1, 2. a) Tzeʼn teya toj twitz, ¿ojtzqiʼn jun xjal quʼn qa oʼkx o tzʼok qbʼiʼn tbʼi? b) ¿Tiʼ in kyqʼamaʼn xjal tiʼj Jesús?

AT NIM (bʼampo) xjal at kyoklen twitz txʼotxʼ. At junjun ojtzqiʼn kywitz kyuʼn xjal atz toj kytnam ex at junjuntl ojtzqiʼn kywitz kyuʼn kykyaqil xjal twitz txʼotxʼ. Qa o tzʼok tbʼiʼna tbʼi jun xjal at toklen, mitiʼ (tiloʼ) in tzaj tyekʼun jlu qa ojtzqiʼn tuʼna, toj juntl yol, mitiʼ ojtzqiʼn tuʼna tiʼ bʼent tuʼn xjal ojtxe ex tiʼ in bʼent tuʼn jaʼlo (jaʼla).

² O tzikʼxi kabʼe mil abʼqʼi tej tten Jesús twitz Txʼotxʼ, pero twitz tkyaqil txʼotxʼ in che yolin xjal tiʼj jaʼlo. Naqtzen tuʼnj nya ojtzqiʼn kyuʼn alkyexix Jesús. At junjun in kyqʼamaʼn qa naq jun tbʼanel xjal te Jesús tej tten twitz txʼotxʼ. At txqantl in kyqʼamaʼn qa naq jun t-sanjel (profeta) Diostaq te. Ex at mastl xjal in kyqʼamaʼn qa a Jesús Dios ex qa ilxix tiʼj tuʼn qkʼulin, moqa tuʼn qnimin te. ¿Ax tok jlu?

3. ¿Tiquʼn ilxix tiʼj tuʼn tok qojtzqiʼn Jehová ex Jesús?

³ Ilxix tiʼj tuʼn tok qojtzqiʼn alkyexix Jesús. ¿Tiquʼn? Tuʼnju in tzaj tqʼamaʼn Tyol Dios jlu: «Atzun chwinqlal jlu te jumajx, tuʼn tojtzqinjtza kyuʼn, oʼkx aya jun Dios axix tok, ex tuʼn wojtzqinjtze kyuʼn, aqine Jesucrist ma chin tzaj t-samaʼna» (Juan 17:3). Qa ma tzʼok qojtzqiʼn Jehová ex Jesús, jaku qo anqʼin te jun majx (juneleʼx) toj jun tbʼanel najbʼil tzalu twitz txʼotxʼ (Juan 14:6).  Ax ikx, kyaj tqʼoʼn Jesús jun tbʼanel techel qwitz, tiʼj alkye tten tuʼn qanqʼin ex alkye qmod ktel kyukʼe txqantl xjal (Juan 13:34,35). Toj tnejel xnaqʼtzbʼil te uʼj lu, o xnaqʼtzan tiʼj alkyexix Dios. Atzun jaʼlo ok qo xnaqʼtzal tiʼj alkyexix Jesucristo ik tzeʼnj in tzaj tqʼamaʼn Tyol Dios.

4. ¿Tiʼ kyxilen qeju yol Mesías ex Cristo?

⁴ Tej naʼmxtaq titzʼji Jesús twitz txʼotxʼ, tzaj tqʼamaʼn Tyol Dios qa tzultaq Mesías moqa Cristo aju samaʼn tuʼn Dios. Aju yol Mesías (tzajni tiʼj jun yol hebreo) ex aju yol Cristo (tzajni tiʼj jun yol griego), a kyxilen yol lu «Skʼoʼn maj». Toj juntl yol, o tzaj qʼoʼn jun tbʼanel toklen tuʼn Dios. Kyoj txqantl xnaqʼtzbʼil ok  qo xnaqʼtzal tiʼj qa at-xix toklen Mesías tuʼn tjapun tkyaqilju o tzaj tqʼamaʼn Dios. Ax ikx ok qo xnaqʼtzal tiʼj qa jaku qo tzaj tkʼiwlaʼn Jesús jaʼlo. Tej naʼmxtaq tul itzʼj Jesús, kubʼle kyximan xjal jlu: «¿Alkye Mesías tzul?».

5. ¿Alqiʼj qʼuqlitaq kykʼuʼj qeju lepcheqeʼktaq tiʼj Jesús?

⁵ Toj tnejel syent abʼqʼi tiʼj ambʼil iqʼin quʼn jaʼlo, aʼyeju lepchiqeʼktaq tiʼj Jesús qʼuqlitaq kykʼuʼj qa ataq Jesús Mesías aju otaq kyaj qʼamaʼn (Juan 1:41). Jun kyxol qe jlu, aju Simón Pedro, xi tqʼamaʼn jlu te Jesús: «Aya ju Crist aju at toklen tuʼn Dios» (Mateo 16:16). ¿Tiquʼn qʼuqlitaq kykʼuʼj qeju lepcheqeʼk tiʼj Jesús qa ataq te Mesías? ¿Ex tiquʼn kʼokel qʼuqeʼ qe qkʼuʼj jaʼlo?

6. ¿Alkye techel in kubʼ qʼoʼn tuʼn tok toj qwiʼ, tzeʼn tten onin Jehová kyiʼj tbʼanel xjal tuʼn tel kynikʼ tiʼj Mesías?

⁶ Aʼyeqe t-sanjel Dios e anqʼin tej naʼmxtaq tul itzʼj Jesús, kyaj kyqʼamaʼn nim tqanil tuʼntzen tok kyojtzqiʼn xjal alkyetaq Mesías tzul. Qo ximan tiʼj techel lu: qa ma txiʼya jyol jun xjal mitiʼ ojtzqiʼn twitz tuʼna kyxol xjal toj plas. Jakulo kanet tuʼna qa ma tzaj qʼamaʼn teya tzeʼn xjal lu. Ax ikx te Jehová tzaj tqʼamaʼn nim tqanil kye t-sanjel alkyetaq kbʼantel tuʼn Mesías ex tiʼtaq kbʼajel tiʼj. Ajtaq tjapun kywiʼ yol otaq che kyaj qʼamaʼn, jakutaq tzʼel kynikʼ tbʼanel xjal alkyetaq Mesías.

7. Qʼamantza alkyeqe yol japun kywiʼ tiʼj Jesús.

⁷ At kabʼe techel tiʼj jlu. Tnejel: tqʼama Miqueas qa tzultaq itzʼj Mesías toj Belén, aju tal tnam te Judá, tqʼama tej atxtaq wuq syent abʼqʼi tuʼn tikʼ jlu (Miqueas 5:2). ¿Jatumel ul itzʼj Jesús? Atzxix toj tnam Belén (Mateo 2:1, 3-9). Tkabʼ techel, aju kyaj qʼamaʼn toj Daniel 9:25 qa toj abʼqʼi 29 ok tzultaq Mesías, kyaj tqʼamaʼn Daniel jlu tej atxtaq jweʼ syent abʼqʼi tuʼn tikʼ. * In nel qnikʼ qa a Jesús  Mesías tuʼnju japun kywiʼ qeju yol lu tiʼj ex txqantl yol otaq kyaj qʼamaʼn.

8, 9. ¿Alkye tten elxix nikʼ tiʼj Jesús tej tjatz toj aʼ, qa ataq te Mesías?

⁸ Tej chʼixtaq tbʼaj abʼqʼi 29 elxix nikʼ qa a Jesús Mesías. Toj ambʼil aju, xi tqʼamaʼn Jesús te Juan el Bautista tuʼn tkux qʼoʼn tuʼn toj nimaʼ Jordán, tuʼntzun tjaw aʼ twiʼ (tuʼn tbʼyan). Otaq tzaj tqʼamaʼn Jehová te Juan qa tzultaq tyekʼun jun techel te, tuʼn tel tnikʼ tiʼj Mesías; tzaj tyekʼun Jehová jlu te, tej tjatz Jesús toj aʼ. In tzaj tqʼamaʼn Tyol Dios jlu: «Atzaj teʼ tjatz Jesús toj aʼ, bʼeʼx xi jaqpaj kyaʼj, ex xi tkaʼyin T-xew Dios, a Xewbʼaj Xjan, kyjaʼtaq tkuʼtz tzeʼnku jun palom, ex kubʼ ten tibʼaj. Ex qʼajqʼojin jun yol toj kyaʼj. Chiʼ kyjaluʼn: Axixpen wejiʼy Nkʼwal kʼuʼjlin wuʼn, a o jaw nskʼoʼn» (Mateo 3:16, 17, ATM). Tej tlonte Juan ex tej tbʼi jlu, ok qʼuqeʼxix tkʼuʼj qa ataq Jesús samaʼn tuʼn Dios (Juan 1:32-34). Tej tkuʼtz xewbʼaj xjan —aju tipumal Dios in najbʼen tuʼn— tibʼaj Jesús, ok Jesús te Mesías, moqa Cristo, aju xjal otaq jaw skʼoʼn, tuʼn tok te Nejenel ex te Ajkawil (Isaías 55:4).

⁹ Aʼyeju yol o japun kywiʼ ex aju tzaj tqʼamaʼn Jehová, in tzaj kyyekʼun qa a Jesús Mesías aju otaq kyaj qʼamaʼn. Nya oʼkx jlu, ax ikx in tzaj ttzaqʼweʼn Tyol Dios kabʼetl xjel (pregunta) nim kyoklen tiʼj Jesucristo: aju jatumel tzaj ex tzeʼntaq tmod.

10. ¿Tiʼ in tzaj t-xnaqʼtzaʼn Tyol Dios tiʼj Jesús tej naʼmxtaq tul tzalu twitz Txʼotxʼ?

¹⁰ In tzaj t-xnaqʼtzaʼn Tyol Dios qa anqʼin Jesús toj kyaʼj tej naʼmxtaq tul twitz Txʼotxʼ. Jun techel tiʼj jlu, nya oʼkx tqʼama Miqueas qa tzultaq itzʼj Mesías toj Belén, ax ikx tqʼama qa «atxix ojtxi ttzajlen xeʼt [moqa tzyet]» tuʼn tanqʼin (Miqueas 5:2). Axpe Jesús qʼamante nim maj, qa otaq tzʼanqʼin toj kyaʼj tej naʼmxtaq tul tzalu twitz txʼotxʼ  (kjawil uʼjit Juan 3:13; 6:38, 62; 17:4, 5). Tej attaq Jesús toj kyaʼj, jun xewbʼajtaq, aju mitiʼ qʼanchaʼl, ex in tzalajtaq tukʼe Jehová.

11. ¿Tzeʼn in tzaj tyekʼun Tyol Dios qa a Jesús tkʼwaʼl Jehová aju mas kʼujlaʼnxix tuʼn?

¹¹ At nim tiquʼn kʼujlaʼnxix Jesús tuʼn Dios aju tkʼwaʼl (tkyʼajol). In tzaj tqʼamaʼn Tuʼjil Tyol qa «oʼkxte attoq nej naʼnxtoq tbʼant tkyaqil», quʼn a Jesús kubʼ tbʼinchaʼn Dios tnejel (Colosenses 1:15). * Juntl tiquʼn kʼujlaʼnxix Jesús, tuʼnju «oʼkxku jun Tkʼwaʼl» Dios (Juan 3:16). A t-xilen jlu qa tjunalx Jehová kubʼ bʼinchante Jesús. Ax ikx oʼkx Jesús onin tukʼe Jehová tuʼn tbʼinchet txqantl tiʼchaq (Colosenses 1:16). Nya oʼkx jlu, ax ikx in nok qʼoʼn tbʼi te «Yol» (Juan 1:14). A jlu in tzaj tyekʼun qa ataq Jesús in yolin te t-xel (tchʼixel) tTat. In xitaqlo tqʼoʼn tqanil ex kawbʼil kye txqantl tkʼwaʼl Dios, ik tzeʼn qe anjel ex qe xjal twitz txʼotxʼ.

12. ¿Tiquʼn in xi qqʼamaʼn qa nya junx Jesús tukʼe Dios?

¹² ¿Junxpetzele Jesús tukʼe Dios, ik tzeʼnj in kyqʼamaʼn junjun xjal? Mitiʼ in tzaj t-xnaqʼtzaʼn Tyol Dios jlu. Ik tzeʼnj ma qo xnaqʼtzan tiʼj toj taqikʼ ma kyaj, kubʼ bʼinchaʼn te Jesús. Tuʼntzen jlu, in nel qnikʼ qa tzaj tzyet tchwinqlal (tanqʼibʼil) Jesús, atzunte Jehová mitiʼ tzaj tzyet tchwinqlal ex mlay bʼaj (Salmo 90:2). Mitiʼpe te Jesús kubʼ t-ximen tuʼn tok tqʼon tibʼ ik tzeʼn Dios. In tzaj t-xnaqʼtzaʼnxix Tyol Dios qa at mas toklen Manbʼaj twitz tKʼwaʼl (kjawil uʼjit Juan 14:28; 1 Corintios 11:3). Oʼkxku Jehová ‹at nimxix tipumal (tbʼalor) tuʼn tbʼant tkyaqil tuʼn› (Génesis 17:1). Tuʼntzun jlu, mi aʼl juntl jaku kanin tiʼj Jehová. *

13. ¿Tiʼ t-xilen aju yol in tzaj tqʼamaʼn Tyol Dios qa a Jesús «tilbʼilal Dios mintiʼ qʼanchaʼl»?

 ¹³ Nimxix ambʼil ten Jesús tukʼe Jehová toj kyaʼj ex o che tzalajxix wen, ikʼ jlu tej naʼmxtaq kykubʼ bʼinchen cheʼw ex Txʼotxʼ. ¡Nimtaqlo kykʼujlabʼil kyxol! (Juan 3:35; 14:31.) Ikxixtaq Kʼwaʼl lu ik tzeʼn tTat. Tuʼntzen jlu, in tzaj tqʼamaʼn Tyol Dios qa «ate Crist tilbʼilal Dios mintiʼ qʼanchaʼl» (Colosenses 1:15). Ik tten ik tzeʼn qe kʼwaʼl in che ok ik tzeʼn qe kytat, ax ikx te tKʼwaʼl Dios kubʼ tyekʼun tkyaqil aju tmod tTat.

14. ¿Alkye tten ul itzʼj Jesús tuʼn tok te jun xjal?

¹⁴ Tuʼn tkyaqil tkʼuʼj Jesús kyaj tqʼoʼn tnajbʼil toj kyaʼj, tuʼntzun tkuʼtz tzalu twitz Txʼotxʼ ex tuʼn tok te xjal. Jakule kubʼ t-ximana jlu: «¿Alkye tten ul itzʼj jun xewbʼaj tzalu twitz txʼotxʼ ex ok te xjal?». Naq tuʼn tipumal Jehová bʼant jlu. Ok tqʼoʼn Jehová Jesús, aju in nanqʼintaq toj kyaʼj, toj talbʼil María jun txin, moqa jun qʼapoj, aj Judiy aju naʼmxtaq tkubʼ kuẍeʼ tukʼe jun xinaq, moqa tukʼe jun ichan. Tuʼnju nya jun xjaltaq ttat kʼwaʼl lu, mitiʼ ul itzʼj tukʼe il ex ok tqʼoʼn María tbʼi te Jesús (Lucas 1:30-35).

15. ¿Alkye tten jaku tzʼok qojtzqiʼn Jehová tuʼn Jesús?

¹⁵ Tkyaqilju bʼent tuʼn Jesús ex tkyaqilju tqʼama tej tten twitz Txʼotxʼ, in qo tzaj tonin tuʼn tok qojtzqiʼn. Nya oʼkx jlu, ax ikx tuʼn Jesús jaku tzʼok qojtzqiʼnxix Jehová. ¿Tzeʼn tten? Qa naʼnx tuʼna, a Jesús tilbʼilal Jehová. Tuʼntzen jlu, xi tqʼamaʼn te jun t-xnaqʼtzbʼen: «Alkye ma chin ilwaje tuʼn, ma ilwaj Dios Mambʼaj tuʼn» (Juan 14:9). Kyoj qeju kyaje uʼj in che yolin tiʼj Jesús —aju Mateo, Marcos, Lucas ex Juan—, in kanet nim xnaqʼtzbʼil quʼn tiʼj tanqʼibʼil, tiʼj tbʼinchbʼen ex tiʼj tmod Jesucristo.

16. ¿Alqiʼjxix yolin Jesús ex jaʼ tzajnitaq xnaqʼtzbʼil in xi tqʼoʼn?

¹⁶ In noktaq qʼoʼn tbʼi Jesús te «Xnaqʼtzal» (Juan 1:38;  13:13). ¿Tiʼtaq in kubʼ t-xnaqʼtzaʼn? In yolintaq «tiʼj tqanil bʼaʼn tiʼj tkawbʼil Dios». Aju kawbʼil lu tzmax toj kyaʼj kkawil tibʼaj tkyaqil Txʼotxʼ ex tzul tqʼoʼn nim tbʼanel kye qeju xjal in che ajbʼen te Dios (Mateo 4:23). ¿Jaʼ tzajni tbʼanel tqanil lu? Ax Jesús qʼamante: «Aju xnaqʼtzbʼil in xi nqʼoʼne mya weye, noq oʼkx teju tzaj samante weye» (Juan 7:16). Ojtzqiʼntaq tuʼn Jesús qa tajbʼiltaq (tgantoq) tTat tuʼn tok kybʼiʼn xjal aju tbʼanel tqanil tiʼj tkawbʼil Dios. Toj xnaqʼtzbʼil 8 ok qo xnaqʼtzal mas tiʼj kawbʼil lu, ex tiʼjju kbʼantel tuʼn.

17. ¿Jatumel in che kubʼtaq t-xnaqʼtzaʼn Jesús xjal ex tiquʼn ok tilil tuʼn?

¹⁷ ¿Jatumel in che kubʼtaq t-xnaqʼtzaʼn Jesús xjal? Jaxku tumel: Toj kojbʼil, toj plas, kyoj tnam ex toj kyja xjal. Xiʼ jyol qe xjal jaxku tumel, mitiʼ te Jesús kubʼ ten ayol tuʼn kypon xjal tukʼe (Marcos 6:56; Lucas 19:5, 6). ¿Tiquʼn el tpaʼn Jesús nim ambʼil ex ok tilil tuʼn, tuʼn tpakbʼan ex tuʼn kykubʼ t-xnaqʼtzaʼn qe xjal? Quʼn ataq tajbʼil tTat jlu, ex kukxtaq in bʼent jlu tuʼn Jesús (Juan 8:28, 29). At juntl tiquʼn bʼant jlu tuʼn Jesús, tuʼnju tzaj qʼaqʼin tkʼuʼj kyiʼj xjal e pon tukʼe (kjawil uʼjit Mateo 9:35, 36). Otaqwitlo che kubʼ kyxnaqʼtzaʼn nejenel kye okslal qe xjal tiʼj axix (bʼanax) tiʼj Dios ex kyiʼj t-xim. Atzunte Jesús ojtzqiʼntaq tuʼn qa iltaq tiʼj tuʼn tok kybʼiʼn xjal tbʼanel tqanil tiʼj tKawbʼil Dios.

18. ¿Alkyeqe tmod Jesús mas tbʼanel ẍe ela toj twitza?

¹⁸ Nimtaq tkʼujlabʼil Jesús kyiʼj xjal. Tbʼaneltaq in nela toj kywitz xjal tuʼn kyten tukʼe quʼn manstaq te, axpe ikxqetaq kʼwaʼl tbʼaneltaq in nela toj kywitz tuʼn kyten tukʼil Jesús (Marcos 10:13-16). Kʼujlaʼntaq tkyaqil kyyajil xjal tuʼn. In che eltaq tikʼen qeju in che elqʼan ex qeju in noktaq kybʼinchaʼn nya bʼaʼn tiʼj juntl (Mateo 21:12, 13). Toj ambʼil aju, mitiʼtaq kyoklen xuʼj (qya) toj kywitz xjal,  atzente Jesús attaq kyoklen xuʼj toj twitz (Juan 4:9, 27). Mitiʼ te Jesús jaw tnimin tibʼ. Toj jun maj, ok ten txʼjol kyqan qe t-apóstol, aju aqʼuntl lu oʼkx qe majen chʼin kyoklen in kubʼtaq kybʼinchen.

19. ¿Alkye techel in tzaj tyekʼun qa in tzaj qʼaqʼintaq tkʼuʼj Jesús kyiʼj qeju xjal ateʼtaq toj kʼixkʼej?

¹⁹ In qʼaqʼintaq tkʼuʼj Jesús kyiʼj qeju xjal in tzajtaq nya bʼaʼn kyiʼj, kubʼ tyekʼun jlu tej kykubʼ tqʼanen xjal naq tuʼn tipumal Dios (Mateo 14:14). Jun techel, aju tej tpon jun xjal txʼaʼk tiʼj jyolte Jesús ex xi tqʼamaʼn te: «Qa taja, jaku chin bʼanixe tuʼna». Tnaʼ Jesús aju kʼixkʼej in tnaʼntaq xjal. Tzaj qʼaqʼin tkʼuʼj tiʼj ex xi tnuqpiʼn tqʼabʼ ex ok tmakoʼn ex xi tqʼamaʼn te: «Wajbʼile bʼiʼx kbʼantela». ¡Bʼiʼx bʼanix yabʼ lu! (Marcos 1:40-42.) Qa ma tzʼok tena ximil tiʼj, ¿tiʼtzele tnaʼ xjal lu?

20, 21. ¿Tiquʼn jaku txi qqʼamaʼn qa kyaj tqʼoʼn Jesús jun tbʼanel techel qwitz, tuʼn qajbʼen oʼkx te Jehová?

²⁰ Kyaj tqʼoʼn Jesús jun tbʼanel techel qwitz tuʼnju oʼkx ajbʼen te Dios ex kukx kubʼ tbʼinchen tajbʼil. Toj tkyaqil ambʼil kukx ajbʼen te tTat aju at toj kyaʼj, maske, mo inchq, in neltaq ikʼen ex in noktaq bʼinchen nya bʼaʼn tiʼj. El tikʼun tkyaqil nya bʼaʼn kubʼ tqʼoʼn Satanás twitz (Mateo 4:1-11). Toj jun ambʼil mitiʼ ok qʼuqeʼ kykʼuʼj qeju toj tja tiʼj. Axpe ikx kyqʼama «qa otoq tzʼok te tzkaj», moqa otaq naj tnabʼil (Marcos 3:21). Pero mitiʼ tzaj bʼaj tkʼuʼj Jesús tuʼn jlu ex kukx kubʼ tbʼinchaʼn aju taqʼen tzaj tqʼoʼn Dios. Tej tok yasoʼn ex tej kyok lipen ajqʼoj tiʼj, mitiʼ jaw kyaqpaj ex mitiʼ kubʼ t-ximen tuʼn tok tbʼinchen nya bʼaʼn kyiʼj (1 Pedro 2:21-23).

 ²¹ Kukx ajbʼen Jesús te Jehová tzmaxi tej tkyim, nim nya bʼaʼn ok kybʼinchaʼn qe ajqʼoj tiʼj tej chʼixtaq tkyim (kjawil uʼjit Filipenses 2:8). Naqpe ximana tiʼj kʼixkʼej ikʼx tuʼn toj qʼij tej tkyim. Naq kubʼ tayoʼn tej t-xi jukʼuʼn kyuʼn qe ajkawil, tej t-xi qʼamaʼn nya ax yol tiʼj ex tej kyqʼama nya bʼaʼn jwes qa iltaq tiʼj tuʼn tkyim, tej kyok ten xjal xmayil tiʼj, ex tej kyok ten soldad kʼixbʼisalte. Tej toktaq twitz tzeʼ jaw ẍchʼin ex tqʼama: «Ma japun tkyaqil» (Juan 19:30). Tej tikʼ oxe qʼij tkyimlen Jesús, jaw anqʼin juntl maj tuʼn Dios ex xi tqʼoʼn t-ximlal xewbʼaj, moqa aju nya qʼanchaʼl (1 Pedro 3:18, TNM). Tej tikʼ 40 qʼij tjawlen itzʼj Jesús, aj meltzʼaj (maqʼtzʼuj) juntl maj toj kyaʼj «ex kubʼtzun qeʼ tuj tbʼanqʼabʼ Dios» ayol tuʼn ttzaj qʼoʼn toklen tuʼn tkawin (Hebreos 10:12, 13).

22. ¿Tiʼ tbʼanel tzul kye xjal tuʼnju kukx ajbʼen Jesús te Dios tzmaxi tej tkyim?

²² ¿Tiʼ tbʼanel tzul kye xjal tuʼnju kukx ajbʼen Jesús te Dios tzmaxi tej tkyim? Tuʼn jlu jaku qo anqʼin te jun majx toj jun tbʼanel najbʼil tzalu twitz txʼotxʼ, ik tzeʼnj kubʼ t-ximen Jehová tnejelku. Toj juntl xnaqʼtzbʼil ok qo xnaqʼtzal tiʼj alkye tten kbʼantel jlu tuʼnju kyim Jesús.