OJTZQIʼNTAQ tuʼn Jehová qa aju tkʼwaʼl (tkyʼajol) kʼujlaʼnxixtaq tuʼn oktaq kpol jun qʼij jatumel kxeltaq tqʼoʼn tchwinqlal. Iktaq in tzaj tyekʼun aju yol kyaj qʼamaʼn toj Génesis 3:15, naqtzen tuʼnj, nyaxix qʼanchaʼl. Tuʼn tel kynikʼ xjal jniʼtaq kʼixkʼej tuʼn tikʼx tuʼn Dios ajtaq tkyim tkʼwaʼl, kyaj tqʼoʼn Dios toj Tuʼjil Tyol aju ikʼ tej t-xi tqʼamaʼn te Abrahán tuʼn tkubʼ tbʼiyoʼn Isaac aju tkʼwaʼl kʼujlaʼnxixtaq tuʼn.

Mitiʼ (tiloʼ) tuʼn tel naj tiʼj qkʼuʼj qa otaq tzaj ttziyen Dios qa kyiʼj tyajil Isaac oktaq tzul itzʼji aju Kolel. Qʼuqlitaq tkʼuʼj Abrahán tiʼj jlu ex qʼuqlitaq tkʼuʼj tiʼj qa jakutaq jaw anqʼin juntl maj tkʼwaʼl tuʼn Dios, qa iltaq tiʼj. Tuʼntzun aju, kubʼ tbʼinchaʼn aju xi tqʼamaʼn Dios te ex bʼaj t-ximen tuʼn tkubʼ tbʼiyoʼn tkʼwaʼl. Naqtzen tuʼnj, tej chʼixtaq tkubʼ tbʼiyoʼn tkʼwaʼl tzaj t-samaʼn Jehová jun anjel ex mitiʼ xi tqʼoʼn ambʼil te Abrahán tuʼn tkubʼ tbʼiyoʼn tkʼwaʼl. O tzalaj Jehová tiʼj Abrahán tuʼnju qʼuqlexixtaq tkʼuʼj tiʼj ex tzaj tqʼamaʼn juntl maj aju otaq tzaj ttziyan te.

Tej tbʼet ambʼil, e ul itzʼji kabʼe tkʼwaʼl Isaac: aju Esaú ex Jacob. Kyxol qeju kabʼe kʼwaʼl lu, oʼkx Jacob kubʼ tyekʼun qa nimtaq toklen toj twitz aju tajbʼil (tvoluntad) Dios, kyjuʼtzun tzaj kʼiwlaʼn. Kubʼ tchʼixpuʼn Dios tbʼi Jacob te Israel, ex kyiʼj kabʼlaj tkʼwaʼl i el qeju kabʼlaj kʼloj tyajil Israel. Naqtzen tuʼnj, ¿tzeʼn ok ja xjal lu te jun matij (nin, nim) tnam?

Tzaj tzyet jlu tej ttzaj kyqʼoj ttzik José tiʼj. Tuʼnju nimtaq qʼoj tkuʼx toj kyanmi tiʼj, xi kykʼayen tuʼn tok te majen. Aʼyeju i ex laqʼonte xi kyiʼn toj tnam Egipto, atz jatumel ok weʼ twitz nimku nya bʼaʼn. Naqtzun tuʼnj, tzaj onin tbʼanel qʼa lu tuʼn Dios aju mitiʼtaq in tzaj xobʼ, pon jun qʼij, jatumel xi tqʼoʼn Faraón, aju ajkawil te Egipto, jun tbʼanel toklen. A jlu onin tiʼj tuʼn kyxi tonin qe toj tja tej kyxi t-samaʼn Jacob qe tkʼwaʼl laqʼol wabʼj toj Egipto tej ttzaj waʼyij. ¿Alkyetaq in sipen tiʼj wabʼj? ¡Ataq José! Tej tok tchmon tibʼ José kyukʼe ttzik —aʼyeju otaq tzʼajtz tiʼj kyanmi— kubʼ tnajsaʼn kyil ex xi tqʼamaʼn kye tuʼn kyxiʼ iqʼel qeju txqantl toj tja tuʼn kypon toj Egipto. Tzaj tqʼoʼn Faraón tbʼanel txʼotxʼ kye, ex atz toj txʼotxʼ lu chmet kybʼaj ex e ten toj tbʼanel. El tnikʼ José qa tuʼn Jehová otaq bʼant jlu tuʼn kyjapun twiʼ tyol aju otaq tzaj ttziyen.

Anqʼin Jacob kyukʼe toj tja atz toj tnam Egipto tejxi tkyim. Tej chʼixtaq tkyim, kyaj tqʼamaʼn qa aju Kolel otaq tzaj tziyen ok kʼokeltaq te jun kawil nim toklen ex atztaq tzul itzʼji tiʼj tyajil Judá, aju tkʼwaʼl. Tej tbʼet ambʼil, kyaj tqʼamaʼn José qa oktaq che eletz tiʼn Dios toj tja Jacob toj Egipto.

(Atz xjatz iqʼet kyoj capítulo 20 a 50 te Génesis ex Hebreos 11:17-22.)