OTAQ tzikʼ junlo 350 abʼqʼi ttzajlen Nim Jbʼal. In nanqʼintaq Abrahán toj Ur, jun tnam qʼinin aju tkubʼtaq jatumel taʼ Irak jaʼlo (jaʼla). Attaq qʼuqbʼil tkʼuʼj, naqtzen tuʼnj, ok qʼuqbʼil tkʼuʼj tiʼj Dios toj malbʼil. Qo xnaqʼtzan tiʼ bʼaj.

Xi tqʼamaʼn Jehová te tuʼn tetz toj ttnam ex tuʼn t-xiʼ najal toj juntl tnam: atz toj Canaán. Xi tbʼiʼn naj Abrahán qMan Dios. Xiʼ toj jun tnam aju attaq najchaq, moqa laqʼche, tukʼex Sara, aju t-xuʼjil, tukʼex Lot, aju t-sobrin ex tkyaqil toj tja. Tej kypon toj Canaán, ok te bʼeten xjal, najan kyoj ja xbʼalun. Kyaj bʼant tiʼj jun tyol Jehová tukʼe Abrahán: xi ttziyen te qa tuʼn tyajil oktaq che tzajel tkʼiwlaʼn xjal twitz tkyaqil Txʼotxʼ, qa che okeltaq tyajil te jun matij (nin, nim) tnam ex qa kʼokeltaq txʼotxʼ te Canaán te kyetzbʼil.

Ten nim (bʼampo) kykarner ex kywakiẍ Abrahán tukʼe Lot. Tbʼanel xjaltaq te Abrahán ex xi tqʼoʼn ambʼil te t-sobrin tuʼn tjaw tjyoʼn aju txʼotxʼ mas tbʼaneltaq toj twitz tuʼn kywaʼn talun. Jaw tjyoʼn Lot aju tchqʼajlajil nimaʼ Jordán, aju mastaq in jaw chʼiy awal twitz, ex kubʼ ten najal ttxlaj tnam Sodoma. Naqtzen tuʼnj, nimxixtaq nya bʼaʼn in kubʼ kybʼinchen xjal te tnam lu aju tzʼiltaq in nela toj twitz Jehová.

Tej tel tpan tibʼ Abrahán tiʼj Lot, xi ttziyen Jehová te qa oktaq che ul itzʼji nimxix tyajil ik tzeʼn nimxix kyajlal cheʼw twitz kyaʼj. Qʼuqlitaq tkʼuʼj Abrahán tiʼj Jehová, naqtzun tuʼnj, mibʼantaq alin Sara, aju t-xuʼjil. Tej iqʼentaq 99 abʼqʼi tuʼn Abrahán ex tej chʼixtaq tjapun Sara toj 90 abʼqʼi, tzaj tqʼoʼn Dios tqanil te qa tzultaq itzʼji jun tkʼwaʼl tiʼj Sara. Ik bʼajju, ul itzʼji jun tal Sara aju ok kyqʼoʼn tbʼi te Isaac. E tzaj txqantl tkʼwaʼl Abrahán, naqtzen tuʼnj, kyiʼj toj tja Isaac tzultaq itzʼji aju Kolel otaq tzaj tziyen toj Edén.

Atzunte Lot kukxtaq in najan kyukʼe toj tja atz Sodoma. Naqtzen tuʼnj, mitiʼ (tiloʼ) kubʼ tbʼinchen aju nya bʼaʼn in bʼanttaq kyuʼn xjal te tnam lu, tuʼnju tbʼanel xjaltaq te. Tuʼntzunju, tej tkubʼ t-ximen Jehová tuʼn tkubʼ tnajsaʼn tnam Sodoma, tnejel xi t-samaʼn junjun anjel qʼol tqanil te Lot. Xi kyqʼamaʼn te tuʼn tetz oq kyukʼe toj tja toj tnam lu ex tuʼn miʼn taj kykaʼyin, moqa kykiʼn, kyiʼjxi. Tzajtzen tchitun qMan Dios abʼj tukʼe qʼaqʼ tuʼn kykubʼ tnajsaʼn nya bʼaʼn xjal te tnam Sodoma ex Gomorra. Kyaj anqʼin Lot kyukʼex kabʼe tmeʼl. Atzunte t-xuʼjil aj tkaʼyin tiʼjxi, tuʼnleju ul toj tkʼuʼj aju otaq kyaj tqʼoʼn tiʼjxi. Kyim tuʼnju mitiʼ xi tbʼiʼn aju otaq tzaj tqʼamaʼn Dios.

(Atz xjatz iqʼet toj Génesis 11:10–19:38.)