TEJ tikʼ lajaj qʼij tjaxlen Jesús toj kyaʼj, toj Pentecostés aju kyninqʼij judiy, toj abʼqʼi 33, ok kychmon kyibʼ junlo 120 t-xnaqʼtzbʼen Jesús toj jun ja atz toj Jerusalén. Naq minabʼen tzaj qʼajti jun tiʼ aju ik tzeʼn aj ttzaj jumen kyqʼiqʼ, ex e ok ten qeju lepchiqeʼktaq tiʼj Jesús yolil toj junjuntl yol aju mitiʼtaq ojtzqiʼn kyuʼn. ¿Tiʼtaq in bʼaj? Otaq tzaj tqʼoʼn qMan Dios t-xew kyibʼaj.

Otaq noj toj tnam kyuʼn xjal te junjuntl tnam aʼyeju otaq che ul toj ninqʼij. Kykyaqil xjal etz kywitz kyiʼj qeju lepchiqeʼktaq tiʼj Jesús tuʼnju jakutaq che yolin kyukʼil tojxix kyyol. Tuʼn t-xi chikʼbʼet aju in bʼajtaq, xi tnaʼn apóstol Pedro kye qa otaq kyaj tqʼamaʼn Joel, aju t-sanjel Dios, qa tzultaq tqʼoʼn Dios t-xew kyibʼaj tmajen ex ktzajeltaq tqʼoʼn kyipumal (kybʼalor) tuʼn tbʼant junjun tiʼ kyuʼn (Joel 2:28, 29). Aju ipumalj tzaj qʼoʼn kye, tzaj tyekʼun qa atztaq in tzalajtl Dios kyiʼj okslal ex nya tiʼj tnam Israel. Tuʼntzunju, atxix toj ambʼil aju, alkyetaq taj tuʼn tajbʼen te Dios iltaq tiʼj tuʼn tok te okslal.

Naqtzen tuʼnj, aʼye ajqʼoj tiʼj Jesucristo e ok ten qʼojil kyiʼj qeju lepchiqeʼktaq tiʼj. Pon jun qʼij jatumel e okx kypresin ajqʼoj junjun t-xnaqʼtzbʼen Jesús, naqtzun tuʼnj, ul jun anjel te qonikʼan, i etz ttzaqpiʼn ex xi tqʼamaʼn kye tuʼn kukx kyyolin tiʼj Tyol Dios. Tej qsqix, e okx qeju lepchiqeʼk tiʼj Jesús toj tja Dios ex e ok ten yolil tiʼj Jesús. Tuʼnju otaq tzajxix kyqʼoj nejenel kye okslabʼil (nimbʼil) xi kyqʼamaʼn kye tuʼn miʼn kypakbʼantl. Naqtzen tuʼnj, mitiʼ (tiloʼ) e tzaj xobʼ apóstol tej t-xi kyqʼamaʼn jlu kye: «Tnejel ilxix tiʼj tuʼn t-xi qnimane Dios, ex mya qe xjal» (Hechos 5:28, 29).

Kukx ok kybʼinchen ajqʼoj mas nya bʼaʼn kyiʼj qeju lepchiqeʼktaq tiʼj Jesús. At junjun Judiy kyqʼama qa otaq yolin Esteban nya bʼaʼn ex ok kyxoʼn abʼj tiʼj tuʼn tkyim. Kyxol qeju ok kyqʼoʼn kywitz tiʼj tkyimlen Esteban attaq Saulo de Tarso, aju jun kuʼxin ikʼenqetaq okslal tuʼn. Tej tbʼaj jlu, xiʼ Saulo toj Damasco tuʼn kyokx tjupuʼn kykyaqil okslal che kaneteltaq tuʼn. Naqtzun tuʼnj, tej in bʼettaq toj bʼe, tzaj qoptzʼaj jun spikʼun toj kyaʼj aju bʼiʼx kyaj moẍix tuʼn. Xitzen tbʼiʼn jun tqʼajqʼajel wibʼaj aju in tqʼamaʼntaq: «Saulo, Saulo, ¿tiquʼn in chin kubʼ tyajlaʼna?». Tuʼnju mitiʼtaq in nel tnikʼ Saulo xi tqanin jlu: «¿Alkyetzuna, Tat?». Ex tzaj ttzaqʼweʼn tqʼajqʼajel wibʼaj jlu: «Aqine Jesús» (Hechos 9:3-5).

Tej tikʼ oxe qʼij, xi t-samaʼn Jesús jun t-xnaqʼtzbʼen aju Ananías tbʼi tuʼn tbʼaj tqʼanin twitz Saulo. Kuʼx Saulo toj aʼ tuʼn tjaw aʼ twiʼ ex ok ten pakbʼal tukʼe tzalajbʼil. Tej tbʼet ambʼil, ok qʼoʼn tbʼi te apóstol Pablo, aju kukx pakbʼan kyoj junjuntl tnam.

Tnejelku, oʼkx xi kypakbʼaʼn qeju lepchiqeʼktaq tiʼj Jesús tKawbʼil Dios kye judiy ex kye aj Samaria. Naqtzen tuʼnj, pon jun qʼij jatumel kubʼ tyekʼun tibʼ jun anjel twitz Cornelio, jun nejenel kye soldad te Roma, aju qʼuqletaq tkʼuʼj tiʼj axix tok (bʼaʼn ax) Dios, ex xi tqʼamaʼn tuʼn tpon apóstol Pedro tukʼil. Pon Pedro kyukʼex junjuntl t-xnaqʼtzbʼen Jesús ex ok ten pakbʼal te Cornelio ex kye qeju ateʼtaq toj tja. Tej in yolintaq apóstol Pedro, tzaj qʼoʼn xewbʼaj xjan kyibʼaj xjal lu, ex xi tqʼamaʼn tuʼn tjaw aʼ kywiʼ toj tbʼi Jesús. Atxix toj ambʼil aju, alkyexku xjal ex alkyexku ttnam, jakutaq tzʼanqʼin te jun majx (juneleʼx). A jlu in tzaj tyekʼun qa kxeltaq qʼamet tbʼanel tqanil kye xjal te tkyaqil tnam.

(Atz xjatz iqʼet toj Hechos 1:1–11:21.)