¿TIQUʼN ul Jesús twitz Txʼotxʼ? Ax Jesús qʼamante jlu: «Ilxix tiʼj tuʼn t-xi npakbʼane tqanil bʼaʼn tiʼj tkawbʼil Dios; porque atzun waqʼune ma chin tzaj samaʼne» (Lucas 4:43). Qo xnaqʼtzan tiʼj kyaje xnaqʼtzbʼil tiʼj tKawbʼil Dios aju yolenxix Jesús tiʼj.

1. Kʼokeltaq Jesús te Kawil. Ax Jesús qʼamante qa ate Mesías (Juan 4:25, 26). Ax ikx tzaj tqʼamaʼn qa a ajKawil aju ok qʼoʼn toj twitzikʼ Daniel. Xi tqʼamaʼn kye t-apóstol qa kpol jun qʼij jatumel kbʼel qʼuqeʼ toj tqʼuqbʼil «in qoptzʼaj» ex qa ax ikx kye at kyoklen tiʼj jun kʼloj xjal aʼyeju nya nim (nya bʼampo) kybʼaj che kawil ttxlaj (Mateo 19:28). Ok tqʼoʼn tbʼi kʼloj lu te: «Nikʼxi kybʼete», moqa nya nim kybʼete. Ax ikx yolin kyiʼj «txqantl» ẍneʼl, moqa rit, aʼyeju mitiʼ (tiloʼ) kyoklen tiʼj kʼloj che kawil tukʼe (Lucas 12:32; Juan 10:16).

2. Ok kjel tkyaqil toj tbʼanel tuʼn tKawbʼil Dios. Tqʼama Jesús qa ok kʼelel tiʼn tKawbʼil Dios aju mas nimaq nya bʼaʼn: aju ok tbʼinchaʼn Satanás tiʼj tbʼi Dios. ¿Alkye tten kbʼantel tuʼn? Ok kbʼel t-xjansaʼn, moqa kbʼel t-saqin tbʼi Dios tiʼj tkyaqil nya bʼaʼn o tzaj qʼamaʼn tiʼj atxix tej tkubʼ bʼinchaʼn il toj Edén (Mateo 6:9, 10). Ax ikx kubʼ tyekʼun Jesús qa tjaqʼ Kawbʼil lu miʼn tentl ikʼbʼil tiʼj kyxilen moqa kyyajil xjal, quʼn xi tqʼoʼn xnaqʼtzbʼil kye xinaq, moqa ichan, kye xuʼj, kye qʼinin, kye mebʼa ex mitiʼ kubʼ tyekʼun qa at mas toklen jun twitz juntl. Tzaj samaʼn Jesús tuʼn tpakbʼan kye aj Israel, naqtzun tuʼnj, ok tilil tuʼn, tuʼn tonin kyiʼj qe xjal te Samaria ex kyiʼj qe xjal te txqantl tnam. Junxitl te Jesús kywitz qeju nejenel kyoj okslabʼil (nimbʼil) toj ambʼil aju, aʼyeju oʼkxtaq in che ximin tiʼj kyxilen xjal.

3. Aju tKawbʼil Dios nya te twitz Txʼotxʼ. Anqʼin Jesús toj jun nya bʼaʼn ambʼil toj tnam Israel, tuʼnju tokxtaq tnam lu tjaqʼ tkawbʼil juntl tnam. Naqtzen tuʼnj, mitiʼ xi tqʼoʼn ambʼil tuʼn tokx qʼoʼn kyxol ajkawil (Juan 6:14, 15). Tej tyolin tukʼil jun ajkawil, tqʼama jlu: «Aju nkawbʼile mya te twitz txʼotxʼ» (Juan 18:36). Ex xi tqʼamaʼn jlu kye qeju lepchiqeʼk tiʼj: «Mya te twitz txʼotxʼ qeye» (Juan 15:19). Ax ikx mitiʼ xi tqʼoʼn ambʼil kye tuʼn tjaw kyiʼn kʼuxbʼil tuʼn kyqʼojin, nixpe tuʼn kykolin tiʼj (Mateo 26:51, 52).

4. Ok kkawil Jesucristo tukʼe kʼujlabʼil. Tzaj ttziyen Jesús qa che xel tonin qeju lepchiqeʼk tiʼj tukʼe kyiqetz (Mateo 11:28-30). Ik bʼantju tuʼn. Xi tqʼoʼn tbʼanel nabʼil kye tiʼj tuʼn miʼn ttzaj bʼaj kykʼuʼj, tiʼj qʼinumabʼil, tiʼj kymod ktel kyukʼil txqantl, ex tiʼj alkye tten jaku che tzalaj (Mateo, capítulos 5 a 7). Attaq tkʼuʼj kyiʼj xjal ex nya kwesttaq tuʼn kyyolin xjal tukʼil. Alkyexku xjal jakutaq pon tukʼil axpe ikx aju nya nim toklen, tuʼnju qʼuqlitaq kykʼuʼj qa ok che okel bʼiʼntaq tuʼn ex qa nimtaq kyoklen toj twitz. ¿Alkye jun nya taj (nya tgan) jun kawil ik tzeʼn jlu?

Tuʼn tkubʼ tyekʼun Jesús aju kbʼantel tuʼn tKawbʼil Dios, ax ikx bʼant nim milagro tuʼn. ¿Tiʼ mastl kubʼ tyekʼun Jesús kyukʼe milagro bʼant tuʼn? Qo xnaqʼtzal tiʼj.

(Atz xjatz iqʼet toj uʼj te Mateo, Marcos, Lucas ex Juan.)