AJU uʼj mas nim tqan toj Tyol Dios tkuʼx nimku (bʼampo) bʼitz xjan toj aju xi tiʼn junlo mil abʼqʼi tuʼn kybʼaj chmet. Aʼyeju e kubʼ bʼinchante e yolin tiʼj nimxix qʼuqbʼil kykʼuʼj tukʼe tbʼanelxix yol. Ax ikx kux kyqʼoʼn chʼixme tkyaqilju in tnaʼn jun xjal, ik tzeʼn tzalajbʼil, kʼixkʼej, nimsabʼil, bʼis ex junjuntl. Kykyaqil xjal lu kʼujlaʼntaq Dios kyuʼn ex in kynaʼntaq qa ateʼktaq ttxlaj. Qo xnaqʼtzan tiʼj junjun xnaqʼtzbʼil tkuʼx toj uʼj te Salmos.

At toklen Jehová, aju Kawil Nimxix Toklen tibʼaj tkyaqil, tuʼn tjaw qnimsaʼn. In tzaj tqʼamaʼn Salmo 83:18 jlu: ‹Oʼkx aya Jehová, ex oʼkx aya Dios Maʼxix Toklen tibʼaj tkyaqil twitz txʼotxʼ›. * At nim bʼitz in jaw kynimsaʼn Jehová tuʼnju o kubʼ tbʼinchaʼn kyaʼj, qe cheʼw, jun tbʼanelxix t-xmilal xjal ex o tzaj tqʼoʼn kychwinqlal xjal ex txkup twitz Txʼotxʼ (Salmos 8, 19, 139 ex 148). At nim bʼitz in jaw nimsaʼn Jehová kyuʼn tuʼnju in xqʼuqen ex in kolen kyiʼj qeju kukx in che ajbʼen te (Salmos 18, 97 ex 138). Ex junjuntl in che bʼitzen te tuʼnju jun Dios tzʼaqlexix te aju in nonin kyiʼj qeju in nok bʼinchaʼn nya bʼaʼn kyiʼj ex in kubʼ tqʼoʼn kykastiw qeju nya bʼaʼn xjal (Salmos 11, 68 ex 146).

In nonin Jehová kyiʼj qeju at kykʼuʼj tiʼj ex in tzaj tqʼuqbʼaʼn kykʼuʼj. Jaku txi qʼamet qa aju Salmo 23 mas ojtzqiʼnxix, atz jatumel in kubʼ tmojbʼaʼn David qTat toj kyaʼj tukʼe jun xqʼuqel ẍneʼl, moqa rit, aju at tkʼuʼj kyiʼj, in xi tyekʼun kybʼe ex in che ok t-xqʼuqen. Toj Salmo 65:2 in tzaj naʼn jlu qe tiʼj Jehová: «In tbʼiʼna aju qnaʼj Diose». Axpe ikx qeju o kubʼ kybʼinchaʼn nim nya bʼaʼn in kanet qʼuqbʼil kykʼuʼj toj Salmo 39 ex 51, atz jatumel in tzaj tyekʼun David qa ax tok (bʼaʼn ax) otaq tzʼajtz tiʼj tanmi tiʼj til ex qa qʼuqlitaq tkʼuʼj qa kbʼeltaq tnajsaʼn Dios til. Ex in qo tzaj tonin Salmo 55:22 tuʼn tok qeʼ qkʼuʼj tiʼj Jehová ex tuʼn t-xi qqʼoʼn ambʼil te tuʼn qtzaj tonin kyukʼe qiqetz.

Ok kajbʼel tKawbʼil Mesías tuʼn Jehová tuʼn tok Txʼotxʼ te jun tbʼanel najbʼil. Nim in che yolen Salmo tiʼj Mesías, aju Kawil tziyen maj. Jun techel, kyaj qʼamaʼn toj Salmo 2 qa kbʼel twabʼen Kawil lu alkyexku tnam xjaw weʼ tiʼj. In tzaj qʼamaʼn toj Salmo 72 qa kʼelel tiʼn waʼyij, aju nya tzʼaqle ex tkyaqil nya bʼaʼn in nok bʼinchen kyiʼj xjal. In tzaj tqʼamaʼn Salmo 46:9 qa ok kajbʼel tKawbʼil Mesías tuʼn Dios tuʼn tweʼ tkyaqil qʼoj ex tuʼn tkubʼ tbʼuchen tkyaqilju in najbʼen kyuʼn xjal toj qʼoj. Ax ikx toj Salmo 37 in tzaj qʼamaʼn qa miʼn che tentl nya bʼaʼn xjal toj Tbʼanel Najbʼil ex qa ok che anqʼil tbʼanel xjal te jun majx (junelex) toj mojbʼabʼil.

(Atz xjatz iqʼet toj uʼj te Salmos.)