TEJ tbʼet ambʼil, kubʼ tyekʼin tibʼ Jesús nim maj kywitz t-xnaqʼtzbʼen. Jun maj, kubʼ tyekʼe tibʼ kywitz 500 t-xnaqʼtzbʼen. Tej tkubʼ tyekʼin tibʼ kywitz, ¿bʼiʼn tuʼne alqiʼj yolen Jesús kyukʼe t-xnaqʼtzbʼen? Tiʼj tkawbʼil qMan Dios. Tzaj tsamaʼn Jehová Jesús twitz Txʼotxʼ tuʼn kykubʼ t-xnaqʼtzaʼn xjal tiʼj tKawbʼil. Kukx bʼent jlu tuʼn Jesús tej tjaw anqʼin kyxol kyimni.

¿Naʼnx tuʼne tiʼ ajo tkawbʼil Dios? Jun axix tkawbʼil Dios jlu aju atz taʼ tuj kyaʼj, a Jesús o jaw tJyoʼn Dios tuʼn tkawin toj tkawbʼil. Ik tzaʼnj o qo xnaqʼtzan tiʼj, ¡o kubʼ tyekʼin Jesús qa kʼokel te jun tbʼanelxix ajkawel, quʼn e waʼn nim xjal tuʼn, e qʼanet yabʼ tuʼn ax ikx e jaw anqʼin qe kyimne tuʼn!

Tuʼntzunju, aj tkawen Jesús mil abʼqʼi tuj kyaʼj, ¿tiʼtzele kbʼajel twitz Txʼotxʼ? Ok kokel tkyaqil twitz Txʼotxʼ te jun tbʼanel najbʼil. Miʼ tentl nimaq qʼoj, miʼ tzʼok kybʼinchentl xjal mya bʼaʼn tiʼj juntl, miʼ tentl yabʼil ex melay che kyimtl xjal. Ajtzqilaʼn quʼn qa ik kbʼajeljo, quʼn kubʼ tbʼinchaʼn Dios Txʼotxʼ tuʼn tok te jun tbʼanel najbʼil tuʼntzun kyanqʼin xjal twitz. Kyjuʼtzun kubʼ tbʼinchin Dios aju tbʼanel najbʼil te Edén. Ok kbʼel tbʼinchan Jesús aju tajbʼil Dios tuʼn tbʼant.

Otaq pon ambʼil tuʼn tmeltzʼaj Jesús juntl maj tuj kyaʼj. 40 qʼij kubʼ tyekʼe tibʼ Jesús kywitz t-xnaqʼtzbʼen, oteq tzʼel kynikʼ tiʼj qa otaq jaw itzʼji. Tej naʼmxteq tmeltzʼaj tqʼama jlu kye t-xnaqʼtzbʼen: ‹Ku kykyaje toj Jerusalén tzmaxe aj kykʼame xewbʼaj xjan›. A jlu atzun tipumal Diosjo aju in najbʼen tuʼn, ik tzaʼn kyqʼiqʼ ok ttzaj xupen, a jlu kʼoniltaq kyiʼj qe t-xnaqʼtzbʼen tuʼn tbʼent tajbʼil Dios kyuʼn. Xi tqʼamaʼntl Jesús jlu kye: ‹Ok che pakbʼale wiʼje tuj tkyaqil twitz Txʼotxʼ›.

Tej tbʼaj tmaʼn jlu, jax tuj kyaʼj ik tzeʼnj tkuʼx toj tilbʼilal tzalu, ex okx naj tuj muj; mitiʼtl qʼanchalix toj kywitz qe t-xnaqʼtzbʼen. Tej tjapen Jesús tuj kyaʼj ok ten kawel kyibʼaj qejo lepchiqeʼk tiʼj tzalu twitz Txʼotxʼ.