TEJ atxtaq nim (bʼampo) syent abʼqʼi tuʼn kyokx aj Israel toj Canaán, xi tqʼamaʼn Jehová te Abrahán qa oktaq kxel tqʼoʼn txʼotxʼ te Canaán kye tyajil. Atzen jaʼlo (jaʼla) chʼix kyokx aj Israel toj Txʼotxʼ tzaj Tziyen kye, a Josué nejni kubʼ kywitz.

Bʼaj t-ximen Dios qa iltaq tiʼj tuʼn kykubʼ najset kykyaqil xjal te Canaán, tuʼnju nimtaq che bʼiyen ex nimtaq nya bʼaʼn in kubʼ kybʼinchen. Tuʼntzunju, xi tqʼamaʼn kye aj Israel tuʼn kykubʼ kynajsaʼn kykyaqil qe tnam te Canaán.

Naqtzen tuʼnj, tej naʼmxtaq tok tzoqpaj Josué kyiʼj tnam, tnejel xi t-samaʼn kabʼe xjal tuʼn tok kyqʼoʼn kywitz tiʼj tnam. E okx xjal lu toj tnam te Jericó ex e pon tja jun xuʼj Rahab tbʼi. Ojtzqiʼntaq tuʼn xuʼj lu qa aj Israelqetaq xjal lu, naqtzun tuʼnj, xi tqʼoʼn ambʼil kye tuʼn tokx kyewin kyibʼ toj tja. ¿Tiquʼn? Tuʼnju otaq tbʼi aju otaq bʼant tuʼn Jehová tuʼn tkolen tiʼj ttnam ex otaq tzʼok qʼuqeʼ tkʼuʼj tiʼj Jehová. Xi tqʼamaʼn Rahab kye qeju kabʼe xjal ex samaʼn tuʼn t-xi kytziyen te tuʼn miʼn tkubʼ bʼiyoʼn kyuʼn nix qe toj tja aj tkubʼ tiʼj tnam.

Yajxitl, e okx aj Israel toj Canaán ex e ok tzoqpaj tiʼj Jericó. E kubʼ tzʼaq tmuro tnam tuʼn Jehová ex kubʼ kynajsaʼn soldad tnam, atzente Rahab kyukʼex toj tja e kyaj anqʼin. Iktzun tten xi tzyet waqaq abʼqʼi tuʼn tkubʼ kyiʼj tnam tuʼn Josué ex qe t-soldad, atz jatumel tzyet chʼixme tkyaqil Txʼotxʼ tzaj Tziyen kye. Yajxitl, aju txʼotxʼ otaq kubʼ tiʼj kubʼ paʼn kyxol aj Israel.

Pon jun qʼij jatumel e ok tchmoʼn Josué kykyaqil aj Israel, tej chʼixtaq tkyim. Xi tnaʼn kye aju otaq bʼant tuʼn Dios tuʼn tonin kyiʼj kyxeʼchel ex xi tqʼamaʼn kye tuʼn kukx kyajbʼen te Dios. Naqtzen tuʼnj, tej tkyim Josué ex qe tukʼe, el kypan kyibʼ aj Israel tiʼj Jehová ex e ok ten kʼulul kywitz junjuntl dios nya ax tok (nya bʼaʼn ax). Kyoj qeju oxe syenttl abʼqʼi e ikʼ, mitiʼ (tiloʼ) okx kybʼiʼn qe tkawbʼil Jehová toj nimku maj. Tej mitiʼtaq in xi kybʼiʼn tkawbʼil Jehová, in chextaq tqʼoʼn Jehová toj kyqʼabʼ qe xjal te Filistea ex txqantl ajqʼoj. Naqtzun tuʼnj, aj t-xi kyqanintaq onbʼil, in tzajtaq tqʼoʼn qMan Dios jun tzaqpil kye. E ten kabʼlaj tzaqpil lu ex jwestaq kybʼi.

In yolin uʼj te Jueces tiʼj ambʼil tej kyten jwes. In tzaj tzyet tuʼn tyolin tiʼj jwes Otniel ex in pon bʼaj tuʼn tyolin tiʼj jwes Sansón, aju xjal mas nim tipumal (tbʼalor) o ten tzalu twitz Txʼotxʼ. Aju tbʼanelxix txʼolbʼabʼil in yolen uʼj te Jueces tiʼj at jun xnaqʼtzbʼil nimxix toklen tkuʼx toj: aju qa ma tzʼokx qbʼiʼn Jehová, tbʼanel kʼelel tkyaqil toj qanqʼibʼil; qa mitiʼ sokx qbʼiʼn, tzul nya bʼaʼn qiʼj.

(Atz xjatz iqʼet toj Josué, Jueces ex Levítico 18:24, 25.)