XI QʼIʼN Daniel, aju jun qʼa in najbʼentaq te Dios, te majen toj Babilonia tej chʼixtaq tkubʼ xitin Jerusalén. Otaq chex qʼiʼn Daniel ex txqantl aj Israel te majen, naqtzun tuʼnj, attaq chʼin tzaqpibʼil kye. Toj tkyaqil ambʼil tej tanqʼin Daniel toj tnam Babilonia, kukx onin Dios tiʼj. Axpe ikx, kolin tiʼj tej tkux qʼoʼn toj kyjul león ex tzaj tqʼoʼn ambʼil te tuʼn tok tqʼoʼn twitz tiʼjju kbʼajel toj ambʼil tzul. Aʼyeju yol nimxix kyoklen kyaj ttzʼibʼin Daniel at kyoklen tiʼj Mesías ex tiʼj tKawbʼil.

Aju ambʼil aj tul Mesías. ¿Jniʼ ambʼil kbʼeltaq tayoʼn ttnam Dios tuʼn tul aju «Nejenel aju ktzajel qʼoʼn toklen», moqa Mesías? Tzaj qʼamaʼn te Daniel qa tzultaq aj tikʼ 69 seman te abʼqʼi atxix tej tetz qʼamaʼn tuʼn kyjaw bʼinchet tmuro Jerusalén. Qa at wuq qʼij toj jun seman, at wuq abʼqʼi toj jun seman te abʼqʼi. Etz qʼoʼn kawbʼil tuʼn kyjaw bʼinchet tmuro Jerusalén toj abʼqʼi 455 tjaqʼxi ambʼil iqʼen quʼn jaʼlo (jaʼla) tej otaqxi bʼet ambʼil tej tanqʼin Daniel. Qa ma tzaj qajlaʼn 69 «seman» —toj juntl yol, aju 483 abʼqʼi—, tiʼj abʼqʼi 455 in qo pon tiʼn tiʼj abʼqʼi 29 tiʼj ambʼil iqʼen quʼn jaʼlo. ¿Tiʼ ikʼ toj ambʼil aju? Ok kʼelel qnikʼ tiʼj yajxitl. Ax ikx tzaj yekʼun te Daniel qa kbʼeltaq «bʼyoʼn» Mesías, tuʼn tchjet kyil xjal (Daniel 9:24-26).

Oktaq kʼokel Mesías te Kawil toj kyaʼj. Toj jun tbʼanelxix witzikʼ, ok tqʼoʼn Daniel twitz tiʼj jun «ik keʼyin ik tzaʼn jun xjal» —ataq Mesías—, in pon laqʼeʼtaq twitz tqʼuqbʼil Dios toj kyaʼj. Xitzun tqʼoʼn Jehová «ipumalj, ajwalil ex kawbil» te, aju jun kawbʼil mitiʼ (tiloʼ) bʼajsbʼilte. Ax ikx ok tbʼiʼn Daniel juntl tbʼanelxix tqanil tiʼj tKawbʼil Mesías: aju Kawil lu ok kkawiltaq tukʼil jun kʼloj xjal aju ok qʼoʼn kybʼi «qe xjal etzan tuʼn Dios maʼxix toklen» (Daniel 7:13, 14, 27).

Kbʼel tnajsaʼn Kawbʼil lu kykyaqil qe kykawbʼil xjal. Onin Dios tiʼj Daniel tuʼn t-xi tqʼamaʼn tiʼ t-xilen jun witzikʼ aju in tzaj bʼajtaq tkʼuʼj Nabucodonosor tuʼn, aju ajkawil te Babilonia. Otaq tzʼok qʼoʼn jun tilbʼilal nim tweʼ toj twitzikʼ Nabucodonosor, aju twiʼ tilbʼilal lu qʼan pwaq ttxʼotxʼil, aju ttzi t-xuʼk ex qe tqʼabʼ saq pwaq kytxʼotxʼil, aju tkʼuʼj ex qe tkux qʼan kʼuxbʼil kytxʼotxʼil, qe twitz tqan kʼuxbʼil kytxʼotxʼil ex qe tqan, kʼuxbʼil kytxʼotxʼil smoʼn tukʼil txʼotxʼ. Tzaj tolj jun abʼj tiʼj jun witz ex pon tzʼaq kyiʼj tqan tilbʼilal aju mitiʼxix kyipun ex kubʼ quqix tuʼn. Xi tqʼamaʼn Daniel te ajkawil qa aju twiʼ tilbʼilal qʼan pwaq ttxʼotxʼil in kubʼ qʼoʼn te techel Babilonia, ex qa aʼyeju txqantl plaj tiʼj tilbʼilal in kubʼ qʼoʼn te kyechel txqantl nimaq kawbʼil che ultaq yajxitl. Oktaq kxel tzyet tuʼn taqʼunan tKawbʼil Dios toj ambʼil te mankbʼil, moqa último, nimaq kawbʼil —qe tqan tilbʼilal, kʼuxbʼil kytxʼotxʼil smoʼn tukʼil txʼotxʼ— ex che kbʼel tbʼuchin kykyaqil kawbʼil twitz tkyaqil Txʼotxʼ. Yajxitl oktaq kykawil te jun majx (juneleʼx) twitz tkyaqil txʼotxʼ (Daniel, capítulo 2).

Ok tqʼoʼn Daniel twitz tiʼj tej tkubʼ tiʼj Babilonia tuʼnju anqʼin nim ambʼil. Ik tzeʼn otaq kyaj qʼamaʼn, kubʼ tiʼj tnam Babilonia tuʼn kawil aju Ciro tbʼi. Yajxi chʼintl, tojxix ambʼil tej tjapun setenta abʼqʼi tkubʼlen xitin ttnam Daniel, i etz tzaqpiʼn aj Israel. Jaw bʼinchaʼn juntl maj tnam Jerusalén ex aju tja Jehová tukʼe onbʼil tzaj kyqʼoʼn nim (bʼampo) ajkawil, qe pal ex qe t-sanjel Dios. Naqtzen tuʼnj, ¿tiʼ bʼaj tej tikʼ 483 abʼqʼi aju kyaj qʼamaʼn?

(Atz xjatz iqʼet toj uʼj te Daniel.)