AQE xjal lu aqetzun t-xnaqʼtzbʼen Jesúsju. Ma kubʼ kybʼinchen aju tzaj qʼmaʼn kye tuʼn kykyaj ten toj Jerusalén. Ex tej nchi ayonteq junx, kubʼ noj tuj ja tuʼn jun tqʼajqʼojil wibʼaj tzaj. Ik tzeʼnku nim kyqʼiqʼ ntzaj. Kubʼtzen ten jun techil ik tzeʼnku taqʼ qʼaqʼ njulin wen tibʼaj kywiʼ. ¿Ntila, mo in tlome, qʼaqʼ aju tkubʼ tibʼaj kywiʼ t-xnaqʼtzbʼen Jesús? ¿Tiʼ t-xilen jlu?

¡Jun milagro jlu! Atztl taʼ Jesús tuj kyaʼj tukʼe tMan, ex ma tzaj tqʼoʼn xewbʼaj xjan te Dios kyibʼaj t-xnaqʼtzbʼen. ¿O tbʼiye tiʼ bʼant kyuʼn t-xnaqʼtzbʼen Jesús tuʼn xewbʼaj xjan? Kykyaqil bʼant kyyolin toj kyyol junxitl xjal.

Nim xjal te Jerusalén kybʼi tqʼajqʼajel wibʼaj tzaj, aju ik tzeʼnku nim kyqʼiqʼ ntzaj jumin, ex e tzaj keʼyilte tiʼtaq nbʼaj. E pon nim xjal te junxichaq tnam toj ninqʼij Pentecostés tbʼi aju nkubʼtaq kyikʼsaʼn aj Israel. ¡Bʼiʼx etz kywitz xjal, moqa naq e jaw kaʼylaj xjal! ¿Tiquʼn? Tuʼnju nchi yolintaq t-xnaqʼtzbʼen Jesús toj kyyol xjal tiʼj tbʼanel tiʼchaq oteq bʼant tuʼn Dios.

‹Kykyaqil qeju xjal lu aj Galileaqe›, che chi xjal e pon toj Jerusalén. ‹¿Tzaʼntzun tten nchi yolin xjal lu tuj nimku yol aju nyolinjtz kyoj tnam jaʼ xqo tzaja?›

Jawtzen weʼ Pedro tuʼn t-xi tchikʼbʼaʼn kye xjal. Jaw tiʼn tqʼajqʼojil twiʼ ex xi tqʼamaʼn kye xjal alkye tten kubʼ bʼiyoʼn Jesús, ex qa otaq jaw anqʼin tuʼn Jehová. ‹Atzun jaʼle atz taʼ Jesús toj kyaʼj tuj tbʼanqʼabʼ Dios›, chi Pedro. ‹Ex ma kutz tchitun xewbʼaj xjan aju tziyemaj tuʼn. Tuʼntzunju, nbʼaj tkyaqil jlu›.

Tej tbʼaj tmaʼn Pedro jlu, nim xjal tzajxix kybʼis tuʼnju ok bʼinchaʼn tiʼj Jesús ex xi kyqanin: ‹¿Tiʼ kbʼantel quʼne?› Xi tqʼmaʼn Pedro kye: ‹Iltiʼj tuʼn tkubʼ kychʼixpun kyanqʼibʼile ex iltiʼj tuʼn kykuʼxe toj aʼ tuʼn tjaw aʼ kywiʼye (kybʼyane)›. Tojx qʼij aju chʼixmilo 3.000 xjal jaw aʼ kywiʼ ex e ok te t-xnaqʼtzbʼen Jesús.