¡QʼONK twitza tiʼjjo nbʼaj tzalu! Lu Jesús nkubʼ bʼiyoʼn. Ma jaw qʼoʼn twitz jun tzeʼ. Ma tzʼokx pejkʼaʼn clav tuj tqʼabʼ ex tiʼj tqan. ¿Tiquʼntzulo kubʼ bʼinchaʼn jlu?

Tuʼnju attoq junjun xjal ikʼenteq twitz Jesús kyuʼn. ¿Ojtzqiʼn tuʼna alkye qejo xjal lu? Jun kyxol qe jlu aju mya bʼaʼn anjel Satanás aju tajaw il. A bʼinchante tuʼn miʼ tokx kybʼiʼn Adán tukʼe Eva Jehová. Ax ikx bʼent tuʼn Satanás tuʼn tkubʼ bʼiyoʼn Jesús kyuʼn qe ajqʼoj.

Tej naʼmxtoq tjaw qʼoʼn Jesús twitz tzeʼ, ok kybʼinche ajqʼoj nim mya bʼaʼn tiʼj. ¿Naʼnx tuʼna tej kypon ajqʼoj toj Getsemaní qʼilte Jesús? ¿Alkyeqeteq ajqʼoj lu? Aqeteq nejenel kye okslal. Qo xnaqʼtzal tiʼj tiʼ bʼaj yajxitl.

Tej t-xi qʼiʼn Jesús kyuʼn qe nejenel kye okslal, i el oq qe t-apóstol. E tzaj xobʼ ex kyaj kyqʼoʼn Jesús kyxol qe ajqʼoj. Atzunte Pedro tukʼe Juan najchaq (laqʼche) i ex lepeʼ tuʼn kylonte tiʼ kbʼajel tiʼj Jesús.

Xi qʼiʼn Jesús kyuʼn pal twitz jun tij xjal Anás tbʼi, aju otaqxi tzʼok te tnejel pale. Nya nim ambʼil e ten xjal tukʼe Anás. Xi qʼiʼntl Jesús tja Caifás aju tokteq te tnejel pal toj ambʼil aju. Attoq nim nejenel kye okslal atztzu.

E yolin tiʼ kbʼajel tiʼj Jesús atz tuj tja Caifás. Tzaj kyiʼn junjun xjal tuʼn kyyole nya ax yol tiʼj Jesús. Kykyaqil qe nejenel kye okslal kyqʼama: ‹Iltiʼj tuʼn tkubʼ bʼiyet Jesús›. Okxtzun kytzubʼan tuj twitz Jesús ex ok kytzʼajin.

Tej nbʼajtoq tkyaqil jlu, atteq Pedro twi peʼn. Kubʼ kyqʼoʼn xjal qʼaqʼ tuʼnjo attoq nim cheʼw te qonikʼen aju. Tej nchi qʼaẍnentaq tiʼj qʼaqʼ, ok kaʼyin Pedro tuʼn jun txin majen ex tqʼama: ‹Aju xjal lu ajuntoq tukʼe Jesús›.

‹¡Txin, mintiʼ ojtzqiʼn twitz xjal lu wuʼne!›, chi Pedro xi ttzaqʼweʼn.

Oxe maj xi kyqʼamaʼn xjal te Pedro qa ajunteq tukʼe Jesús. Atzente Pedro xi ttzaqʼweʼn qa mitiʼ. Tej t-xi tqʼamaʼn Pedro jlu toj toxin maj, ajtz meltzʼaj Jesús ex tzaj tkiʼn tuj twitz Pedro. Tzaj nim tbʼis Pedro tuʼnju otaq txi tmaʼn nya axtok yol, bʼiʼx el bʼet ex ok ten oqʼel.

Tej qsqix toj viernes, xi qʼiʼn Jesús kyuʼn pal atz jatumel nok kychmoʼnteq kyibʼ jun kʼloj xjal aju nok kybʼi te Sanedrín. Atz e yolen tiʼtoq kbʼantel kyuʼn tiʼj Jesús. Xi kyiʼn twitz Poncio Pilato aju ajkawil te Judea.

‹Mya bʼaʼn xjal te jlu ex iltiʼj tuʼn tkubʼ bʼiyet›, che chi te Pilato. Tej otaq bʼaj tqanin Pilato txqan t-xjel te Jesús, xi tmaʼn: ‹Ma tzʼel nnikʼe tiʼj mintiʼ jun til xjal lu›. Xitzun tsamaʼn Pilato Jesús tukʼe Herodes Antipas, aju ajkawil te Galilea, aju attoq tuj Jerusalén toj ambʼil aju. Ax ikx te Herodes mitiʼ kanet til Jesús tuʼn ex aj tsamaʼn juntl maj tukʼe Pilato.

Tajbʼilteq Pilato tuʼn t-xi ttzaqpiʼn Jesús. Aqetzun kye aj qʼoj tiʼj Jesús kyajteq tuʼn t-xi ttzaqpiʼn Pilato juntl xjal aju Barrabás tbʼi jun eleqʼtaq. Xi tqʼmaʼn Pilato kye xjal: ‹¡Lu kykawile lu!› E jawtzen ẍchʼin kynejel pal kyjalu: ‹¡Bʼiyonkuya!› ‹¡Bʼiyonkuya!› Etztzun tzoqpiʼn Barrabás, atzunte Jesús xi qʼiʼn tuʼn tkubʼ bʼiyoʼn.

Tej tikʼ tmij qʼij (wanqʼij) toj viernes jaw qʼoʼn Jesús twitz jun tzeʼ. Ax ikx e ok qʼoʼn kabʼe xjal aqejo bʼinchal mya bʼaʼn, ok qʼoʼn jun tuj jun ttxlaj ex juntl toj juntl ttxlaj, naqtzen tuʼnj nya qʼanchaʼlqe tuj tilbʼilal. Tej chʼixtaq tkyim Jesús, aju jun xjal toktaq ttxlaj Jesús xi tqʼamaʼn te kyjalu: ‹Wex chin ule tuj tkʼuʼja aj tkawina›. Atzunte Jesús xi tqʼamaʼn te: ‹Axtok kxel nmaʼne teya, ktela wukʼile tuj Tbʼanel Najbʼil te Tzalajbʼil›.

¡Tbʼanelxix aju tzaj ttziyen Jesús! ¿Ojtzqiʼn tuʼna alkye tbʼanel najbʼil yolin Jesús tiʼj? ¿Jatumel kubʼ tbʼinchaʼn Dios aju tnejel tbʼanel najbʼil? Ikju, atz tzalu twitz Txʼotxʼ. Ajtzun tkawin Jesús tuj kyaʼj, ok kjawil itzʼj juntl maj xjal lu tuʼn, tuʼntzun tanqʼin toj Tbʼanel Najbʼil te Tzalajbʼil tzalu twitz Txʼotxʼ. ¡Tbʼanelxix jlu! ¿Tzeʼn teya toj twitz?