TEJ otaq kyim Sansón, anqʼin jun jwes ex t-sanjel Dios kyxol aj Israel, aju Samuel tbʼi. Xi kyqʼamaʼn aj Israel te qa kyajxixtaq jun kawil kyibʼaj ik tzeʼn qe txqantl tnam. Nya bʼaʼn ela jlu toj twitz Jehová, naqtzen tuʼnj, xi tqʼoʼn ambʼil kye ex tzaj tqʼamaʼn te Samuel tuʼn tok tqʼoʼn toklen Saúl te kawil. Mitiʼtaq in jaw tnimsen tibʼ xjal lu, naqtzun tuʼnj, tej tbʼet ambʼil jaw tnimsen tibʼ ex mitiʼtl xi tbʼiʼn qMan Dios. Kyjuʼtzun el tiʼn Jehová toklen ex xi tqʼamaʼn te Samuel tuʼn tok tqʼoʼn toklen jun qʼa te ajkawil aju David tbʼi. Naqtzen tuʼnj, kʼikʼeltaq nim (bʼampo) abʼqʼi tuʼn t-xi tzyet tuʼn tkawin.

Pon jun qʼij jatumel xiʼ David kyukʼe ttzik, aʼyeju ateʼkxtaq kyxol t-soldad Saúl ex in che qʼojintaq. Tej tpon in che luʼlentaq soldad tuʼn kyxobʼil. ¿Tiʼtaq in bʼaj? Jun soldad nimxix tweʼ te tnam Filistea aju Goliat tbʼi in yolintaq nya bʼaʼn kyiʼj kysoldad aj Israel ex tiʼj Dios. Tzajxix tqʼoj David tuʼn jlu ex xi tqʼamaʼn qa tajtaq (tgantoq) tuʼn tqʼojen tukʼe ajqʼoj lu tiʼxku tzaj tiʼj ex tzmataq jun qʼa. Oʼkxtaq iqʼen jun xobʼil abʼj ex iqʼen junjun abʼaj tuʼn David, xiʼ bʼiyel tukʼe xjal nim tweʼ lu aju chʼixmelo oxe metro tweʼ. Ok ten Goliat xmayel tiʼj, naqtzen tuʼnj, xi tqʼamaʼn David qa oktaq kkambʼal tuʼnju in qʼojintaq toj tbʼi Jehová. Oʼkx jun abʼj ajbʼen tuʼn tkubʼ tzʼaq xjal lu tuʼn. El tiʼn t-espada ex el ttxʼemin twiʼ xjal lu. Tej tok kyqʼoʼn kywitz txqantl soldad te Filistea tiʼj jlu, e el oq tuʼn kyxobʼil.

Tbʼanel ela toj twitz ajkawil Saúl tuʼnju mitiʼ (tiloʼ) tzaj xobʼ David ex xi tqʼoʼn jun tbʼanel toklen kyxol qe t-soldad. Naqtzen tuʼnj, tej tok tqʼoʼn twitz ajkawil qa nimtaq in kambʼan qʼa lu kubʼ t-ximan tuʼn tkubʼ tbʼiyoʼn. El oq David tuʼn miʼn tkubʼ bʼiyoʼn. Xi tewin tibʼ David nim abʼqʼi, naqtzun tuʼnj, mitiʼ el tiʼn toklen Saúl. ¿Tiquʼn? Tuʼnju ojtzqiʼntaq tuʼn qa tuʼn Jehová otaq tzaj qʼoʼn toklen Saúl. Tej tbʼet ambʼil, kyim Saúl toj qʼoj. Xi tzyettzun tuʼn tkawin David, ikxix tzeʼnj otaq tzaj ttziyen Jehová.

Tajtaq David tuʼn tjaw tbʼinchen jun ja te Jehová. Naqtzen tuʼnj, tzaj tqʼamaʼn Jehová te qa nya ataq kjawil bʼinchante, quʼn jun tyajil oktaq kjawil bʼinchante. Ataq Salomón aju tkʼwaʼl (tkyʼajol). Naqtzun tuʼnj, xix tqʼoʼn Jehová jun tbʼanelxix toklen: kyaj bʼant tiʼj jun tyol tukʼe, aju tuʼn tok David te tnejel ajkawil tiʼj jun kʼloj kawil che elel tiʼj tyajil. Axpe ikx, tiʼj tyajil tzultaq aju Tzaqpil tziyen maj, aju Tyajil xuʼj yolin Dios tiʼj toj Edén. Aju xjal lu kʼokeltaq te Mesías, toj juntl yol, te Skʼoʼn maj, aju kjawiltaq tjyoʼn Jehová tuʼn tok te Kawil toj tKawbʼil, jun kawbʼil mitiʼ bʼajsbʼil te.

Tuʼnju in tzalajxixtaq David ok tchmoʼn aju kajbʼeltaq tuʼn tjaw bʼinchet tja Dios ax ikx ok tchmoʼn nimxix tbʼanelxix kʼuxbʼil. Ax ikx tukʼe onbʼil tzaj tqʼoʼn Dios te kubʼ tbʼinchen nim salmo, moqa bʼitz, tuʼn tjaw nimset Jehová. Tej chʼixtaq tkyim David, xi tqʼoʼn tkyaqil nimbʼil te Dios tiʼjju otaq bʼant tuʼn tej tqʼama: «Aju t-xew Qman in yolin wukʼile ex aju tyol at tuj ntziʼye» (2 Samuel 23:2).

(Atz xjatz iqʼet toj 1 Samuel, 2 Samuel, 1 Crónicas, Isaías 9:7, Mateo 21:9, Lucas 1:32 ex Juan 7:42.)