TEJ tok Pablo te okslal (nimel), xi tzyet tuʼn tpakbʼan tiʼj tKawbʼil Dios tukʼe tzalajbʼil. Naqtzun tuʼnj, atztaq tiʼjtl kʼokel bʼinchaʼn nim (bʼampo) nya bʼaʼn. Aju apóstol lu bʼet nimxix tuʼn t-xi tqʼamaʼn tqanil tiʼj kawbʼil aju kawbʼil kjapunel bʼaj tuʼn aju kubʼ t-ximen Dios tnejelku kye xjal.

Toj tnejel maj tqan Pablo, pon toj Listra ex kubʼ tqʼanen jun xjal aju koxtaq tej tul itzʼji. Ok kyqʼoʼn kywitz nimku xjal tiʼj jlu ex e ok ten ẍchʼil qa dios Pablo ex Bernabé, aju tukʼil. Kwest e maqet xjal kyuʼn tuʼn miʼn t-xi kyqʼoʼn chojbʼil kye. Naqtzen tuʼnj, lwey kubʼ kykʼuʼj xjal kyuʼn ajqʼoj tiʼj Pablo ex ok kyxoʼn abʼj tiʼj. Toj kywitz qa otaq kyim apóstol Pablo, naqtzun tuʼnj, mitiʼ (tiloʼ) kyim, ex yajxi chʼintl meltzʼaj juntl maj toj tnam tuʼn tok tqʼuqbʼaʼn kykʼuʼj okslal.

Tej tbʼet ambʼil, at junjun okslal judiy kukx tzaj kyqʼamaʼn qa ilxix tiʼj tuʼn tjapun junjun kawbʼil kyuʼn okslal nya judiy aju tzaj qʼamaʼn toj tLey Moisés. Tuʼn tkyaj jlu toj ttxolil, xiʼ Pablo toj Jerusalén tuʼn t-xi tqʼamaʼn kye apóstol ex ansyan. Tej tkubʼxix kyxnaqʼtzaʼn Tuʼjil Tyol Dios ex tej t-xi kyqanin tuʼn kytzaj onin tuʼn xewbʼaj xjan, xi kytzʼibʼen kye kʼloj okslal ex xi kyqʼamaʼn tuʼn miʼn kykʼulin kywitz tilbʼilal, tuʼn miʼn t-xi kychyoʼn chikʼ nix chibʼj atx chikʼ toj ex tuʼn miʼn kyyaẍin (kykyʼaʼjin). Aʼye kawbʼil ma che bʼaj qʼamet «ilxix tiʼj», naqtzen tuʼnj, mitiʼ tzaj tyekʼun jlu qa iltaq tiʼj tuʼn tjapun tLey Moisés kyuʼn (Hechos 15:28, 29).

Toj tkabʼ maj tqan apóstol Pablo, pon toj Berea, aju jun tnam at toj Grecia toj ambʼil jaʼlo (jaʼla). Aʼye judiy in che anqʼintaq toj tnam lu, tbʼanel ela toj kywitz aju tbʼanel tqanil, quʼn in che xnaqʼtzantaq tkyaqil qʼij tiʼj Tyol Dios tuʼn tel kynikʼ qa ax tok aju in tzajtaq xnaqʼtzaʼn kye. Yajxitl, el oq juntl maj apóstol Pablo kywitz qe aj qʼoj tiʼj. Xiʼ tzmax toj Atenas, jatumel ex tqʼoʼn jun tbʼanelxix chikʼbʼabʼil ex toj tumelxix xi tqʼamaʼn kywitz nimku xjal xnaqʼtzan majqe.

Tej otaqxi bʼaj pakbʼan apóstol Pablo toj toxin maj tqan, xiʼ toj Jerusalén. Tej tpon toj tja Dios, kyajtaq (kygantoq) txqan xjal tuʼn tkubʼ kybʼiyoʼn. Naqtzun tuʼnj, e kolin soldad te Roma tiʼj ex xi kyiʼn tuʼn tok toj xjel. Tuʼnju ax ikx t-xjaliltaq Roma te apóstol Pablo, xi qʼoʼn ambʼil te tuʼn tkolin tibʼ twitz Félix, aju jun xjal nim toklen. Mitiʼx bʼant tuʼn tkubʼ kyyekʼun judiy qa attaq til Pablo ik tzeʼn in kyqʼamaʼntaq. Naqtzen tuʼnj, tajxtaq Festo —aju ok te t-xel (tchʼixel) Félix— tuʼn t-xi tqʼoʼn toj kyqʼabʼ. Tuʼn miʼn tbʼaj jlu, xi tqanin Pablo tuʼn t-xi twitz César, moqa twitz ajkawil, tuʼntzunju xi ttzaqʼweʼn Festo jlu: «Kxeʼltzuna twitz tat gobierni» (Hechos 25:11, 12).

Atztaq toj Roma kʼokel apóstol Pablo toj xjel. Kyjuʼtzun xiʼ toj bark tuʼn tpon toj tnam Italia, naqtzun tuʼnj, xi mulqʼaj bark toj mar, ex atz kyaj ten Pablo toj piẍ txʼotxʼ Malta tbʼi toj jbʼalil. Tej tikʼ tkyaqil jlu tiʼj Pablo pon toj Roma, anqʼin kabʼe abʼqʼi toj jun ja tzaj majenaʼn. In che xqʼuqintaq soldad tiʼj, naqtzen tuʼnj, kukx tzalaj ex kukx xi tpakbʼaʼn tKawbʼil Dios kye kykyaqil qeju e pon tukʼil.

(Atz xjatz iqʼet toj Hechos 11:22–28:31.)