AʼYEJU tnejel okslal attaq jun tbʼanel kyaqʼun aju at toklen tukʼeju tuʼn tjapun twiʼ t-xim Jehová. Naqtzun tuʼnj, ok bʼinchaʼn nim nya bʼaʼn kyiʼj axpe ikx tzaj nya bʼaʼn kyxolx. ¿Tiʼ onin kyiʼj tuʼn kukx kyajbʼen te Dios? Aʼyeju 21 uʼj e kubʼ tzʼibʼan toj yol griego ok tqʼuqbʼaʼn kykʼuʼj ex xi tqʼoʼn tbʼanel nabʼil kye aju attaq tajbʼen kye.

A Pablo kubʼ tzʼibʼente kyajlaj tnejel uʼj, aju in xi tzyet tiʼj uʼj xi ttzʼibʼen kye okslal te Roma ex in pon bʼaj tiʼj uʼj xi ttzʼibʼen kye aj Hebreo. Kyoj kykyaqil uʼj lu tkubʼ tbʼi aju jatumel xi t-samaʼn apóstol Pablo, qa te jun xjal moqa te jun kʼloj okslal. Qo xnaqʼtzan tiʼj junjun xnaqʼtzbʼil aju yolin apóstol Pablo tiʼj.

Junjun bʼinchbʼen. Aʼye ajpajil, aʼyeju in che yaẍin moqa aʼyeju in kubʼ kybʼinchaʼn junjuntl matij il ex mitiʼ (tiloʼ) in najtz tiʼj kyanmi «mlay che okx tuj tkawbʼil Dios» (Gálatas 5:19-21; 1 Corintios 6:9-11). Mitiʼ tuʼn t-xi kyqʼoʼn tmajen Jehová ambʼil tuʼn kykubʼ paʼn tuʼnju junxitl ttnam jun twitz juntl (Romanos 2:11; Efesios 4:1-6). Il tiʼj tuʼn t-xi kyqʼoʼn chʼin aju at tajbʼen kye kyerman ex tuʼn kyonin kyiʼj (2 Corintios 9:7). In tzaj tqʼamaʼn apóstol Pablo kye okslal tuʼn t-xi kyqʼamaʼn te Jehová tkyaqilju tkuʼx toj kyanmi tej tqʼama: «Miʼn che qʼajene tuʼn kynaʼne Dios» (1 Tesalonicenses 5:17; 2 Tesalonicenses 3:1; Filipenses 4:6, 7). Naqtzen tuʼnj, il tiʼj tuʼn kynaʼn Dios tukʼe qʼuqbʼil kykʼuʼj tuʼn kytzaj bʼiʼn tuʼn Dios (Hebreos 11:6).

¿Alkye kawbʼil xi tqʼoʼn apóstol Pablo kye ja xjal? Aju qa il tiʼj tuʼn tokxix tkʼujlaʼn chmilbʼaj t-xuʼjil ik tzeʼn in nok tkʼujlan tibʼ. Atzunte xuʼjilbʼaj il tiʼj tuʼn tkubʼ tnimen tchmil tuʼn tkyaqil tanmi. Ax ikx taj (tgan) Dios tuʼn t-xi kybʼiʼn kʼwaʼl kytat ex tuʼn t-xi kyqʼoʼn tatbʼaj xnaqʼtzbʼil kye kykʼwaʼl tukʼe kʼujlabʼil ik tzeʼn in tzaj tqʼamaʼn Tyol Dios (Efesios 5:22–6:4; Colosenses 3:18-21).

Aju t-xim Dios. E ok xqʼuqin aj Israel tuʼn tLey Moisés ex xi tyekʼun kybʼe tzmaxi tej tul Mesías tziyemaj, naqtzen tuʼnj, nyataq iltl tiʼj tuʼn tjapun tLey Moisés kyuʼn okslal (Gálatas 3:24). Toj uʼj xi ttzʼibʼen Pablo kye aj Hebreo —aʼye okslal judiy qe—, xi tchikʼbʼaʼn tiquʼn tzaj qʼoʼn Ley ex alkye toklen Jesucristo tuʼn tjapun twiʼ t-xim Dios. Xi tchikʼbʼaʼn qa at nim (bʼampo) tiʼjju tzaj qʼamaʼn toj Ley naq ok te techel aju kbʼajeltaq. Jun techel, aʼyeju alumaj i ex qʼoʼn te chojbʼil e ok te techel tkyimlen Jesús, aju kbʼeltaq tnajsaʼn qil te jun majx (Hebreos  10:1-4). Tuʼntzunju, tej tkyim Jesucristo ok tLey Moisés te mitiʼ tajbʼen (Colosenses 2:13-17; Hebreos 8:13).

Aju alkye tten nukʼuʼn ttnam Dios. Ilxix tiʼj tuʼn tjapun junjun kawbʼil kyuʼn xinaq, moqa ichan, in xi qʼoʼn kyoklen toj ttnam Dios ex ilxix tiʼj tuʼn tbʼant kyuʼn aju in tzaj tqʼamaʼn Tyol Dios (1 Timoteo 3:1-10, 12, 13; Tito 1:5-9). Ax ikx ilxix tiʼj tuʼn tok kychmon kyibʼ tmajen Dios tkyaqil maj tuʼn ttzaj kykʼamoʼn tbʼanelxix xnaqʼtzbʼil tiʼj Tyol Dios ex tuʼn tok kyqʼuqbʼaʼn kykʼuʼj kyxolx (1 Corintios 14:26, 31; Hebreos 10:24, 25).

Tej t-xi ttzʼibʼen Pablo mankbʼil, moqa último, tuʼj —aju tkabʼ uʼj xi ttzʼibʼan te Timoteo— atztaq taʼ juntl maj toj Roma, tokxtaq pres ex in nayontaq tuʼn tok toj xjel. Oʼkx junjun okslal aʼyeju kyqʼon kyibʼ tuʼn kykyim e eʼx visitaril te. Tuʼnju ojtzqiʼntaq tuʼn apóstol Pablo qa chʼixtaq tkubʼ bʼiyoʼn, kubʼ ttzʼibʼen jlu: «Ma tzʼok tililxix wuʼne ik tzaʼn jun soldad tuʼn tkubʼ tiʼj mya bʼaʼn wuʼne, ma japun bʼaj ju wojqelbʼile, ma tzʼok nkwentine ju okslabʼl» (2 Timoteo 4:7). Yajxi chʼintl, kubʼlo bʼiyoʼn. Naqtzun tuʼnj, aʼyeju uʼj xi ttzʼibʼen kukx onin kyiʼj axix tok (bʼaʼn ax) okslal tuʼn kukx kyajbʼen te Dios, ax ikx kukx in che onin toj ambʼil jaʼlo (jaʼla).

(Atz xjatz iqʼet toj Romanos, 1 Corintios, 2 Corintios, Gálatas, Efesios, Filipenses, Colosenses, 1 Tesalonicenses, 2 Tesalonicenses, 1 Timoteo, 2 Timoteo, Tito, Filemón ex Hebreos.)