¿TZEʼNWTLE kyanqʼibʼil xjal toj jun tnam naqwit kykyaqil xjal ex aju ajkawil kukx in che ajbʼen te Jehová ex kukx in noqx kyqʼon kyibʼ tjaqʼ tkawbʼil? Aju tkawbʼil Salomón, aju ten 40 abʼqʼi, in tzaj tqʼoʼn tzaqʼwebʼil te jlu.

Tej naʼmxtaq tkyim David, ok tqʼoʼn toklen Salomón aju tkʼwaʼl (tkyʼajol) tuʼn tkawin. Pon jun qʼij jatumel kubʼ tyekʼun tibʼ Dios twitz Salomón toj jun witzikʼ ex tzaj tqʼamaʼn te tuʼn t-xi tqanin alkyexku taj (tgan). Aju qʼa ajkawil lu xi tqanin tnabʼil ex tojtzqibʼil tuʼn tbʼant tkawin toj tumelxix. Tbʼanel ela toj twitz Jehová aju xi tqanin, ex tzaj tqʼoʼn aju otaq txi tqanin. Ax ikx tzaj tqʼamaʼn te qa kukx sokx tbʼiʼn, ax ikx oktaq tzul qʼoʼn tqʼinumabʼil, toklen ex nim toj tanqʼibʼil.

Ok ojtzqiʼnxix Salomón tuʼnju attaq tnabʼil. Toj jun maj, e pon kabʼe xuʼj twitz aʼyeju in kyqʼamaʼntaq qa aʼye tnan jun tal neʼ (neʼẍ). ¿Tiʼ bʼant tuʼn Salomón? ¡Xi tqʼamaʼn tuʼn tkubʼ txʼemin tmij (tkyʼajchaqil) tal neʼ! Bʼaʼn ela toj twitz tnejel xuʼj, atzun tkabʼ lwey naj xi tqʼamaʼn tuʼn t-xi qʼoʼn te tnejel xuʼj. Iktzun tten el tnikʼ Salomón qa aju tkabʼ xuʼj ataq axix tok (bʼaʼn ax) tnan tal neʼ. Tej tok kybʼiʼn tnam xjal jlu, el kynikʼ qa otaq tzaj tqʼoʼn Dios tnabʼil Salomón.

Jun kyxol qeju tbʼanelxix bʼant tuʼn Salomón aju matijxix ja jaw tbʼinchaʼn te Jehová toj Jerusalén, ajbʼen ja lu tuʼn tjaw nimset axix tok Dios toj tnam Israel. Tej tok ninqʼij tuʼnju otaq bʼant ja, ok tqʼoʼn Salomón jun naʼj Dios jatumel xi tqʼamaʼn jlu te Jehová: «¿Axpelo tok jaku najan Dios twitz txʼotxʼ? Ik tzaʼn ju kyaʼj maʼxix wen ex mintiʼ in kanun tuʼn tten Dios tuj, pyortzun teju ja lu, aju ma jaw nbʼinchaʼne, mlaylo kanun tuʼn tten Dios tuj» (1 Reyes 8:27).

Ok ojtzqiʼnxix twitz Salomón kyuʼn xjal, quʼn bʼinjtz tqanil tiʼj kyoj junjun tembʼil aʼyeju ateʼtaq najchaq, moqa laqʼche, ik tzeʼn Seba (moqa Saba) te tnam Arabia. Aju xuʼj kawil te tnam aju pon toj tnam Israel tuʼn tokxix tqʼoʼn twitz tiʼj toklen ex tqʼinumabʼil Salomón, ax ikx tuʼn tok tnabʼil Salomón tuʼn toj malbʼil. Tbʼanelxix ela tkyaqil jlu toj twitz axpe ikx jaw tnimsaʼn Jehová tuʼnju otaq jaw tjyoʼn jun kawil at-xix tnabʼil. Tuʼnju tzaj kʼiwlaʼn tkawbʼil Salomón tuʼn Jehová, ten mas kyqʼinumabʼil aj Israel tjaqʼ tkawbʼil ex mas e ten toj tzalajbʼil.

Naqtzun tuʼnj, bʼisbʼajilxix tuʼnju nya toj tkyaqil ambʼil xi tqʼoʼn Salomón ambʼil te Dios tuʼn tzaj tyekʼun tbʼe. Jun techel, otaq tzaj tqʼamaʼn qMan Dios tuʼn miʼn tten nim kyxuʼjil ajkawil, naqtzen tuʼnj, kubʼ mojeʼ Salomón kyukʼe nimku syent xuʼj ex nya oʼkxju, axpe ikx nimku kyxol qe xuʼj lu in che ajbʼentaq kye junjuntl dios. Tuʼn jlu, chebʼe ex chebʼe el tpan tibʼ Salomón tiʼj Jehová ex kubʼ tkʼuʼj kyuʼn xuʼj lu tuʼn tkʼulin kywitz tilbʼilal. Tuʼntzunju, tzaj tqʼamaʼn Dios te qa oktaq kʼelel qʼiʼn chʼixme tkyaqil kawbʼil kye toj tja. Naq oʼkx tuʼnju otaq tzaj ttziyen Dios te David mlaytaq tzʼel qʼiʼn tkyaqil kawbʼil te. El tpan tibʼ Salomón tiʼj Jehová, naqtzun tuʼnj, kukx japun bʼaj twiʼ tyol Jehová aju kyaj bʼant tiʼj tuʼn tukʼe David.

(Atz xjatz iqʼet kyoj capítulo 1 a 11 te 1 Reyes, kyoj capítulo 1 a 9 te 2 Crónicas ex toj Deuteronomio 17:17.)