TZAJ tqʼamaʼn Jehová txqan yol kye t-sanjel tiʼj Mesías, aju Kolel otaq kyaj qʼamaʼn. Lwey jaku tzʼel qnikʼ tiʼj, quʼn kyaj qʼamaʼn alkyetaq tten tuʼn tul itzʼji, alkyetaq tten tuʼn tpakbʼan, ex alkyetaq tten tuʼn tkyim. ¡Tkyaqil jlu japen twiʼ tiʼj Jesucristo! Qa ma qo xnaqʼtzan kyiʼj qeju in che yolen tiʼj titzʼjlen ex tej tjaw  chʼiy Jesús, ok kʼokel qojtzqiʼn qa japen kywiʼ ikxix tzeʼnj kyaj qʼamaʼn.

Tqʼama Isaías aju t-sanjel Dios qa tiʼj toj tja David tzultaq Mesías (Isaías 9:7). Ikxix ikʼ: tiʼj toj tja David ul itzʼje Jesús (Mateo 1:1, 6-17).

Juntl t-sanjel Dios Miqueas tbʼi, tqʼama qa tzultaq itzʼji Mesías toj «Belén Efrata» ex qa ok kʼokeltaq te ajkawil (Miqueas  5:2). Tej tul Jesús twitz txʼotxʼ, attaq kabʼe tnam toj Israel Belén kybʼi. Jun tjaxtaq jawni, ttxlaj Nazaret, ex juntl toj Judá, nqayin (qayni) ttxlaj Jerusalén. Aju nqataq taʼ ttxlaj Jerusalén toktaq tbʼi te Efrata. Atzxix toj tnam lu ul itzʼje Jesús, iktzun japen twiʼ yol kyaj qʼamaʼn (Mateo 2:1).

Juntl yol kyaj qʼamaʼn toj Tyol Dios, aju tqʼama qa tzultaq ttxkoʼn Dios tkʼwaʼl (tkyʼajol) tuʼn tetz «tuj Ejipt». Ik bʼajju, aju tal kʼwaʼl Jesús xi qʼiʼn toj Egipto, yajxitl, tej tkyim Herodes aju kawil, ajtz meltzʼaj juntl maj Jesús toj ttnam. Iktzen tten japun twiʼ yol kyaj qʼamaʼn (Oseas 11:1; Mateo 2:15).

Toj recuadro tok tbʼi: « Aʼyeqe yol e kyaj qʼamaʼn tiʼj Mesías» bʼaʼn tuʼn tok tqʼoʼn twitza tiʼj yol: «Kyaj qʼamaʼn», atz jatumel atqeʼkux texto aju in tzaj kyqʼamaʼn tiʼtaq tuʼn tikʼ tiʼj Mesías. Bʼaʼn tuʼn kykubʼ tmojbʼaʼna texto lu, kyukʼe qeju ateʼkux tjaqʼ yol «Japun twiʼ». Iktzun tten kʼokel qʼuqeʼ tkʼuʼja tiʼj Tyol Dios, quʼn axix qe yol ateʼkux toj.

Aj kykux tjyoʼna texto lu, bʼaʼn tuʼn ttzaj tnaʼna qa aʼyeju yol e kyaj qʼamaʼn e kubʼ tzʼibʼen tej atxtaq nim (bʼampo) syent abʼqʼi tuʼn tul itzʼj Jesús. Ax Jesús qʼamante jlu: «Ilxix tiʼj tuʼn tjapun tkyaqil jlu aju tzʼibʼan wiʼje tuj tley Moisés ex tuj kyuʼjil t-sanjel Dios ex kyuj salmo» (Lucas 24:44). Qa ma che kuʼx tjyoʼna texto toj Tyol Dios, ok kʼokel tojtzqiʼna qa japen kywiʼ qeju yol ikxix tzeʼnj kyaj qʼamaʼn.