KAʼYINXA anjel jaqoʼn ttzi ja tuʼn. In che etz ttzaqpiʼn qe t-apóstol Jesús. Qo xnaqʼtzan tiʼj tiquʼn ateʼkxtoq pres.

Naq chʼin ambʼil otaq tzikʼ atxix ttzajlen qʼoʼn xewbʼaj xjan kyibʼaj t-xnaqʼtzbʼen Jesús. Tuj jun qale, i eʼx Pedro tukʼe Juan toj ja te nabʼil Dios tuj Jerusalén. Attoq jun xjal ttziʼ ja aju koxteq taʼ atxix tej tul itzʼj. Tkyaqil qʼij nxitaq qʼiʼn kox kyuʼn xjal ttzi ja te nabʼil Dios, tuʼn t-xi tqanin pwaq kye qejo xjal nchi okx toj. Tej tpon Pedro ex Juan ttziʼ ja, xi tqanin pwaq kye. ¿Tiʼtzele bʼant kyuʼn?

E weʼ ex xi tqʼamaʼn Pedro te: ‹Mitiʼ we npwaq. Oʼkx aju at wukʼile kxel nqʼoʼne teya. Tuj tbʼi Jesús kxel nqʼamaʼne teya, ¡weʼktza ex ku tbʼeta!› Jawtzun ttzyuʼn Pedro tbʼanqʼabʼ kox ex jaw tʼikpaj kox ex ok ten bʼetil. Tuʼnjo tbʼanelxix bʼant tuʼn tipumal Dios ¡e jaw tzalaj xjal tiʼj!

‹Naq tuʼn tipumal Dios, aju jaw anqʼin Jesús tuʼn, ma bʼant jlu quʼne›, chi Pedro. Tej tzmatoq nchi yolin Pedro tukʼe Juan, e pon junjun nejenel kye okslal. Otaq tzaj kyqʼoj tuʼnju nxiteq kyqʼamaʼn Pedro tukʼe Juan qa otaq jaw anqʼin Jesús. Tzyettzun Pedro tukʼex Juan kyuʼn ex e okx kyqʼoʼn pres.

Tuj juntl qʼij ok kybʼuyin kyibʼ nejenel kye okslal. Tzaj kyiʼn Pedro ex Juan tukʼex kox aju otaq bʼanix ex e kubʼ kyqʼoʼn kyxol. Ex xi kyqanin kye: ‹¿Altzun kye saj qʼonte kyipumale tuʼn tbʼant jlu kyuʼne?›

Xi tqʼamaʼn Pedro qa tuʼn tipumal Dios, aju otaq jaw itzʼj Jesús tuʼn. Mitiʼteq nel kynikʼ pal tiʼteq kbʼantel kyuʼn, quʼn melaytaq bʼant tewit kyuʼn aju tbʼanel otaq bʼent tuʼn tipumal Dios. Tuʼntzun jlu, xi kyqʼmaʼn kye qa mitiʼtl tuʼn kyyolin tiʼj Jesús, i extzun kytzoqpiʼn.

Tej tbʼet ambʼil, kukx nchi pakbʼanteq t-xnaqʼtzbʼen Jesús ex kukxtoq in che kubʼ kyqʼanen yabʼ. El tqanil jlu toj junjuntl tnam. Kyjuʼtzun e ul nimxix xjal te junjuntl tnam aqeju ateʼktaq ttxlajele Jerusalén kyukʼe kyyabʼ tuʼn kykubʼ kyqʼanin apóstol. Tuʼntzunju, i el ikʼen, ex e okx jupuʼn qe apóstol kyuʼn qe nejenel kye okslal. Tej ateʼkxtoq pres bʼaj jun tiʼ.

Ul jun t-anjel Dios te qonikʼen ex jaqet ttziʼ carcel tuʼn, kywitz qe t-apóstol Jesús ik tzeʼnj tkuʼx tuj tilbʼilal. Xitzun tqʼamaʼn anjel kye: ‹Kyxiʼye ex che weʼkuye tuj tja Dios ex kukx chi yoline kyukʼe xjal›. Yajxitl, e kanet qe apóstol kyuʼn kynejel okslal tuj tja Dios, i extzen kyiʼn jatumel nok kychmon kyibʼ Sanedrín.

‹O txi qqʼamaʼne kyeye tuʼn miʼ kyyolintle tiʼj Jesús, mitiʼtzen nokx toj kywiʼye›, che chi kynejel okslal. ‹Atzun kyeye ma noj tuj Jerusalén kyuʼne tukʼe kyxnaqʼtzbʼile›. Xitzun kytzaqʼweʼn apóstol: ‹Tnejel ilxix tiʼj tuʼn t-xi qnimane Dios, ex mya qe xjal›. Ex kukx e pakbʼan qe apóstol. ¡Tbʼanelxix techal kyaj kyqʼoʼn!