TEJ tikʼ nim abʼqʼi kyuʼn aj Israel toj tnam Egipto e ten toj tbʼanel ex chʼiy kybʼet. Naqtzun tuʼnj, ok juntl Faraón te ajkawil, nya bʼaʼntaq ex mitiʼtaq ojtzqiʼn twitz José tuʼn. Tuʼnju kubʼ t-ximan qa nimtaq kybʼaj aj Israel otaq chmet, xi tqʼamaʼn tuʼn kyok te majen ex tuʼn kykux qʼoʼn tal qʼa tzmataq in che itzʼji toj nimaʼ Nilo tuʼn kyjiqʼwi. Naqtzen tuʼnj, attaq jun xuʼj aj Israel mitiʼtaq in tzaj xobʼ, kux tewen tal tneʼ (tneʼẍ) toj jun chiʼl kyxol kʼul. Jatz kanet tal neʼ lu tuʼn tmeʼl Faraón, ok tqʼoʼn tbʼi te Moisés ex atz chʼiy tuʼn toj ja te kawbʼil.

Tej iqʼentaq 40 abʼqʼi tuʼn Moisés, okx tqʼoʼn tibʼ tjaqʼ nya bʼaʼn tuʼnju kolen tiʼj jun aj Israel aju in noktaq bʼinchen nya bʼaʼn tiʼj tuʼn jun xqʼuqel te Egipto, tuʼntzunju, el oq ex xiʼ najchaq, moqa laqʼche. Tej iqʼentaq 80 abʼqʼi tuʼn, xi tqʼamaʼn Dios te tuʼn tmeltzʼaj toj Egipto ex tuʼn t-xi tqʼamaʼn te Faraón tuʼn kyetz ttzaqpiʼn aj Israel.

Tuʼnju mitiʼx i etz ttzaqpiʼn Faraón aj Israel, tzaj t-samaʼn Dios lajaj kʼixbʼisabʼil tibʼaj tnam Egipto. Tej naʼmxtaq ttzaj junjun kʼixbʼisabʼil, in xiʼtaq Moisés tukʼe Faraón ex in xiʼtaq tqʼoʼn ambʼil te tuʼn miʼn ttzaj kʼixbʼisabʼil. Naqtzun tuʼnj, kukxtaq in jaw tnimsen tibʼ ex nyataq taj tuʼn t-xi tbʼiʼn aju in xitaq tqʼamaʼn Moisés ex Jehová. Tej ttzaj lajaj ex bʼajsbʼil kʼixbʼisabʼil, tzaj t-samaʼn Dios jun anjel tuʼn tkubʼ tbʼiyoʼn tkyaqil tnejel kykʼwaʼl (kykyʼajol) xjal toj Egipto. Oʼkx qeju ja xjal okx kybʼiʼn Jehová ex ok kyqʼoʼn tchikʼel rit, moqa ẍneʼl, ttziʼyile kyja mitiʼ (tiloʼ) e kubʼ tbʼiyoʼn anjel tnejel kykʼwaʼl. Tuʼn tkubʼ kynaʼn aj Israel jlu, e ok ten ikʼsalte Xjan Qʼij tkyaqil abʼqʼi.

Tej tkyim tnejel tkʼwaʼl Faraón, xi tqʼamaʼn te Moisés ex kye aj Israel tuʼn kyetz toj Egipto. Lwey naj bʼaj kybʼinchen kyten aj Israel tuʼn kyetz. Naqtzen tuʼnj, kubʼ tchʼexpuʼn Faraón t-xim ex xi lepeʼ kyiʼj kyukʼe qe t-soldad ex qe tkarro te qʼojbʼel. Tej kykanin ttzi mar Rojo, kubʼ kyximen qa otaq che maqet aj Israel kyuʼn. Naqtzun tuʼnj, jaqet mar tuʼn Jehová, ex e ikʼx aj Israel toj mar tibʼaj tzqij txʼotxʼ. Tej kyokx lepeʼ aj Egipto kyiʼj, tzaj mulqʼaj aʼ tuʼn Jehová kyibʼaj aj Egipto ex jiqʼwe Faraón kyukʼex t-soldad toj aʼ.

Tej tikʼ chʼintl ambʼil, e kubʼ ten aj Israel ttxlaj witz Sinaí tbʼi, ex atz kyaj bʼant tiʼj jun tyol Jehová kyukʼil. Ajbʼen Moisés tuʼn, tuʼn kytzaj tqʼoʼn tkawbʼil kye aj Israel aju kxeltaq tyekʼun kybʼe ex ok che okeltaq xqʼuqen tuʼn toj chʼixme tkyaqil tten kyanqʼibʼil. Qa kukxtaq ẍe bʼin ex qa kukxtaq ẍe ajbʼen te Dios, kukxtaq ktel Dios kyukʼil ex oktaq che ajbʼel tuʼn Dios tuʼn kykubʼ tkʼiwlaʼn txqantl tnam.

Naqtzen tuʼnj, chʼixme kykyaqil aj Israel kubʼ kyyekʼun qa nyataq qʼuqli kykʼuʼj tiʼj Jehová. Tuʼntzun jlu, e bʼet 40 abʼqʼi tuʼn toj tzqij txʼotxʼ. Oktzen tqʼoʼn Moisés toklen jun tbʼanel aj Israel te t-xel (tchʼixel) aju Josué tbʼi. Pontzun ambʼil tuʼn kyokx aj Israel toj txʼotxʼ te Canaán aju otaq tzaj ttziyen Dios te Abrahán aju kyxeʼchel.

(Atz xjatz iqʼet toj Éxodo, Levítico, Números, Deuteronomio, Salmo 136:10-15 ex Hechos 7:17-36.)