Kubʼ tbʼinchaʼn Jehová Adán ex Eva ex xi tqʼoʼn ambʼil kye tuʼn kyanqʼin te jun majx toj Tbʼanel Najbʼil. Tqʼama Satanás nya bʼaʼn yol tiʼj tbʼi Dios ex tqʼama qa mitiʼ toklen tuʼn tkawin. Ok tmojbʼan tibʼ Adán ex Eva tukʼe Satanás, iktzun tten kyaj kyqʼoʼn il ex kamik kyibʼaj xjal

Tzaj tqʼamaʼn Dios kysentens qeju el kypan kyibʼ tiʼj ex tzaj ttziyen qa kbʼel najsaʼn Satanás tuʼn jun Tyajil xuʼj ex qa kʼelel tiʼn nya bʼaʼn tzaj tuʼn il ex kyuʼn qeju mitiʼ e bʼin

Tzaj ttziyen Dios te Abrahán ex te David qa che okel te t-xeʼchel Tyajil xuʼj, aju Mesías kkawil te jun majx

Tzaj tqʼamaʼn Jehová kye t-sanjel qa ok kʼelel tiʼn Mesías il ex kyimen ex qa ok kʼokel te Ajkawil toj tKawbʼil Dios. Ax ikx che kawil jun kʼloj xjal tukʼil, ex kʼelel kyiʼn qʼoj, yabʼil ex kamik

Tzaj tqʼamaʼn Jehová qa a Jesús Mesías. A tzaj samante tzalu twitz Txʼotxʼ tuʼn t-xi tpakbʼaʼn tKawbʼil Dios ex tuʼn t-xi tqʼon tibʼ tuʼn tkyim kyiʼj xjal. Tej tkyim, xi tqʼoʼn Jehová juntl maj tchwinqlal ik tzeʼn jun xewbʼaj

Xi tqʼoʼn Dios toklen Jesucristo te Ajkawil toj kyaʼj, ex tzaj tzyet bʼajsbʼil tqʼijlal nya bʼaʼn in bʼaj twitz Txʼotxʼ. In che tzaj tonin Jesús qeju lepchiqeʼk tiʼj tuʼn t-xi kypakbʼaʼn tKawbʼil Dios twitz tkyaqil Txʼotxʼ

Xi tqʼamaʼn Jehová te tKʼwaʼl tuʼn t-xi tzyet tuʼn tkawin tibʼaj Txʼotxʼ. Kbʼel tnajsaʼn Kawbʼil lu aju kykawbʼil xjal, kʼokel juntl maj Txʼotxʼ tuʼn te Tbʼanel Najbʼil ex che okel juntl maj tbʼanel xjal tuʼn te tzʼaqli. Mlayx tzaj qʼamaʼn juntl maj qa mitiʼ toklen Jehová tuʼn tkawin, ex kʼokel tbʼi te xjan ex saq te jun majx