OTAQ tzikʼ oxe abʼqʼi tukʼe mij, moqa nikʼjan, in pakbʼantaq Jesús ex ojtzqiʼntaq tuʼn qa chʼixtaq tbʼaj tchwinqlal tzalu twitz Txʼotxʼ. In kubʼtaq kyximen nejenel kye okslal (nimel) kyxol Judiy tuʼn tkubʼ kybʼiyoʼn, naqtzen tuʼnj, in che xobʼtaq kywitz xjal, quʼn jun t-sanjeltaq Dios toj kywitz. Kux tqʼoʼn Satanás toj tanmi Judas —jun kyxol qeju kabʼlaj t-apóstol Jesús— tuʼn t-xi tkʼayen aju xnaqʼtzalte. Xi kychjoʼn nejenel kye okslal treinta saq pwaq (tumi) te Judas.

Toj qonikʼan te Xjan Qʼij, ok tchmon tibʼ Jesús kyukʼe apóstol tuʼn tkubʼ kyikʼsaʼn Xjan Qʼij. Tej otaq txi tqʼamaʼn Jesús te Judas tuʼn tex bʼet, kyaj bʼant tiʼj jun akʼaj ikʼsabʼil tuʼn: aju Wabʼj te Qale te Jesús. Jaw tiʼn jun piẍ pan, naʼn Dios ex xi tqʼoʼn kye qeju junlaj apóstol. Ex xi tqʼamaʼn jlu kye: «Atzin wejiʼy nxmilil lo, a kxel qʼoʼn tuʼn tkyim, noq tuʼn kykleta. Kybʼinchim kyejiʼy lo, noq te naʼbʼl weʼy». Axju bʼant tuʼn tukʼe jun vas vino ex tqʼama: «Ajo kʼwabʼj lo, atzin jun akʼaj tumiljo, a bʼantnin tiʼj tuʼn Dios, tuʼn kykyijxjal toj wen tukʼa. Ajo nchkyʼela, a k-elil chitj te kolbʼil kyeʼy, atzin k-okiljo te kujsbʼilte yol anetziʼn» (Lucas 22:19, 20, Akʼaj Tuʼjil Tyol qMan).

Toj junxtl qonikʼan aju, xi t-xnaqʼtzaʼn Jesús nimku (bʼampo) tiʼchaq kye t-apóstol. Axpe ikx xi tqʼoʼn jun akʼaj kawbʼil kye: aju tuʼn tok kykʼujlan kyibʼ naq kukx. Tqʼama jlu: «Qa ma kykʼujla kyibʼe kyxolxe, tuʼntzun jlu kʼelel kynikʼ kykyaqil xjal kyiʼje qa nxnaqʼtzbʼen qeye» (Juan 13:34, 35). Xi tqʼamaʼn kye tuʼn miʼn ttzaj bʼajxix kykʼuʼj tuʼnju chʼixtaq ttzaj tiʼj, ex ok tenxix naʼl Dios kyiʼj. Tej tbʼant tkyaqil jlu, e ok ten bʼitzel te nimsabʼil Dios ex i eʼx toj tbʼanel najbʼil Getsemaní tbʼi.

Kubʼ mejeʼ Jesús toj tembʼil aju ex xi tqʼamaʼn tkyaqilju tkuʼx toj tanmi te Jehová. Naqtzen tuʼnj, naq minabʼen, e pon jun kʼloj soldad bʼantni kyten tuʼn kyqʼojen ex qe pal aʼyeju kyajtaq (kygantoq) tuʼn t-xi kyiʼn Jesús. Tuʼn tel nikʼ tiʼj Jesús, ajbʼen techel tuʼn Judas aju otaq kyaj bʼant tiʼj tuʼn kyukʼe ajqʼoj: aju jun tzʼubʼj (maʼtzj). Xi iqʼen Jesús kyuʼn soldad ex i el oq apóstol.

Xi tqʼamaʼn Jesús kywitz jwes aʼyeju mas nim kyoklen kyxol judiy qa tKʼwaʼl (tkyʼajol) Diostaq te. Kubʼ kyximen qe jwes qa jun nya bʼaʼn yol jlu tiʼj Dios, jun il aju jakutaq kubʼ qʼoʼn t-sentens tiʼj tuʼn tkyim. Pontzun qʼiʼn Jesús twitz Poncio Pilato, aju at toklen tuʼn ajkawil te Roma. Mitiʼ (tiloʼ) kanet jun til Jesús tuʼn, naqtzen tuʼnj, xi tqʼoʼn ambʼil te kyajbʼil xjal aʼyeju in che ẍchʼintaq tuʼn tkubʼ bʼiyoʼn Jesús.

Xi iqʼen Jesús toj jun tembʼil Gólgota tbʼi, atztzun jaw qʼoʼn twitz jun tzeʼ kyuʼn soldad te Roma. Naq minabʼen ok yupj qʼij twitz kyaʼj. Te qale aju, tej tkyim Jesús, tzaj jun kyaqnajnabʼ nimxix. Okx muquʼn t-xmilal Jesús toj jun jul bʼinchaʼnkx toj pik ex, toj juntl qʼij, ok kyjupuʼnxix qe pal ttzi jul ex e kubʼ kyqʼoʼn xqʼuqel ttziʼ. ¿Atzpetzele kjel tentaq te jun majx? Nya, quʼn chʼixtaq tikʼ jun tiʼ nimxix toklen.

(Atz xjatz iqʼet toj capítulo 26 ex 27 te Mateo, toj capítulo 14 ex 15 te Marcos, toj capítulo 22 ex 23 te Lucas ex kyoj capítulo 12 a 19 te Juan.)