TEJ tchʼiy kybʼet xjal twitz Txʼotxʼ, aju il ex aju nya bʼaʼn xi sputj twitz tkyaqil Txʼotxʼ. Kyaj tqʼamaʼn Enoc, aju oʼkxle jun tmajen qMan Dios attaq twitz Txʼotxʼ toj ambʼil aju, qa oktaq che kbʼel tnajsaʼn Jehová tkyaqil nya bʼaʼn xjal. Naqtzen tuʼnj, mitiʼ (tiloʼ) xi kybʼiʼn xjal aju xi tqʼamaʼn kye, ex xiʼ nya bʼaʼn toj il. Axpe ikx at junjun anjel el kypan kyibʼ tiʼj Jehová, kyaj kytzaqpiʼn kyoklen toj kyaʼj, e ok te xjal ex e kubʼ mojeʼ kyukʼe nimku (bʼampo) xuʼj. Tuʼnju e kubʼ mojeʼ kyukʼe xuʼj lu, aju mitiʼ tzaj tqʼoʼn Dios ambʼil kye tuʼn tbʼant kyuʼn, e ul itzʼji kykʼwaʼl aʼyeju e ok te nimaq xjal nim kyipumal (kybʼalor) ex ok kybʼi te Nefilim, aʼyeju kubʼ noj twitz Txʼotxʼ kyuʼn tukʼe bʼiybʼel. ¿Jaku bʼant t-ximet quʼn aju kʼixkʼej tnaʼ Dios tej ttzaj tqʼoʼn twitz tiʼj aju in bʼanttaq kyuʼn tbʼinchbʼen?

Tej tkyim Enoc ten juntl tbʼanel xjal: aju Noé tbʼi. Ok tilel tuʼn kyukʼe toj tja tuʼn kyel bʼaʼn toj twitz Dios. Pon jun qʼij jatumel kubʼ t-ximen Jehová tuʼn tkubʼ tnajsaʼn tkyaqil nya bʼaʼn xjal tukʼe Nim Jbʼal. Naqtzun tuʼnj, nya tajtaq (tgantoq) tuʼn tkyim Noé, aju tbʼanel xjal, ex qe txkup. Tuʼntzen aju, xi tqʼamaʼn te tuʼn tkubʼ tbʼinchen jun ark, toj juntl yol, jun matij kajon. Iltaq tiʼj tuʼn tokx Noé kyukʼe toj tja toj ark lu ex tuʼn kyokx tiʼn nimku wiq txkup toj. Kubʼ tbʼinchaʼn Noé aju tzaj tqʼamaʼn Dios te ex xi tiʼn junlo 40 moqa 50 abʼqʼi tuʼn tbʼaj tbʼinchaʼn ark lu. Toj tkyaqil ambʼil lu, ax ikx «xi tpakbʼaʼn Noé kye xjal tuʼn kybʼinchante aju tzʼaqlxix» (2 Pedro 2:5). Xi tqʼamaʼn kye xjal qa chʼixtaq ttzaj Nim Jbʼal, naqtzun tuʼnj, mi aʼl jun xi bʼinte. Pon ambʼil tuʼn tokx Noé kyukʼe toj tja ex qe txkup toj ark. Oktzen tjupuʼn Dios ttzi ark ex tzajtzun jbʼal.

Aju nimxix jbʼal tzaj, kubʼ ten 40 qʼij ex 40 qonikʼan, kubʼ noj twitz tkyaqil Txʼotxʼ tuʼn. Tkyaqil nya bʼaʼn xjal e naj. Tej tikʼ junjun xjaw (qyaʼ), chebʼe kubʼ naj aʼ twitz Txʼotxʼ ex kyaj ten ark twiʼ jun witz. Tej tpon ambʼil tuʼn tetz Noé kyukʼex toj tja toj ark, otaq tzikʼ jun abʼqʼi. Tuʼnju in tzalajtaq Noé, xi tqʼoʼn jun oyaj te Jehová. Tzaj ttziyen qMan Dios kye qa mlaytaq tzaj tiʼn juntl maj Nim Jbʼal tuʼn tkubʼ tnajsaʼn kykyaqil qeju itzʼqe twitz Txʼotxʼ. Kubʼ tqʼoʼn Jehová jun arko iris tuʼn tkyajxix bʼant tiʼj tyol lu. Tkyaqil maj aj tok kyqʼoʼn kywitz xjal tiʼj arko iris oktaq tzul kynaʼn aju tqʼama Bʼinchel kye.

Tej otaq tzikʼ Nim Jbʼal, tzaj tqʼoʼn Dios junjuntl akʼaj kawbʼil te Noé. Tzaj tqʼoʼn ambʼil tuʼn t-xi kychyoʼn xjal kychibʼjil txkup, naqtzen tuʼnj, tzaj tqʼamaʼn kye tuʼn miʼn t-xi kychyoʼn chikʼ. Ax ikx tzaj tqʼamaʼn tuʼn kyxiʼ xjal najal twitz tkyaqil Txʼotxʼ. Naqtzun tuʼnj, nim xjal mitiʼ xi kybʼiʼn jlu, kubʼ kyximen tuʼn kynajan toj junx tnam ex e ok ten bʼinchel jun matij ja tjaqʼ tkawbʼil jun xjal Nemrod tbʼi. Naqtzen tuʼnj, mitiʼ xi tqʼoʼn Dios ambʼil kye tuʼn tbʼant jlu kyuʼn. ¿Tzeʼn tena tuʼn? E ok ten xjal yolel tuʼn toj junxichaq yol toj tnam lu, aju ok tbʼi te Babel, ex yajxitl te Babilonia. Tuʼnju mitiʼtl el tnikʼ jun tiʼj tyol juntl, kyaj weʼ aqʼuntl lu kyuʼn ex i eʼx najal toj junjuntl plaj twitz Txʼotxʼ.

(Atz xjatz iqʼet toj capítulo 6 a 11 te Génesis ex Judas 14, 15.)