj kyqʼmaʼn alqiʼj nchi yolintaq.

Mitiʼ xi kytzaqʼweʼn apóstol, tuʼnju oteq chi yolin tiʼj alkye mas at toklen kyxol. Kyajtoq junjun tuʼn tten nim kyoklen kywitz txqantl. ¿Tzeʼntzulo tten xi tqʼamaʼn Jesús qa mya bʼaʼnteqju nkubʼ kyximin?

Tzaj ttxkoʼn Jesús jun kʼwaʼl, ex kubʼ tqʼoʼn kywitz. Xitzen tqʼmaʼn kye t-xnaqʼtzbʼen: ‹Wajbʼile tuʼn tel kynikʼe tiʼj jlu: Oʼkx qa ma kubʼ kychʼixpuʼn kyxime ex qa ma chi oke ik tzeʼn qe tal kʼwal, ok chi okexe tuj tkawbʼil Dios. Aju xjal mas at toklen toj tkawbʼil Dios aju nok tqʼoʼn tibʼ ik tzaʼn tal kʼwaʼl lu›. ¿Nel tnikʼa tiquʼn xi tqʼamaʼn Jesús jlu?

Aqeju tal kʼwal mitiʼ nchi ximin tuʼn tten nim kyoklen kywitz txqantl. Kyjuʼtzun iltaq tiʼj tuʼn kyok t-xnaqʼtzbʼen Jesús ik tzeʼn qe tal kʼwal ex tuʼn miʼn kyqʼojin tiʼj alkye kokel te nim toklen kyxol.

Ax ikx kubʼ tyekʼin Jesús toj junjuntl maj qa kʼujlaʼnqe tal kʼwal tuʼn. Tej tikʼ jteʼtl xjaw e ul kyiʼn xjal kykʼwaʼl tukʼe Jesús. Mitiʼ xi kyqʼoʼn apóstol ambʼil kye. Xitzun tmaʼn Jesús kye: ‹Kyqʼonxe ambʼil kye tal kʼwal tuʼn kytzaj wukʼile ex miʼn chex kymayoʼne, quʼn aju tkawbʼil Dios kxel qʼet kye qeju xjal ik kyten ik tzaʼn qe tal kʼwaʼl lu›. E jawtzun tchleʼn Jesús qe tal kʼwal, ex e kubʼ tkʼiwlaʼn. ¡Tbʼanelxix aj tel qnikʼ qa kʼujlaʼn qe tal kʼwaʼl tuʼn Jesús!