¿BʼAʼNPE tuʼn tokx qqʼon qibʼ tjaqʼ tkawbʼil Jehová? Tuʼn tel qnikʼ tiʼj, il tiʼj tuʼn qxnaqʼtzan kyiʼj kawbʼil ateʼkux toj Tuʼjil Tyol. ¿Atpe kyajbʼen jlu? ¿In che oninpe qiʼj tuʼn qanqʼin mas toj tbʼanel? Toj uʼj te Proverbios, ok tchmoʼn Salomón nim (bʼampo) syent kawbʼil aju at kyajbʼen chʼixme toj tkyaqil tten qanqʼibʼil. Qo xnaqʼtzan kyiʼj junjun.

Aju tbʼanel qxol tukʼe Dios. Tuʼn tten jun tbʼanel qxol tukʼe Jehová, ilxix tiʼj tuʼn tok qʼuqeʼ qkʼuʼj tiʼj. Tqʼama Salomón jlu: «Qeʼk tkʼuʼja tiʼj Qman tuʼn tkyaqil tanmiya ex mya tuʼn tok qeʼ tkʼuʼja tiʼj texa tnabʼla. Naʼntza Qman tiʼj tkyaqilju kbʼantel tuʼna, ex a Qman kxel ẍaqlun teya tuj bʼe jiqun tiʼj» (Proverbios 3:5, 6). ¿Alkye tten in kubʼ qyekʼun qa qʼuqle qkʼuʼj tiʼj Dios? Qa ma txi qqʼoʼn ambʼil te tuʼn ttzaj tyekʼun qbʼe ex qa ma chex qbʼiʼn tkawbʼil. Qa ma bʼant jlu quʼn ok kajbʼel qanqʼibʼil toj tbʼanel: ok kajbʼel tuʼn tjaw tzalaj tanmi qTat toj kyaʼj quʼn ex tuʼn tkubʼ qyekʼun qa nya ax tok (nya bʼaʼn ax) yolen Tajaw il (Proverbios 27:11).

Aʼye toj qja ex qamiw. Mas ilxix tiʼj tuʼn ttzaj tyekʼun Dios kybʼe ja xjal toj ambʼil jaʼlo (jaʼla). In tzaj tqʼoʼn Dios kawbʼil lu te chmilbʼaj: «Tzalajxa tukʼil xuʼj aju mojeʼya tukʼil tuj tkuʼxumala», a jlu in tzaj tnaʼn te qa ilxix tuʼn miʼn tok ten tiʼj juntl (Proverbios 5:18-20). Toj capítulo 31 te Proverbios at jun tbʼanelxix techel te xuʼjilbʼaj aju in tzaj tyekʼun tzeʼn jaku kubʼ nimen tuʼn tchmil ex kyuʼn tal ex tzeʼn jaku che tzalaj tiʼj. Ax ikx in tzaj qʼamaʼn kye kʼwaʼl tuʼn tokx kybʼiʼn kytat (Proverbios 6:20). Aju uʼj lu, ax ikx in tzaj tqʼamaʼn qa nimxix toklen tuʼn kyten qamiw, ex in tzaj tqʼamaʼn qa ma tzʼel qpan qibʼ kyiʼj txqantl, oʼkx in qo ximen qiʼjx (Proverbios 18:1). Ilxix tiʼj tuʼn kyten tbʼanel qamiw, naqtzen tuʼnj, ilxix tiʼj tuʼn kyjaw qjyoʼn tuʼn miʼn tok qmojbʼan qibʼ kyukʼe qeju jaku qo el kypaʼn tiʼj Jehová (Proverbios 13:20; 17:17).

Aʼyeju kawbʼil jaku che onin qiʼj. At nim tbʼanel kawbʼil toj uʼj te Proverbios aju jaku tzʼonin tiʼj junjun qe ex jaku tzʼonin qiʼj tuʼn tel qikʼen nya bʼaʼn ximbʼetz, tuʼn tel qikʼen aju o qo naqʼet tiʼj ik tzeʼn qa in xi qkʼaʼn nim qʼeʼn, tuʼn ten jun tbʼanel qxim axpe ikx tuʼn qok te jun tbʼanel aqʼunal (Proverbios 6:6; 14:30; 20:1). Nya oʼkxju, ax ikx in tzaj tqʼamaʼn qe alkye nya bʼaʼn jaku tzaj qiʼj qa ma txi qbʼiʼn junjun ximbʼetz aju junxitl twitzju in tzaj tqʼamaʼn qMan Dios (Proverbios 14:12). Ax ikx in qo tzaj tkawin tuʼn tok qxqʼuqin qximbʼetz tiʼj nya bʼaʼn aj ttzaj tnaʼn qe qa atz «tiʼj jlu in tzaj chwinqlal» (Proverbios 4:23).

Aʼye kawbʼil lu o tzʼonin kyiʼj nimxix xjal, aʼyeju xjal lu o tzʼel kynikʼ qa mitiʼ (tiloʼ) juntl mas bʼaʼn twitzju tuʼn tokx qqʼon qibʼ tjaqʼ tkawbʼil Jehová.

(Atz xjatz iqʼet toj uʼj te Proverbios.)