MA KUBʼ ten Jesús ojlal ttziʼ jun xoch atz tuj Samaria. Ma cheʼx qe t-xnaqʼtzbʼen toj tnam loqʼel wabʼj. Aju xuʼj (qya) in yolin tukʼil Jesús ma tzul qʼil aʼ ttzi xoch. Xi tqʼamaʼn Jesús te: ‹Qʼontza chʼin nkʼaʼye aʼ›.

Bʼiʼx naj tnabʼl, moqa bʼiʼx etz twitz, (jaw labʼti) xuʼj tuʼn jlu. ¿Nel tnikʼe tiquʼn? Tuʼnjo Judiy te Jesús atzun te xuʼj te Samaria. Chʼixme kykyaqil aj Judiy ikʼen kywitz qeju aj Samaria kyuʼn. ¡Mitiʼ nchi yolen kyukʼil! Atzunte Jesús kʼujlaʼn qe kykyaqil xjal tuʼn. Xi tqʼamaʼn te xuʼj: ‹Noqwit ma tzʼel tnikʼa alkye nxi tqanin tkʼaʼ (tkʼwaʼ) aʼ teya, mawtlo tzaj tqanin tkʼaʼya te, ex mawtlo txi tqʼoʼn aʼ teya aju te chwinqlal›.

Atzunte xuʼj tma: ‹Tat, mintiʼ pulbʼil te qʼiʼn tuʼna tuʼn tjatz tiʼna aʼ, ex maʼ (nim) te jul t-xeʼ. ¿Jatumtzun taʼ ju aʼ tuʼna?›

‹Kykyaqil qeju in che kʼan tiʼj aʼ lu, ktzajel juntl maj kʼaj kyiʼj; atzunte aʼ kxel nqʼoʼne jaku tzʼanqʼin xjal tuʼn te jumajx›, chi Jesús.

‹Tat›, chi xuʼj te Jesús. ‹¡Qʼontza ju aʼ lu weye! Tuʼntzun miʼn ttzaj kʼaj wiʼje, ex tuʼn miʼn ntzaje juntl maj qʼil aʼ tzmax tzalu›.

Kubʼ t-ximan xuʼj qa in yolintaq Jesús tiʼj axixtok aʼ. Atzen te Jesús in yolenteq tiʼjju axix tiʼj qMan Dios ex tiʼjjo tkawbʼil, aju nok ik tzaʼn aʼ in xi qkʼaʼn tuʼn qanqʼin. Aju jaku tzaj tqʼoʼn chwinqil te jun majx.

Xi tmaʼn Jesús te xuʼj: ‹Txiʼya ex txkontza tchmila ex ku ttzaja tzalu›.

‹Mintiʼwe nchmil›, chi xuʼj.

‹Bʼaʼn ma tqʼmaya›, chi Jesús te. ‹Naqtzen tuʼnj o tenxi jweʼ tchmila, ex aju at tukʼila jaʼlo nya tchmila›.

Bʼiʼx etz twitz xuʼj tuʼnjo axtok tkyaqilju otaq tzaj tqʼamaʼn Jesús te. ¿Jatumel tzaja tojtzqibʼil Jesús tiʼj tkyaqil jlu? Ikjo, tuʼnju ateq Jesús Tziyemaj tuʼn Dios ex a Dios tzaj qʼamante jlu te. Bʼiʼx e jaw labʼti t-xnaqʼtzbʼen Jesús tej kymeltzʼaj tuʼnjo nyolintoq Jesús tukʼe jun xuʼj te Samaria.

¿Tiʼ ntzaj tyekʼin tkyaqil jlu qe? Qa tbʼanelxix te Jesús tukʼe tkyaqil kyyajil xjal. Iltiʼj tuʼn qok ik tzeʼn Jesús; mitiʼ tuʼn t-xi qximen qa mya bʼaʼn jun xjal noq tuʼnj junxitl tiyjil. Taj Jesús tuʼn tel kynikʼ kykyaqil xjal tiʼj axixtok aju jaku ten chwinqlal tuʼn te jun majx. Iltiʼj tuʼn qonin kyiʼj xjal tuʼn tel kynikʼ tiʼj axix.