¿NEL tnikʼa alkye xuʼj lu ex alkye qeju kabʼe xinaq, mo ichin? Aju xuʼj atzun María Magdalenajo. Aqetzunju xinaq tok kyxbʼalen saq anjelqeʼ. Nkaʼyinkx María toj jul aju kubʼ bʼinchaʼn jatumel okx qʼoʼn t-xmilal Jesús, ¡naqtzun tuʼnj mitiʼtl te Jesús t-ximlal tzalu! ¿Alkye ma txi qʼinte? Qo xnaqʼtzal tiʼj.

Tej otaq kyim Jesús, xi kyqʼamaʼn qe pal te Pilato kyjalu: ‹Tej itzʼxtoq Jesús tqʼama qa okteq kjawil anqʼin tuj oxe qʼij. Tuʼntzunju, qʼamanxa tuʼn tok xqʼuqin ttzi jul. ¡Tuʼntzun miʼ t-xi kyelqʼaʼn qe t-xnaqʼtzbʼen (tsanjil) t-xmilal ex tuʼn miʼn kyqʼma qa otaq jaw anqʼin Jesús!› Xitzen tqʼamaʼn Pilato kye tuʼn t-xi kysamaʼn qe soldad.

Tej chʼixtoq qsqix toj toxin qʼij tkyimlen Jesús, noq minabʼen (tzenx metzaqʼle) ul jun t-anjel Jehová ex el tiʼn abʼj aju toktaq ttziʼ jul. E jaw xobʼ qe soldad wen ex mitiʼtl e yukchi. ¡Tejtzun tokx kykeʼyin toj jul mitiʼtl te Jesús t-ximlal tokx! I eʼx junjun soldad yolil kyukʼe qe pal toj tnam. ¿Bʼiʼn tuʼna tiʼ bʼent kyuʼn qejo mya bʼaʼn pale? Xi kychjoʼn pal qe soldad tuʼn miʼ t-xi kyqʼamaʼn aju otaq bʼaj. Xi kymaʼn kye soldad tuʼn t-xi kyqʼamaʼn qa otaq chi ul t-xnaqʼtzbʼen Jesús qʼilte t-xmilal tej nchi jtantoq.

E pon junjun xuʼj aqeju lepchiqeʼktaq tiʼj Jesús ttzi jul. ¡Mitiʼtl knet t-xmilil Jesús kyuʼn! Naq minabʼen, kubʼ kyyekʼen kyibʼ kabʼe anjel nqoptzʼajteq kyiʼj ex xi kyqanin kye xuʼj: ‹¿Tiquʼn nchi jyone tiʼj Jesús tzalu?, ma jaw itzʼji te Jesús. Ku kyxiʼnaje ex kyqʼmanxe kye t-xnaqʼtzbʼen›. I eltzun ojqelan (rinin) qe xuʼj. Noqtzun aju e kubʼ maqoʼn tuʼn jun xjal tuj bʼe. ¡Atoq Jesús! Xi tqʼamaʼn Jesús kye: ‹Ku kyxiʼye ex kyqʼamanxe jlu kye nxnaqʼtzbʼene›.

Tej t-xi kyqʼamaʼn xuʼj qa oteq jaw itzʼj Jesús ex qa otaq kubʼ tyekʼin tibʼ kywitz, mitiʼxix ok qʼuqeʼ kykʼuʼj t-xnaqʼtzbʼen Jesús tiʼjju xi kymaʼn xuʼj kye. ¡I eltzun ojqelan Pedro ex Juan tuʼn kypon ttzi jul, naqtzen tuʼnj mitiʼtl te jul toj! Tej kyikʼ bʼet, atx kyaj ten María Magdalena ttziʼ jul. Tujtzun ambʼil aju, okx tkiʼn María Magdalena ex e til, mo e tlom, kabʼe anjel.

¿O tbʼiye tiʼ bʼaj tukʼe t-xmilil Jesús? Kubʼ tnajsaʼn Jehová. Mitiʼ jaw anqʼin Jesús tuʼn Dios tukʼe t-xmilal ik tzeʼnj attoq tnejil. Xi tqʼoʼn Dios jun akʼaj t-ximlal Jesús, ik seʼn kye anjel. Naqtzun tuʼnj kubʼ tyekʼin tibʼ Jesús tukʼe jun t-xmilal naq tuʼn tqʼanchaʼlix tuj kywitz t-xnaqʼtzbʼen qa otaq jaw anqʼin.