¿KUKXPE jaku che ajbʼen tmajen Dios te aj ttzaj nim nya bʼaʼn kyiʼj, axpe ikx qa mitiʼ saj qʼoʼn jun tiʼ kye? Aju bʼaj tiʼj Job in tzaj ttzaqʼweʼn jlu. Qo xnaqʼtzan tiʼj tiʼ bʼaj.

Tej in che anqʼintaq aj Israel toj tnam Egipto, in nanqʼintaq Job, aju twitzeʼl Abrahán, atz jatumel taʼ Arabia toj ambʼil jaʼlo (jaʼla). Pon jun qʼij, ok jun chmabʼil toj kyaʼj tuʼn Jehová kyukʼe anjel atz jatumel e yolen tiʼj Job. Ax ikx attaq Satanás kyxol. Kywitz kykyaqil tqʼama Jehová qa mix aʼltaq juntl xjal ik tzeʼn Job tuʼnju kukxtaq in najbʼen te, tukʼe jlu kubʼ tyekʼun qa qʼuqlixixtaq tkʼuʼj tiʼj Job. Naqtzen tuʼnj, tqʼama Satanás qa in najbʼentaq Job te Dios naq tuʼn tkyaqilju otaq txi tqʼoʼn te ex tuʼnju in noktaq t-xqʼuqen. Tqʼamaxix qa ma tzʼel iqʼet tkyaqilju otaq txi qʼoʼn te Job, jakutaq yolen nya bʼaʼn tiʼj Jehová.

Xi tqʼoʼn Dios ambʼil te Satanás tuʼn tel tiʼn tqʼinumabʼil Job, yajxitl el tiʼn qe tkʼwaʼl ex tzaj tyabʼ tuʼn. Tuʼnju mitiʼtaq ojtzqiʼn tuʼn Job qa tuʼn Satanás otaq tzaj tkyaqil nya bʼaʼn tiʼj, mitiʼtaq in nel tnikʼ tiquʼn in tzajtaq tqʼoʼn Dios ambʼil te jlu. Naqtzen tuʼnj, mitiʼx kyaj ttzaqpiʼn tuʼn tajbʼen te Jehová.

E pon oxe xjal visitaril te Job aʼyeju in che oktaq qʼoʼn te tamiw ex e ok ten qʼamal nimku (bʼampo) kyyol te Job. Tukʼe tkyaqilju xi kyqʼamaʼn te, aju chʼixme in noj tkyaqil uʼj te Job tuʼn, ok tilil kyuʼn tuʼn tkubʼ t-ximen Job qa in kubʼtaq qʼoʼn tkastiw tuʼn Dios tuʼnju il in kubʼtaq tbʼinchaʼn toj ewaj. ¡Nya iktaq tten jlu! Axpe ikx kyqʼama qa mitiʼ tkʼuʼj Dios kyiʼj tmajen ex qa mitiʼ in nok qʼuqeʼ tkʼuʼj kyiʼj. Naqtzun tuʼnj, mitiʼ ok tqʼoʼn twiʼ Job tiʼjju kyyol mitiʼtaq ttxolil ex xi tqʼamaʼn kye qa kukxtaq kajbʼel te Dios ajxi tkyim.

Naqtzen tuʼnj, el txalpaj Job tuʼnju tzaj bʼajxix tkʼuʼj tuʼn tkolen tibʼ. Xi kawin Job tuʼn Elihú, aju kuʼxun otaq bʼaj tbʼiʼn tkyaqilju in che yolintaq tiʼj, tuʼnju oʼkxtaq in ximen tiʼjx ex nya tiʼj tbʼi ex toklen Dios tuʼn tkawin. Ax ikx, i ex tkawin qeju nya ax tok (nya bʼaʼn ax) tamiw Job tukʼe kyuw yol.

Yajxitl, ax Jehová xi kawinte Job. Ajbʼen aju tbʼanelxix tbʼinchbʼen tuʼn t-xi tyekʼun te Job qa mitiʼxix toklen xjal aj tok mojbʼet tukʼeju nimxix tipumal (tbʼalor) Dios. Mitiʼ jaw tnimsen tibʼ Job ex xi tbʼiʼn kawbʼil. Ex tuʼnju «nim in qʼaqʼan tkʼuʼj ex in tzʼeʼy tkʼuʼj» Jehová qiʼj, bʼanix Job tuʼn ex xi tqʼoʼn kabʼe majtl tqʼinumabʼil ex xi tqʼoʼntl lajaj tkʼwaʼl (Santiago 5:11). Tuʼnju kukx ajbʼen Job te Jehová ajbʼen jlu tuʼn t-xi qʼet-xix jun tzaqʼwebʼil te Satanás ex ajbʼen tuʼn tkubʼ yekʼet qa jaku che ajbʼen xjal kukx te Dios aj kyok weʼ twitz nimku nya bʼaʼn.

(Atz xjatz iqʼet toj Job.)