TEJ otaq tzikʼ oxe qʼij tkyimlen Jesús, i eʼx junjun xuʼj kyxol qeju lepchiqeʼk tiʼj Jesús ttzi jul ex jaqoʼntaq tej kypon. Otaq tzʼel iqʼen abʼj ttziʼ jul ex mitiʼtl (tiloʼtel) t-xmilal Jesús toj.

Kubʼtzun kyyekʼun kyibʼ kabʼe anjel kywitz xuʼj. Jun kyxol qe jlu xi tqʼamaʼn kye: «In che jyone tiʼj Jesús aj Nazaret, [...] ma jaw anqʼin» (Marcos 16:6). I eʼx naj qe xuʼj qʼamalte kye apóstol. Kubʼ tyekʼun tibʼ Jesús kywitz toj bʼe ex xi tqʼamaʼn jlu kye: «Miʼn che xobʼe; kyxiʼye, kyqʼonxe tqanil kye wermaniye tuʼn kyxiʼ tuj Galiley, ex atzun chin okel keʼyine kyuʼn» (Mateo 28:10).

Yajxitl, tej in che bʼettaq kabʼe kyxol qeju lepchiqeʼk tiʼj Jesús aʼyeju tzajniqe toj Jerusalén tuʼn kyxiʼ toj Emaús, pon laqʼeʼ jun xjal kytxlaj aju mitiʼtaq ojtzqiʼn kyuʼn ex xi tqanin kye alqiʼjtaq in che yolin. Ataq Jesús, naqtzen tuʼnj, mitiʼ el kynikʼ tiʼj tuʼnju otaq chʼixpaj tilbʼilal. Xi kytzaqʼweʼn tukʼe bʼis qa in che yolintaq tiʼj Xnaqʼtzal kye, atzunte xjal ok ten qʼamalte kye tkyaqilju in tzaj tqʼamaʼn Tuʼjil Tyol Dios tiʼj Mesías. Otaq japun bʼaj twiʼ tkyaqil yol tuʼn Jesús aju kyaj qʼamaʼn tiʼj Mesías. * Tej tel kynikʼ qa in che yolintaq tukʼe Jesucristo, aju otaq tzʼok te jun xewbʼaj, kubʼ naj kywitz.

E ajtz meltzʼaj qeju kabʼe t-xnaqʼtzbʼen Jesús toj Jerusalén ex i eʼx kyukʼe apóstol, aʼyeju kychmontaq kyibʼ ex jupuʼntaq ja kywitz. Tej in xitaq kytxʼolbʼaʼn aju otaq tzikʼ, kykyaqil qeju otaq tzʼok kychmon kyibʼ bʼiʼx etz kywitz tej tkubʼ tyekʼun juntl maj tibʼ Jesús kywitz. «[¿]Tiquʼn in kubʼ kyximane jlu tuj kyanmiye?», chi Jesús kye. Ex xi tqʼamaʼntl jlu kye: «Tzʼibʼamaj; in tmaʼn qa ilxix tiʼj tuʼn tkyim ju Crist aju at toklen tuʼn Dios, ex tuʼn tjatz anqʼin kyxol kyimni tuj toxin qʼij» (Lucas 24:38, 46).

Toj 40 qʼij, kubʼ tyekʼun tibʼ Jesús nim (bʼampo) maj kywitz t-xnaqʼtzbʼen. Toj jun maj, kubʼ tyekʼun tibʼ kywitz mas te 500. Tojlo ambʼil aju, xi tqʼamaʼn kye qeju lepchiqeʼktaq tiʼj aju aqʼuntl lu nim toklen: «Kyxiʼye, kymanxe kye xjal tuʼn kyok te nxnaqʼtzbʼene kyuj kykyaqil nasyon, ex [...] kyqʼonxe xnaqʼtzbʼil kye tuʼn tjapun kyuʼn tkyaqilju ma txi nmaʼne kyeye. Ex lu qine chin tele kyukʼile tkyaqil qʼij akutzun in japun bʼaj mankbʼil tqʼijlalil» (Mateo 28:19, 20).

Tej tok tchmon tibʼ Jesús junxtl maj kyukʼe junlaj tbʼanel t-apóstol xi ttziyen jlu kye: «Ok tul Xewbʼaj Xjan kyukʼile, ok kykʼmaʼye kyipumale, ex che okele testiw wiʼje tuj [...] tkyaqil twitz txʼotxʼ» (Hechos 1:8). Tej tbʼaj tqʼamaʼn jlu jax toj kyaʼj, okx naj toj muj ex mitiʼtl qʼanchaʼlix toj kywitz.

(Atz xjatz iqʼet toj capítulo 28 te Mateo, toj capítulo 16 te Marcos, toj capítulo 24 te Lucas, toj capítulo 20 ex 21 te Juan ex toj 1 Corintios 15:5, 6.)