TEJ tzmataq tikʼlen chʼin ambʼil telen tpan tibʼ Salomón tiʼj Jehová, e kubʼ paʼn aj Israel te kabʼe kawbʼil teyelex te junjun tukʼe tkawil, ik tzeʼn otaq tzaj tqʼamaʼn Jehová. Aju oktl te ajkawil, Rehoboam tbʼi, kyuwxixtaq kyukʼe aj Israel, tuʼntzen jlu, el kypan kyibʼ qeju lajaj kʼloj aʼyeju ateʼtaq jawni te Israel. Aʼyeju kabʼetl kʼloj kyyajil aj Israel kukx okx kyqʼon kyibʼ tjaqʼ tkawbʼil David toj Jerusalén e kyaj ten tjaqʼ kawbʼil te kubʼni te Judá.

Tuʼnju mitiʼ (tiloʼ) e nimen qe ajkawil te Jehová ex mitiʼ ok qʼuqeʼ kykʼuʼj tiʼj, nijun kawbʼil ten nim ambʼil toj mojbʼabʼil ex toj tbʼanel. Aju kawbʼil mas nya bʼaʼn ten aju kyaj ten jawni te Israel, quʼn atxix tej t-xi tzyet kawbʼil ok tilel kyuʼn ajkawil tuʼn kyajbʼen aj Israel te junjuntl dios. Xi t-samaʼn Dios qe t-sanjel ik tzeʼn Elías ex Eliseo —axpe ikx e jaw anqʼin kyimni kyuʼn—, naqtzen tuʼnj, mitiʼ xi kybʼiʼn aj Israel aju xi qʼamaʼn kye. Yajxitl, xi tqʼoʼn Dios ambʼil kye aj Asiria tuʼn tkubʼ kyiʼj aj Israel kyuʼn.

Tej tikʼ mas jun syent abʼqʼi, aju kawbʼil te kubʼni te Judá ax ikx kubʼ tqʼoʼn Dios tkastiw. Xi kyqʼamaʼn t-sanjel Dios kye kawil tiʼtaq kbʼajel, naqtzen tuʼnj, junjunx xi kybʼiʼn ex ok tilel kyuʼn tuʼn kyonin kyiʼj xjal tuʼn tkubʼ kybʼinchen aju bʼaʼn. Jun techel, ok tilel tuʼn ajkawil Josías tuʼn tkubʼ naj aju nimbʼil in xi qʼet kye tilbʼilal ex bʼaj tbʼinchen chʼintl tja Jehová. Tej in noktaq aqʼuntl, jatz kanet tuʼjil Ley tzaj tqʼoʼn Dios te Moisés. Jaw tzalaj Josías tuʼn jlu ex okxix tilel tuʼn, tuʼn miʼn kynimentl xjal kywitz junjuntl dios.

Naqtzen tuʼnj, bʼisbʼajilxix tuʼnju tej tkyim Josías mitiʼtl e ok lepeʼ qeju txqantl ajkawil tiʼj techel kyaj tqʼoʼn. Tuʼntzunju xi tqʼoʼn Jehová ambʼil kye aj Babilonia tuʼn tkubʼ tiʼj Judá kyuʼn ex tuʼn tkubʼ kyxiten tnam Jerusalén ex aju ja te nabʼil Dios. Aʼyeju e kyaj anqʼin i ex iqʼen te majen toj tnam Babilonia, ex tzaj tqʼamaʼn Dios qa oktaq kʼikʼel setenta abʼqʼi tuʼn kyul meltzʼaj toj kytxʼotxʼ. Toj ambʼil aju, mi aʼlxtaq jun kjel ten toj tnam Judá.

Tzmaxitaq aj tul aju kawil tziyen maj —aju Mesías—, mi aʼltaq jun tyajil David kʼokel te kawil. Chʼixmi kykyaqil ajkawil tzajniqeʼ tiʼj tyajil David kubʼ kyyekʼun tukʼe kybʼinchbʼen qa mitiʼ e kubʼ bʼinchaʼn xjal tuʼn kykawin kyibʼaj txqantl. Oʼkx Mesías jakutaq bʼant-xix tkawin. Kyjuʼtzun, tqʼama Jehová jlu tiʼj Mesías: «Kkawil kyibʼaj tiyjil Jacob te jumajx; ex aju tkawbʼil mintiʼ bʼajsbʼil te» (Lucas 1:33).

(Atz xjatz iqʼet toj 1 Reyes 2 Reyes, toj 2 Crónicas capítulo 10 a 36 ex Jeremías 25:8-11.)