E KUBʼ tbʼinchen Dios anjel, aʼyeju nya qʼanchaʼlqe, tej naʼmxtaq tkubʼ tbʼinchen xjal. Jun kyxol qe jlu —aju yajxitl ok tbʼi te Satanás moqa Tajaw il— el tpan tibʼ tiʼj Dios ex kubʼ sbʼuʼn Eva tuʼn, tuʼn t-xi tloʼn twitz jun tzeʼ aju otaq tzaj tqʼamaʼn Dios kye tuʼn miʼn t-xi kyloʼn.

Ajbʼen jun kan, moqa lobʼaj, tuʼn Satanás tuʼn tyolin tukʼe Eva tuʼn tkubʼ t-ximen tukʼex tchmil qa attaq jun tbʼanel tiʼ nya tajtaq (nya tgantoq) Dios tuʼn ttzaj tqʼoʼn kye. Ax ikx xi tqʼamaʼn te qa ma txi tloʼntaq twitz tzeʼ aju nya bʼaʼntaq tuʼn t-xi kyloʼn mlaytaq che kyim; iktzen tten xi tqʼamaʼn kye qa otaq txi tqʼamaʼn Dios nya ax yol kye. Ok tilel tuʼn Satanás tuʼn tel te tbʼanel toj kywitz aju in xitaq tqʼamaʼn kye, tej t-xi tqʼamaʼn qa mitiʼtaq sokx kybʼiʼn Dios oktaq ktel jun tbʼanelxix kynabʼil ex jakutaq bʼant kyuʼn naq alkyetaq kyajbʼil. Naqtzen tuʼnj, jun matij nya ax tok (nya bʼaʼn ax) yol jlu: aju tnejel tiʼj tkyaqil. Tukʼe jlu, tajtaq ajqʼoj lu tuʼn tkubʼ ximet jlu: ¿At toklen Dios tuʼn tkawin tibʼaj tkyaqil? ¿Tzʼaqliqepe tkawbʼil? ¿Bʼaʼnpe tuʼn kyokx qbʼiʼn qe jlu?

Kubʼ tiʼj Eva tuʼn jlu. Tnejel ok tqʼoʼn twitz tiʼj lobʼj, ex yajxitl ok ten loʼlte. Ax ikx xi tqʼoʼn te tchmil ax ikx te tchmil xi tloʼn chʼin. Ik tzeʼn mitiʼku toklen jlu, naqtzun tuʼnj, jun yekʼbʼil jlu tiʼj qa in neltaq kypan kyibʼ tiʼj Dios, jun il jlu. Ojtzqiʼnxixtaq kyuʼn aju in kubʼtaq kybʼinchen: in neltaq kyikʼen aju toklen Bʼinchel kye tuʼn tkawin, aju otaq txi tqʼoʼn tkyaqilju attaq kye, axpe ikx aju kychwinqlal tzʼaqle.

Xi tqʼamaʼn Dios kye tiʼtaq tzul kyiʼj tuʼnju nya bʼaʼn otaq bʼant kyuʼn. Tnejel tzaj tqʼamaʼn qa, toj ambʼil tzul, oktaq tzul t-samaʼn jun —aju Tyajil xuʼj— aju kbʼeltaq najsaʼn kan, moqa Satanás tuʼn. Ex xi tqʼamaʼn kye Adán tukʼe Eva qa oktaq che kyimel, naqtzen tuʼnj, mitiʼ (tiloʼ) e kubʼ tnajsaʼn naj tuʼnju tzaj qʼaqʼen tkʼuʼj kyiʼj qe kykʼwaʼl che ultaq itzʼji. ¿Alkyetaq qʼuqbʼil kykʼuʼj tkʼwaʼl Adán ex Eva ktel? Tzaj tqʼamaʼn Jehová qa aju ok tzultaq t-samaʼn oktaq kʼelel tiʼn tkyaqilju nya bʼaʼn in tzaj tuʼnju bʼaj toj Edén. Naqtzun tuʼnj, ¿alkyetaq Kolel lu, ex alkyetaq tten kjapunel bʼaj t-xim Dios tuʼn? Chebʼe qʼanchaʼlix tzaqʼwebʼil tiʼj jlu tej tbʼet ambʼil, tej tkubʼ tzʼibʼen jun ex juntl uʼj toj Tuʼjil Tyol Dios.

I extzen tlajoʼn Dios Adán tukʼe Eva toj Tbʼanel Najbʼil. Tej otaq che ex lajoʼn, iltaq tiʼj tuʼn kyaqʼunanxix tiʼj txʼotxʼ tuʼn kywaʼn. Ax ikx tej otaq che etz lajoʼn, ul itzʼji tnejel tal Eva, aju Caín tbʼi. Tej tbʼet ambʼil, e ul itzʼji txqantl tkʼwaʼl Adán tukʼe Eva, jun kyxol qe jlu aju Abel, ax ikx Set, aju t-xeʼchel Noé.

(Atz xjatz iqʼet toj capítulo 3 a 5 te Génesis ex Apocalipsis 12:9.)