TEJ oʼkxtaq Jesús at kyukʼe kyaje t-apóstol twi witz Olivos, atz jatumel qʼanchaʼltaq Jerusalén ex tja Dios, xi kyqanin qeju kyaje apóstol te Jesús tuʼn t-xi tchikʼbʼaʼn junjun yol kye aju otaq yolin tiʼj. Tzmataq tbʼajlen tqʼamaʼn Jesús qa oktaq kbʼajel xiten tja Dios, ex tej naʼmxtaq ttzaj tqʼamaʼn jlu, otaq yolin tiʼj ambʼil aj tjapun bʼaj tqʼijlalil tiʼchaq at twitz Txʼotxʼ (Mateo 13:40, 49). Tuʼntzunju, xi kyqanin jlu te: «¿Jtoj japun tkyaqil jlu ex alkye techel tzul aj ttzaj tqʼoʼn twitza kyiʼj xjal twitz Txʼotxʼ ex aj tjapun bʼaj tqʼijlalil tiʼchaq at twitz Txʼotxʼ?» (Mateo 24:3, TNM).

Tej t-xi tqʼoʼn Jesús tzaqʼwebʼil te jlu, xi tqʼamaʼn kye t-apóstol aju kʼikʼel chʼixtaq tkubʼ xiten Jerusalén ex aju tja Dios attaq toj. Naqtzun tuʼnj, aju kyaj tqʼamaʼn ax ikx attaq toklen tukʼeju kbʼajel twitz tkyaqil Txʼotxʼ. Tuʼn tel nikʼbʼaj tiʼj jtojtaq tzaj tqʼoʼn Jesús twitz kyiʼj xjal twitz Txʼotxʼ, iltaq tiʼj tuʼn tok kyqʼoʼn kywitz xjal tiʼj jun techel: aju nim (bʼampo) tiʼchaq ok kʼikʼeltaq twitz tkyaqil txʼotxʼ toj junx ambʼil. Aju techel lu ok tzultaq tyekʼun qa o txi tqʼoʼn Jehová toklen Jesús tuʼn tok te Kawil toj kawbʼil tzaj tziyen te Mesías ex qa aju kawbʼil lu chʼixtaq tpon ambʼil tuʼn tkubʼ tnajsaʼn nya bʼaʼn ex ok kteltaq juntl maj mojbʼabʼil tuʼn twitz tkyaqil Txʼotxʼ. Tkyaqil aju tqʼama Jesús tuʼn tikʼ oktaq kbʼel tyekʼun qa chʼixtaq tjapun bʼaj tqʼijlalil tiʼchaq at twitz Txʼotxʼ toj ambʼil jaʼlo (jaʼla) —aju alkye tten nukʼuʼn kykawbʼil, kyanqʼibʼil ex kyokslabʼil (kynimbʼil) xjal— ex qa chʼixtaq t-xi tzyet jun akʼaj twitz Txʼotxʼ.

Tqʼama Jesús qa, ajtaq t-xi tzyet tuʼn tkawin toj kyaʼj, kʼokeltaq nimaq qʼoj, tzultaq yabʼil, waʼyij ex kyaqnajnabʼ twitz tkyaqil Txʼotxʼ. Chebʼe ex chebʼe mlaytaq txi kybʼiʼntl xjal ley. Ax ikx, oktaq che pakbʼal qeju axix tok (bʼaʼn ax) lepchiqeʼk tiʼj Jesús tiʼj tbʼanel tqanil tiʼj tKawbʼil Dios twitz tkyaqil Txʼotxʼ. Ok kpol bʼaj aju techel tiʼj «kʼixbʼisabʼl maʼxix», ex mlay tzaj juntl maj ik tzeʼn jlu (Mateo 24:21).

¿Alkye tten oktaq kʼelel kynikʼ okslal qa chʼixtaq tul nya bʼaʼn ambʼil lu? Xi tqʼamaʼn Jesús kye qeju lepchiqeʼktaq tiʼj: «Kyiʼmele techal tiʼj tqan higo» (Mateo 24:32). Toj Israel, aj ttzaj t-xaq jun wiʼ higo, in nel nikʼ tiʼj qa chʼixtaq tul qʼijil. Ax ikx, ajtaq tikʼ tkyaqil aju kyaj tqʼamaʼn Jesús toj junx ambʼil, oktaq kʼelel nikʼbʼaj qa chʼixtaq tul xitbʼil. Naqtzun tuʼnj, tqʼama Jesús qa oʼkxtaq tTat ojtzqilte alkye qʼij ex alkye or kxel tzyet aju nimxix yajbʼil. Tuʼntzun aju, kyaj tqʼamaʼn jlu: «Che xqʼuqine ex che naʼne Dios; porque mintiʼ bʼiʼn kyuʼne jtoj bʼan tjapun tqʼijlalil» (Marcos 13:33).

(Atz xjatz iqʼet toj capítulo 24 ex 25 te Mateo, toj capítulo 13 te Marcos ex toj capítulo 21 te Lucas.)