TEJ kyikʼ bʼet Pedro ex Juan ttzi jul atz jatumel okx qʼoʼn Jesús, tjunalxtl María Magdalena kyaj ten. Ok ten oqʼil. ¡Tejtzun tokx tkaʼyin María Magdalena toj jul ateʼkxtaq kabʼe anjel! Tzaj kyqanin anjel te: ‹¿Tiquʼn in noqʼa?›

Xi ttzaqʼweʼn María Magdalena kyjalu: ‹Nchin oqʼe quʼn ma tzikʼ qʼiʼn t-ximlal wajawe, ex mintiʼ bʼiʼn wuʼne jatum ma kubʼ qʼoʼn›. Tejtzun tbʼaj tqʼamaʼn María jlu, ajtz meltzʼaj twitz ex til jun xjal. Xi tqanin xjal te: ‹¿Alkye in jyona tiʼj?›

Kubʼ t-ximin María qa jun xqʼuqil awaltoq te xjal lu, ex qa otaqle txi tiʼn t-xmilil Jesús. Tuʼntzunju, xi tqʼamaʼn te: ‹Qa aya ma txi qʼinte t-ximlal Jesús, qʼmantza jatum ma pon tqʼoʼna›. Aju xjal lu ateq Jesúsjo. Mitiʼ el tnikʼ María tiʼj tuʼnjo junxitoqtl t-xmilal. Tejtzen t-xi tqʼmaʼn Jesús tbʼi María, el tnikʼ tiʼj qa ateq Jesús. Xiʼ naj qʼamalte kye txqantl t-xnaqʼtzbʼen Jesús qa oteq kubʼ tyekʼe tibʼ Jesús twitz.

Tujxju qʼij lu, tej kyxiʼ kabʼe t-xnaqʼtzbʼen Jesús toj jun kojbʼil Emaús tbʼi, pon laqʼe jun xjal kytxlaj ex xi bʼet junx kyukʼil. Nchi bʼisintoq t-xnaqʼtzbʼen Jesús tuʼnju otaq kyim. Tejtzun nchi bʼetteq, ok ten xjal lu chikʼbʼal nim tiʼchaq tiʼj Tyol Dios kye, tbʼanel kynaʼ tuʼn jlu. Yajxitl, tej kykubʼ ten waʼl el kynikʼ qeju kabʼe t-xnaqʼtzbʼen qa ateq Jesús jlu. Kubʼ naj Jesús kywitz, ex i meltzʼajtl tuj Jerusalén tuʼn t-xi kyqʼamaʼn jlu kye t-apóstol Jesús.

Tej tzmatoq nbʼaj jlu, ax ikx kubʼ tyekʼin tibʼ Jesús twitz Pedro. Tej tok kybʼiʼn txqantl t-xnaqʼtzbʼen Jesús jlu e jaw tzalaj. Aqetzun kabʼetl i anj meltzʼaj tuj Jerusalén e pon kyukʼe qe apóstol ex xi kyqʼmaʼn qa oteq kubʼ tyekʼin tibʼ Jesús kywitz tuj bʼe. Tej nxiteq kyqʼamaʼn jlu ikʼ jun tiʼ tbʼanelxix, ¿o tbʼiya tiʼ jlu?

Kinkuxe tuj tilbʼilal. Kubʼ tyekʼin tibʼ Jesús kyxol, ex jupuʼnteqtzun ja kywitz. ¡Nim e jaw tzalaj qe t-xnaqʼtzbʼen! ¡Tbʼanelxix qʼij jlu! ¿Jaku bʼent tajlet tuʼna jteʼ maj kubʼ tyekʼin tibʼ Jesús? ¿Jweʼpetzulo maj?

Aju apóstol Tomás nya atteq tej tkubʼ tyekʼin tibʼ Jesús kywitz qeju txqantl t-xnaqʼtzbʼen. Kyjuʼtzun xi kyqʼamaʼn qeju txqantl t-xnaqʼtzbʼen Jesús te: ‹¡Ma qile Jesús!› Atzunte Tomás xi tqʼmaʼn: ‹Tzmaxi qa ma nlome, moqa ma wile, ok kʼokel qʼuqeʼ nkʼuʼje tiʼj kyyole›. Tej tikʼ wajxaqtl qʼij ateʼtoq juntl maj t-xnaqʼtzbʼen Jesús toj jun ja aju lamoʼnteq kywitz, toj qʼij lu attoq Tomás kyxol. Naq minabʼen kubʼ tyekʼin tibʼ Jesús kywitz. Tzmaxitzen ok qʼuqeʼ tkʼuʼj Tomás tiʼj jlu.