¿ALKYETAQ tten kʼelel kynikʼ xjal tiʼj Mesías? Ax Dios ktzajeltaq yekʼunte alkye. Tej tikʼ kyaje syent abʼqʼi kykubʼlen tzʼibʼen qeju uʼj e kubʼ tzʼibʼan toj yol hebreo, kubʼ tyekʼun tibʼ anjel Gabriel twitz María aju jun txin in nanqʼintaq toj tnam Nazaret, aju tjaxtaq jawni te Galilea. Xi tqʼamaʼn Gabriel te María qa tzultaq jun tal. Naʼmxtaq tkubʼ kuẍeʼ María tukʼe jun xinaq, moqa ichan, naqtzun tuʼnj, kʼokeltaq ten tal tuʼn tipumal Dios, toj juntl yol, tuʼn t-xew Dios. Kʼokeltaq kʼwaʼl lu te Ajkawil aju otaq tzaj tziyen qa kkawiltaq te jun majx (juneleʼx). Kʼokeltaq tqʼoʼn Dios tchwinqlal tnejel tKʼwaʼl (tkyʼajol), aju in nanqʼintaq tukʼil toj kyaʼj, toj talbʼil María.

Tzaj tkʼamoʼn María tbʼanelxix toklen lu ex mitiʼ (tiloʼ) jaw tnimsan tibʼ. Aju kmojebʼeltaq tukʼe, José tbʼi ex karpintertaq, kubʼ mojeʼ tukʼe tzmaxi tej otaq tzaj t-samaʼn Dios jun anjel tuʼn t-xi tchikʼbʼaʼn te José aju in bʼajtaq. Naqtzun tuʼnj, bʼaʼn tuʼn ttzaj qnaʼn qa otaq kyaj qʼamaʼn qa tzul itzʼji Mesías toj Belén, ex nya toj Nazaret (Miqueas 5:2). ¿Alkyetaq tten kjapunel twiʼ yol lu, quʼn attaq Belén 140 kilómetros tiʼj Nazaret?

Yajxi chʼintl, etz tqʼoʼn kawil te Roma jun kawbʼil jatumel tzaj tqʼamaʼn tuʼn tjaw kyajlal xjal, ex tuʼn kyxiʼ tzʼibʼil kybʼi toj tnam jatumel e ul itzʼji. Aʼye toj tja José ex toj tja María tetaqlo Belén qe, tuʼntzunju, i eʼx toj Belén tej chʼixtaq tul itzʼji tal María (Lucas 2:3). Atz ul itzʼji Jesús toj kyja aluʼmj, ex atz kubʼ kuẍbʼaʼn toj kywabʼil aluʼmj. Tojtzun jun kojbʼil, attaq nqa (qayni), kubʼ kyyekʼun kyibʼ nimxix (bʼampo) anjel kywitz junjun xqʼuqil rit, moqa ẍneʼl, ex xi kyqʼamaʼn kye qa otaq tzul itzʼji Mesías tziyen maj, moqa Cristo.

Ax ikx e ten junjuntl xjal aʼyeju tzaj kyqʼamaʼn qa a Jesús Mesías otaq tzaj tziyen. Otaq kyaj tqʼamaʼn Isaías qa attaq jun xjal kbʼeltaq tbʼinchen bʼe tuʼn tbʼant taqʼun Jesucristo (Isaías 40:3). Aju xjal lu, a Juan el Bautista. Toj jun maj, tej tok tqʼoʼn twitz tiʼj Jesús, tqʼama jlu: «Lu tzul ju Tal T-ẍneʼl Dios aju nneʼl qʼiʼn kyil xjal tuʼn». Lwey naj e ok lepeʼ junjun t-xnaqʼtzbʼen Juan tiʼj Jesús. Jun kyxol qe jlu tqʼama: «Ma knet ju Mesías quʼne» (Juan 1:29, 36, 41).

Naqtzen tuʼnj, atxtaq tuʼn ttzaj yekʼun aju yekʼbʼil mas nim toklen. Tej tkux tqʼoʼn Juan Jesús toj aʼ tuʼn tjaw aʼ twiʼ, ajbʼen xewbʼaj xjan tuʼn Jehová tuʼn ttzaj tqʼoʼn toklen Jesús tuʼn tok te Mesías ex tqʼama jlu: «Atzun Nkʼwaʼle jlu kʼujlaʼnxix wuʼne, in chin tzalaje tiʼj» (Mateo 3:16, 17). ¡Otaq tzul Mesías aju tziyemaj!

Naqtzun tuʼnj, ¿jtoje bʼaj jlu? Toj abʼqʼi 29 tiʼj ambʼil iqʼen quʼn jaʼlo (jaʼla), tojxix ambʼil tej tjapun 483 abʼqʼi aju otaq kyaj tqʼamaʼn Daniel. Naq junjun yekʼbʼil qe jlu kyxol qeju nimxix yekʼbʼil at qa a Jesús Mesías. Naqtzen tuʼnj, ¿alkye tqanil yolin Mesías tiʼj tej tten twitz Txʼotxʼ?

(Atz xjatz iqʼet kyoj capítulo 1 a 3 te Mateo, toj capítulo 1 te Marcos, toj capítulo 2 te Lucas ex toj capítulo 1 te Juan.)