LU APÓSTOL Pedro waʼl tzalu, aqetzun xjal ateʼk tiʼjxi aʼyetzen tamiwjo. ¿Tiquʼn nkubʼ mejeʼ xjal lu twitz Pedro? ¿Bʼaʼnpetzulo tuʼn tbʼent jlu tuʼn? ¿Ojtzqiʼn xjal lu tuʼne?

Cornelio tbʼi xjal lu. Jun kynejenel soldad te Roma. Mitiʼ ajtzqiʼn twitz Pedro tuʼn Cornelio, pero tzaj qʼamaʼn te tuʼn ttzaj ttxkoʼn tja. Qo xnaqʼtzal tiʼj tzeʼn bʼaja jlu.

Aqeju tnejil t-xnaqʼtzbʼen Jesús judiyqetoq, atzunte Cornelio nya judiyteq. Pero kʼujlaʼntaq Dios tuʼn, ax ikx in naʼntoq Dios, ex nkubʼtaq tbʼinchen nim tiʼchaq tbʼanel kye xjal. Tojtzun jun qale kubʼ tyekʼin tibʼ jun anjel twitz ex xi tqʼamaʼn te: ‹Tbʼanel xjala tuj twitz Dios ex tzul ttzaqʼweʼn qe tnaʼj Diosa. Qʼamanxe tuʼn t-xi qʼiʼbʼaj xjal aju Pedro tbʼi. Atz taʼ tuj tnam Jope, toj tja Simón, aju nanqʼin nqayin ttzi mar›.

Bʼent naj jlu tuʼn Cornelio. Toj juntl qʼij atztoq taʼ Pedro toj twi tja Simón. Ok tqʼoʼn Dios toj twitz Pedro tuʼn tlonte jun xbʼalin kuʼtz toj kyaʼj. Aju toktaq kyilbʼilal tkyaqil wiq txkup twitz. Aqejo txkup lu mya bʼaʼnqetoq tuʼn kychyonjtz, ik tzeʼn tkuʼxtaq toj tley Dios, tzajtzun jun tqʼajqʼojil wibʼaj ex tqʼama: ‹Weʼktza, Pedro. Bʼyonkuya ex chyonqexa›

‹¡Melay!› Chi Pedro xi ttzaqʼweʼn. ‹Bʼajx txi nchyoʼne jun tiʼxti mya bʼaʼn ex tzʼil›. Atzunte tqʼajqʼojil wibʼaj tma: ‹Miʼ tzʼok tqʼoʼna te nya wen aju saq›. Oxe maj bʼaj jlu. Tej nximentaq Pedro tiʼ t-xilen jlu, e pon qe xjal aqejo i ex tsamaʼn Cornelio.

Kuʼtz Pedro ex tqʼma jlu: ‹Aqine aju nchin kyjyoʼne. ¿Tiquʼn ma che tzaje wukʼile?› Tej t-xi kyqʼamaʼn xjal qa jun anjel tzaj qʼmante te Cornelio tuʼn ttzaj txkoʼn Pedro tja, xi tqʼamaʼn Pedro kye qa ok kxel kyukʼe. Te juntl qʼij, xiʼ Pedro kyukʼe txqantl tamiw tuʼn kypon tja Cornelio toj Cesarea.

Otaq chi ok tchmoʼn Cornelio qeju at kyxilen tukʼe ex qejo tamiw. Tej tpon Pedro, kubʼ ẍmejeʼ Cornelio twitz, ik tzeʼn tkuʼx toj tilbʼilal. Atzunte Pedro xi tmaʼn te: ‹Weʼktza, quʼn ax xjal qin weʼ›. Ikju, quʼn ntzaj tqʼamaʼn Tyol Dios qa mya bʼaʼn tuʼn qkubʼ mejeʼ twitz jun xjal. Oʼkx qo kʼulil twitz Jehová.

Oktzen ten Pedro yolil tiʼj Tyol Dios kyukʼe xjal ex tqʼama: ‹Ma tzʼel nnikʼe tiʼj qa tbʼanel nche ela xjal tuj twitz Dios aqeju kyajbʼil tuʼn kyajbʼen te›. Tej tzmatoq nyolin Pedro, tzaj tqʼoʼn Dios xewbʼaj xjan kyibʼaj qeju xjal lu, ex e ok ten yolil toj junxitl kyyol xjal. Bʼiʼx naj kynabʼl judiy aqejo t-xnaqʼtzbʼen Jesús e tzaj tukʼe Pedro, tuʼnju nkubʼtaq kyximen qa oʼkx qe judiy tbʼanelteq nchi ela toj twitz Dios. A jlu kubʼ tyekʼin kye qa nya mas nim toklen tyajil jun xjal twitz juntl xjal tuj twitz Dios. ¿Ilpetzulo tiʼj tuʼn ttzaj qnaʼn jlu?