1, 2. Qa ateʼ qxjel, ¿tiquʼn ilxix tiʼj tuʼn t-xi qqanin?

¿O CHE ok tbʼiʼnxi teya kʼwaʼl in xi kyqanin nim (bʼampo) kyxjel? Nim kʼwaʼl in xi kyqanin kyxjel (preguntas) aj tbʼant kyyolin. At maj in tzaj kyqanin jlu qe: «¿Jatumel in kubʼ ten qʼij qonikʼan?», «¿Tiquʼn in che qoptzʼaj cheʼw?» moqa «¿Alkye kubʼ xnaqʼtzan junjun txkup tuʼn tbʼant kylipen twitz kyaʼj?». At maj kwest tuʼn t-xi qtzaqʼweʼn junjun kyxjel kʼwaʼl. Ax ikx at maj aj t-xi qqʼoʼn jun tbʼanel tzaqʼwebʼil kye, in tzaj kyqanin juntl maj qe: «¿Pero tiquʼn?».

² Nya oʼkx qe kʼwaʼl in xi kyqanin kyxjel. Ax ikx qe, kukx in xi qqanin qxjel otaq qo chʼiy, atle maj in bʼent jlu quʼn tuʼn qpon toj juntl tnam, tuʼn miʼ ttzaj jun nya bʼaʼn qiʼj, moqa naq tuʼnju qgan tuʼn tok qojtzqiʼn jun tiʼ. Naqtzen tuʼnj, at nim xjal ya mitiʼtl (tiloʼ) in xi kyqanin kyxjel aʼyeju at kyoklen. Moqa mitiʼtl in che jyon tiʼj tzaqʼwebʼil te kyxjel.

3. ¿Tiquʼn at nim xjal mitiʼtl in che jyon kyiʼj tzaqʼwebʼil at kyoklen?

³ Ximana tiʼj xjel (pregunta) tok tiʼj uʼj lu, ex kyiʼj qeju xjel in che jatz kanet tuj t-xaq oxe ex waqaq, ax ikx kyiʼj qeju  xjel ateʼku twiʼ xnaqʼtzbʼil lu. Aʼyetzun junjun xjelju in che ximin xjal kyiʼj. Naqtzen tuʼnj, nim xjal o kyaj kytzaqpiʼn tuʼn kyjyon kyiʼj tzaqʼwebʼil kye xjel lu. ¿Tiquʼn? ¿Jakupetzele che kanet tzaqʼwebʼil quʼn toj Tyol Dios? At junjun xjal in kubʼ kyximan qa kwest in nela toj kywitz aju tzaqʼwebʼil in tzaj tqʼoʼn Tyol Dios. At txqantl mitiʼ in xi kyqanin tuʼnju in che tzaj chʼixwi. Aʼyetzen txqantl xjal in kubʼ kyximin qa bʼaʼn tuʼn tkyaj qʼet jlu toj kyqʼabʼ qeju nejenel kye okslal. ¿Tiʼ teya t-xim tibʼaj jlu?

4, 5. ¿Alkyeqe xjel ilxix tiʼj tuʼn qximan kyiʼj, ex tiquʼn ilxix tiʼj tuʼn qjyon tzaqʼwebʼil kye?

⁴ Tajlo teya tuʼn tok tojtzqiʼna tzaqʼwebʼil kye qeju xjel at kyoklen toj qanqʼibʼil. Atle maj jaku che ul xjel lu toj twiʼya: «¿Tiquʼn xqo kubʼ bʼinchan tzalu twitz txʼotxʼ? ¿Oʼkxpetzulo qanqʼibʼil jlu? ¿Tzeʼnxix Dios?». Bʼaʼn tuʼn t-ximana kyiʼj xjel lu, ax ikx bʼaʼn tuʼn tok tilil tuʼna tuʼn tjyona kyiʼj tbʼanel ex axixtok (bʼanax) tzaqʼwebʼil kye xjel lu. Tqʼama Jesucristo, aju jun tbʼanel xnaqʼtzal, kyjalu: «Kyqaninxe ex ktzajel qʼoʼn kyeye; kyjyome ex [k]knetel kyuʼne; kyqʼajtzan oke [moqa kytukʼchanke], ex kyjaqetel ttzi ja kywitze» (Mateo 7:7).

⁵ Qa kukx ‹xjyona kyiʼj› tzaqʼwebʼil kye xjel at kyoklen, ok tzul tbʼanel teya (Proverbios 2:1-5). Alkyexku kyyol xjal o tzaj kyqʼamaʼn teya, aʼyeju tzaqʼwebʼil kye xjel lu ateʼ ex jaku che kanet quʼn. Atz atqeʼkuxa toj Tyol qMan Dios ex nya kwest tuʼn tok toj qwiʼ. Nya oʼkxju, ax ikx in tzaj kyqʼuqbʼaʼn qkʼuʼj, ex in qo tzaj kyonin tuʼn qtzalaj toj qanqʼibʼil jaʼlo (jaʼla). Qo xnaqʼtzan tiʼj jun xjel aju in che ximen xjal tiʼj.

6. ¿Tiquʼn in kubʼ kyximen nim xjal qa mitiʼ tkʼuʼj Dios qiʼj?

⁶ Nim xjal in kubʼ kyximen qa mitiʼ tkʼuʼj Dios qiʼj. Naqwit at tkʼuʼj Dios qiʼj che chi, mitiʼwtlo nya bʼaʼn tzalu twitz txʼotxʼ. In qo anqʼin twitz jun txʼotxʼ jatumel in nok nim qʼoj kyxol tnam, jatumel at nim ikʼbʼel ex kʼixkʼej. Qkyaqil in tzaj nya bʼaʼn qiʼj, in qo yabʼti ex in naj jun toj qja. Tuʼntzen  jlu, at junjun xjal in kyqʼamaʼn: «Naqwit at tkʼuʼj Dios qiʼj, owtle tzʼel tiʼn tkyaqil jlu».

7. a) ¿Tiquʼn in xi qʼamet qa at nim kynejel okslal in kyqʼamaʼn qa mitiʼ in tnaʼn Dios aju nya bʼaʼn in tzaj qiʼj? b) ¿Tiʼ in tzaj t-xnaqʼtzaʼnxix Tyol Dios tiʼj nya bʼaʼn in tzaj qiʼj?

⁷ Aju mas nya bʼaʼn twitz jlu, aju in xi kyqʼamaʼn kynejel okslal kye xjal qa mitiʼ in tnaʼn Dios aju nya bʼaʼn in tzaj qiʼj. Ik tzeʼnj aj tok qʼoj kyxol tnam, aj ttzaj tyabʼ jun xjal ex aj tkyim jun xjal; in kyqʼamaʼn kynejel okslal qa a tajbʼil Dios jlu. In kubʼ kyyekʼun tuʼn jlu qa a Dios at tpaj tiʼj tkyaqil nya bʼaʼn in nikʼ twitz txʼotxʼ. ¿Axpetzele tok jlu? ¿Tiʼ in tzaj t-xnaqʼtzaʼnxix Tyol Dios tibʼaj jlu? In tzaj tqʼamaʼn Tyol Dios jlu: «Kyjaʼtzun, aqeye xjal at kynabʼle chin kybʼintze. Ate Dios aju at tipumal tuʼn tbʼant tkyaqil tuʼn mintiʼ in tbʼinchaʼn jun mya bʼaʼn ex [mo]qa aju mya tzʼaqlxix» (kjawil uʼjit Job 34:10-12). A jlu in tzaj tyekʼun, qa nya tuʼn Dios in tzaj nya bʼaʼn twitz txʼotxʼ. Ax tok in tzaj tqʼoʼn Dios ambʼil tuʼn ttzaj nya bʼaʼn, pero junxitl teju in nok bʼinchet jun nya bʼaʼn tiʼj juntl, twitzju naq in xi qʼet ambʼil te.

8, 9. a) ¿Alkye techel jaku kubʼ tqʼoʼna; tuʼn t-xi tqʼamaʼna tiquʼn junxitl teju in nok bʼinchet jun nya bʼaʼn tiʼj juntl, twitzju naq in xi qʼet ambʼil te? b) ¿Tiquʼn nya bʼaʼn tuʼn qyolin nya bʼaʼn tiʼj Dios tuʼnju in tzaj tqʼoʼn ambʼil kye xjal tuʼn tkubʼ kybʼinchaʼn aju nya bʼaʼn?

⁸ Jun techel, ximana tiʼj jun tbʼanel tatbʼaj aju at jun tkʼwaʼl (tkyʼajol) ma chʼiy ex kukx at tja. Qa ma tzʼok jlu te nya bʼaʼn ex qa ma kubʼ t-ximen tuʼn tel bʼet, melay kubʼ ttzyuʼn ttat. Qa ma txi kʼwaʼl lu toj jun nya bʼaʼn bʼe ex qa ma tzʼokx tqʼoʼn tibʼ tjaqʼ nim nya bʼaʼn. ¿Jaku txi tqʼamaʼna qa a manbʼaj at tpaj tiʼj jlu? Mlayx (Lucas 15:11-13). Ax ikx te Dios mitiʼ o tzʼel tiʼn ambʼil kye xjal tuʼn tjaw kyjyoʼn jun nya bʼaʼn kybʼe, pero mitiʼ in tzaj tyekʼun jlu qa a Dios at tpaj tiʼj nya bʼaʼn in tzaj kyiʼj xjal; quʼn aʼyex xjal in che jyon tiʼj. A jlu in tzaj tyekʼun qe, qa nya bʼaʼn tuʼn tok qqʼoʼn tpaj Dios tiʼj tkyaqil nya bʼaʼn in tzaj kyiʼj xjal.

⁹ At tiquʼn in tzaj tqʼoʼn Dios ambʼil kye xjal tuʼn kyxiʼ toj  jun nya bʼaʼn bʼe. Quʼn nim tnabʼil, nim tipumal (tbʼalor) ex a Bʼinchel qe, nya il tiʼj tuʼn ttzaj tqʼamaʼn tiquʼn. Pero in tzaj tqʼamaʼn tuʼnju at tkʼuʼj qiʼj. Toj xnaqʼtzbʼil 11 qo xnaqʼtzal mastl tiʼj tiquʼn in tzaj tqʼoʼn Dios ambʼil te nya bʼaʼn. Jaku tzʼok qʼuqeʼ tkʼuʼja qa nya a Dios at tpaj tiʼj nya bʼaʼn in tzaj qiʼj. In tzaj tqʼamaʼn qMan Dios qa kʼelel tiʼn tkyaqil nya bʼaʼn (Isaías 33:2).

10. ¿Tiquʼn jaku tzʼok qeʼ qkʼuʼj tiʼj Dios qa kʼelel tiʼn tkyaqil yajbʼil in tzaj tuʼn nya bʼaʼn?

¹⁰ Ax ikx xjan te Dios (Isaías 6:3). A t-xilen jlu qa saqxix te Dios ex mitiʼ jun nya bʼaʼn tukʼil. Tuʼntzen jlu, jaku tzʼok qeʼ qkʼuʼj tiʼj Dios, nya ik tzeʼn qe xjal melay tzʼok qʼuqeʼ qkʼuʼj kyiʼj tuʼnju at maj in che ok te eleqʼ. Nixpe aju mas tbʼanel kawil mlay bʼant tuʼn tel tiʼn aju nya bʼaʼn in kubʼ kybʼinchen nya bʼaʼn xjal. Atzen te Dios aju at nimxix tipumal, jaku tzʼel tiʼn tkyaqil yajbʼil in tzaj tuʼn nya bʼaʼn, ok kbʼantel jlu tuʼn. Aj tkubʼ tnajsaʼn nya bʼaʼn, ok kbʼel tnajsaʼn te jun majx (juneleʼx) (kjawil uʼjit Salmo 37:9-11).

11. a) ¿Tzeʼn in nela toj twitz Dios aju nya bʼaʼn in nok bʼinchaʼn tiʼj juntl? b) ¿Tiʼ in tnaʼn Dios aj ttzaj nya bʼaʼn qiʼj?

¹¹ ¿Tiʼ in tnaʼn Dios tuʼnju nya bʼaʼn in tzaj qiʼj? In tzaj t-xnaqʼtzaʼn Xjan Uʼj (Biblia) qa «tzʼaqlxix qe tbʼinchbʼen [Dios ex] tuj tumelxix tkyaqilju in tbʼinchaʼn» (Deuteronomio 32:4). At toklen toj twitz Dios qa bʼaʼn in kubʼ kybʼinchen xjal moqa nya bʼaʼn, in nel tikʼen tkyaqilju nya tzʼaqle moqa aju nya bʼaʼn in nok bʼinchaʼn tiʼj juntl xjal. In tzaj tqʼamaʼn Tuʼjil Tyol qa «tzaj taʼw [moqa tzaj bʼis] tuj tanmi» Dios, tuʼnju kubʼ noj twitz txʼotxʼ tuʼn nya bʼaʼn toj ambʼil ojtxe (Génesis 6:5, 6). Mitiʼ te Dios in chʼexpaj (Malaquías 3:6). Kukx in nel tikʼen aju nya bʼaʼn ex kukx in tzaj qʼaqʼen tkʼuʼj kyiʼj qeju in tzaj nya bʼaʼn kyiʼj. «Ate Dios kwentil kyeye» moqa at tkʼuʼj Dios kyiʼje, chi toj Tyol (kjawil uʼjit 1 Pedro 5:7).

12, 13. a) ¿Tiquʼn ateʼ tbʼanel qmod ik tzeʼn kʼujlabʼil ex tiʼ in qnaʼn tuʼnju at qkʼujlabʼil? b) ¿Tiquʼn jaku tzʼok qʼuqeʼ qkʼuʼj qa kʼelel tiʼn Dios nya bʼaʼn twitz tkyaqil txʼotxʼ?

 ¹² ¿Tiquʼn jaku tzʼok qʼuqeʼ qkʼuʼj qa in tzaj chyon tanmi Dios aj ttzaj nya bʼaʼn qiʼj? In tzaj t-xnaqʼtzaʼn Xjan Uʼj qa kubʼ tbʼinchaʼn Dios xjal te tilbʼilal, atzun juntl yekʼbʼil jlu qa in tzaj chyon tanmi Dios qiʼj (Génesis 1:26). Qa ateʼ tbʼanel qmod, in tzaj tyekʼun jlu qa ax ikx te Dios ateʼ tbʼanel tmod. Jun techel tiʼj jlu, ¿in tzaj qʼaqʼan teya tkʼuʼj tiʼj jun tbʼanel xjal in nok bʼinchaʼn jun nya bʼaʼn tiʼj? Qa in tzaj chyon tanmiya tuʼn jlu, jaku tzʼok qʼuqeʼ tkʼuʼja qa mas in tzaj chyontl te Dios tanmi tuʼn jlu.

¹³ Jun kyxol qeju tbʼanel tmod xjal, aju at tkʼuʼj kyiʼj txqantl. Ax ikx in tzaj tyekʼun jlu qa tilbʼilal Dios qoʼ aju Bʼinchel qe, quʼn in tzaj t-xnaqʼtzaʼn Tyol qa ‹kʼujlalil te Dios› (1 Juan 4:8). In nok qkʼujlan qibʼ tuʼnju in qo ok tkʼujlaʼn Dios. Naqwit at teya tipumal tuʼn tel tiʼna tkyaqil yajbʼil ex nya bʼaʼn in nok bʼinchen tiʼj juntl. ¿Jaku tzʼel tiʼna? ¿Mlaypetzulo tzʼonin tkʼujlabʼila tuʼn tbʼent jlu tuʼna? ¡Jaku! A jlu in tzaj tyekʼun qa jaku tzʼok qʼuqeʼ qkʼuʼj tiʼj Dios qa kʼelel tiʼn tkyaqil nya bʼaʼn at twitz txʼotxʼ. Aju kubʼ t-ẍchʼiʼna toj t-xaq oxe ex waqaq te uʼj lu, jaku tzʼok qʼuqeʼ tkʼuʼja tiʼj, quʼn a Dios o qʼamante ex kjaponel twiʼ tuʼn. Tuʼn tok qʼuqeʼ qkʼuʼj tiʼj jlu, ilxix tiʼj tuʼn tok qojtzqiʼn Dios aju o tzaj tziyente.

14. ¿Alkye tbʼi Dios, ex tiquʼn ilxix tiʼj tuʼn tajbʼen quʼn?

¹⁴ In xi qqʼamaʼn qbʼi qa qajbʼil  (qgan) tuʼn tok ojtzqiʼn qwitz tuʼn juntl xjal. Qkyaqilx at jun qbʼi, ¿at te Dios tbʼi? Nim okslabʼil in kubʼ kyxnaqʼtzaʼn qa ate tbʼi: «Dios» ex «qMan», naqtzen tuʼnj, nya bʼibʼaj qe jlu. Ax tok aju yol «Dios» ex «qMan» ateʼkux toj Tyol Dios, pero ¿alkye te Dios tbʼi? In tzaj tqʼamaʼn Isaías 42:8 kyjalu: «Aqine Jehová [...] atzun nbʼiye, ex mlay waqʼe ambʼil tuʼn tjaw nimsaʼn tbʼi juntl Dios ex tuʼn kyok ten kʼulul kywitz qe tilbʼilal te nxele [moqa te nchʼixele]». Qa mitiʼ in jatz kanet tbʼi Dios toj Xjan Uʼj at tukʼila, bʼaʼn tuʼn tkux tjyoʼna toj chʼintl xnaqʼtzbʼil tok tbʼi: «¿Tiʼ t-xilen ex tiquʼn kʼajbʼel tbʼi Dios?» tiquʼn. Ax tok ajbʼen nimxix maj tbʼi Dios kyuʼn qeju kubʼ kytzʼibʼen Tyol Dios ojtxe.  Tuʼntzun jlu, taj (tgan) Jehová tuʼn tok tojtzqiʼna tbʼi ex tuʼn tajbʼen tuʼna. In najbʼen Xjan Uʼj tuʼn Dios tuʼn tok tojtzqiʼna alkyexix te.

15. ¿Tiʼ t-xilen tbʼi Dios aju Jehová?

¹⁵ Aju tbʼi Dios, Jehová, at nim t-xilen, ax Dios jaw jyonte tuʼn tok te tbʼi. In tzaj tyekʼun bʼibʼaj lu qa jaku japun twiʼ tkyaqil aju o tzaj ttziyen ex tkyaqil aju in kubʼ t-ximen. * Mi aʼl juntl bʼibʼaj jaku kanin tiʼj tbʼi Dios, quʼn oʼkx Dios etzal te bʼibʼaj lu. Mi aʼl juntl ik tzeʼn Jehová. Ok qo xnaqʼtzal tiquʼn junxitl te Jehová.

16, 17. ¿Tiʼ in tzaj t-xnaqʼtzaʼn tiʼj Jehová aʼyeju yol: a) ‹Nimxix Tipumal›? b) ‹Kawil tuj tkyaqil tabʼqʼiyil›? c) ‹Bʼinchel tkyaqil›?

 ¹⁶ In tzaj tqʼamaʼn Salmo 83:18 kyjalu: «Oʼkx aya Dios Maʼxix Toklen». Ax ikx oʼkx te in xi qʼamet ‹Nimxix Tipumal›. In tzaj tqʼamaʼn Apocalipsis 15:3 kyjalu: «Maʼxix qe tbʼinchbʼena ex in qo labʼine kyiʼj, aya qMan Dios at tipumala tuʼn tbʼant tkyaqil tuʼna; tzʼaqlxix qe t-ximbʼetza ex axix tok, aya Rey kyibʼaj kykyaqil nasyon». Aju yol ‹Nimxix Tipumal› in tzaj tyekʼun qa at mas tipen Jehová twitz alkyexku. Mi aʼl juntl jaku kanen tipumal tiʼj Dios. Ax ikx in tzaj tqʼamaʼn 1 Timoteo 1:17 qa ate Dios ‹Kawil tuj tkyaqil tabʼqʼiyil›, in tzaj tyekʼun jlu qe, qa oʼkxku te at te jun majx. In tzaj tqʼamaʼn Salmo 90:2 kyjalu: «Tej naʼnxtoq tbʼinchet enter twitz txʼotxʼ, atxix ojtxi ex tuj tkyaqil tabʼqʼiyil te jumajx, oʼkx aya Dios». ¿Tiʼ teya t-xim tibʼaj jlu?

¹⁷ At juntl tiquʼn oʼkxku Jehová at toklen: tuʼnju oʼkxku te Bʼinchal tkyaqil. In tzaj tqʼamaʼn Apocalipsis 4:11 kyjalu: «Aya qMan Dios, bʼaʼn tuʼn tjaw nimset tbʼiya, ex tuʼn tnimanjtza, ex tuʼn tkʼmonteya ipumalj; porque aya bʼinchante tkyaqil, ex noq tuʼnju tajbʼila ateʼ, ex e bʼinchanjtz». Tuʼn Jehová o kubʼ tbʼinchaʼn tkyaqilju at: tkyaqilju at toj kyaʼj aʼyeju mitiʼ qʼanchaʼlqe, ax ikx qeju qʼanchaʼlqe ik tzeʼn qe cheʼw in che qoptzʼaj twitz kyaʼj, qe twitz tzeʼ in che el chʼiy, qe kiẍ ateʼkux toj mar ex toj nimaʼ.

18. ¿Tiquʼn in kubʼ kyximin junjun xjal qa melayx che pon laqʼeʼ ttxlaj Dios, pero tiʼ in tzaj t-xnaqʼtzaʼn Tyol Dios?

¹⁸ At junjun in tzaj chʼin tchiyel kyiʼj kyuʼn qeju tbʼanelxix tmod Jehová. In kubʼ kyximin qa melay che pon laqʼeʼ ttxlaj Jehová tuʼnju tzmax toj kyaʼj najle ex in kubʼ kyximan qa mitiʼ tkʼuʼj kyiʼj. ¿Jaku txi qqʼamaʼn qa bʼaʼn aju ximbʼetz lu? Junxitl te Tyol Dios in tzaj t-xnaqʼtzaʼn, in tzaj tqʼamaʼn qa «mya najchaq taʼ [Jehová] ttxlaj junjun qe» (Hechos 17:27).  Axpe ikx in tzaj tqʼoʼn txokbʼil lu qe: «Che laqʼexe ttxlaj Dios, ax ikx te ktzajel laqʼeʼ kyukʼile» (Santiago 4:8).

19. a) ¿Tiʼ kbʼantel quʼn tuʼn qpon laqʼeʼ ttxlaj Dios ex tiʼ tzul qʼoʼn qe qa ma bʼent jlu quʼn? b) ¿Alkyeqe tmod Dios mas tbʼanel in che ela toj twitza?

¹⁹ ¿Tiʼ teya kbʼantel tuʼn, tuʼn tpon laqʼeʼya ttxlaj Dios aju Bʼinchal tkyaqil? Miʼ kyaj ttzaqpiʼna aju in bʼent tuʼna jaʼlo: tzʼok tililx tuʼna tuʼn tok tojtzqiʼna qMan Dios. Tqʼama Jesús jlu: «Ex atzun chwinqlal jlu te jumajx, tuʼn tojtzqinjtza kyuʼn, oʼkx aya jun Dios axix tok, ex tuʼn wojtzqinjtze kyuʼn, aqine Jesucrist ma chin tzaj t-samaʼna» (Juan 17:3). Ik tzeʼnj in tzaj t-xnaqʼtzaʼn Tyol Dios, qa ma tzʼok qojtzqiʼn Jehová ex Jesús jaku qo ‹anqʼin te jun majx›. Ma qo xnaqʼtzan tiʼj qa ‹kʼujlalil te Dios› (1 Juan 4:16). Pero at txqantl tbʼanelxix tmod Jehová. In tzaj tqʼamaʼn toj Tyol qa ‹at nim tqʼaqʼbʼil tkʼuʼj, in tzʼeʼy tkʼuʼj, yaj in tzaj tqʼoj, nim tkʼujlalil, ex axix tok yolin› (Éxodo 34:6). Jun ‹tbʼanel Dios te ex in kubʼ tnajsaʼn kyil xjal› (Salmo 86:5). «At tpasens qiʼj.» (2 Pedro 3:9.) ‹Tzʼaqlxix tukʼil ju xjal tzʼaqlxix.› (Salmo 18:25.) Qa kukx xnaqʼtzana tiʼj Tyol Dios, ok kʼelel tnikʼa qa o tzaj tyekʼun Jehová aʼyeju tbʼanelxix tmod lu ex txqantl.

20-22. a) ¿Jaku txi qqʼamaʼn qa mlay qo ok laqʼeʼ ttxlaj Dios tuʼnju nya qʼanchaʼl? b) ¿Tiʼ jaku tzaj kyqʼamaʼn xjal teya, pero alkye mas bʼaʼn tuʼn tbʼant tuʼna?

²⁰ Ax tok mlay qil, moqa mlay qlom Dios, quʼn jun xewbʼaj te moqa mitiʼ qʼanchaʼl (Juan 1:18; 4:24; 1 Timoteo 1:17). Pero in tzaj tqʼamaʼn Xjan Uʼj tzeʼnxix te Dios. Ax ikx teya ok kʼokel tojtzqiʼna qa «tbʼanilxix te» Jehová ik tzeʼnj tqʼama David (Salmo 27:4; Romanos 1:20). Aj tok tojtzqiʼna Jehová, jun xjalxix kʼelel toj twitza, ex ok ktel mas tkʼujlabʼila tiʼj.

²¹ Chebʼe (chabʼa) kʼokel toj twiʼya tiquʼn in tzaj tqʼamaʼn Tyol Dios qa ik Jehová ik tzeʼn jun qtat (Mateo 6:9). Nya oʼkx o tzaj tqʼoʼn qchwinqlal ax ikx tajbʼil tuʼn qanqʼin toj tbʼanel, ik tzeʼn jun tbʼanel xjal taj tuʼn kyten tkʼwaʼl toj tbʼanel  (Salmo 36:9). In tzaj t-xnaqʼtzaʼn Tyol Dios qa jaku qo ok te tamiw Jehová (Santiago 2:23). ¡Naqpe ximana tiʼj jlu: jaku tzʼoka te tamiw Dios aju Bʼinchel tkyaqil!

²² Aj t-xnaqʼtzana mas tiʼj Tyol Dios, atle xjal jaku tzaj tqʼamaʼn teya tuʼn tkyaj ttzaqpiʼn t-xnaqʼtzbʼila. Jakulo bʼant jlu kyuʼn tuʼnju nya kyajbʼil tuʼn tkubʼ tchʼexpuʼn tokslabʼila (tnimbʼila). Miʼn txi tqʼoʼna ambʼil te alkyexku tuʼn miʼn toka te tamiw qMan Dios, aju mas tbʼanel qamiw jaku ten.

23, 24. a) ¿Tiquʼn miʼn tzaj xobʼa tuʼn t-xi tqanina aju mitiʼ in nok toj twiʼya? b) ¿Tiʼ kbʼel qxnaqʼtzaʼn toj juntl xnaqʼtzbʼil?

²³ Aj t-xi tzyet t-xnaqʼtzbʼila atlo junjun tiʼchaq miʼ tzʼok toj twiʼya tnejel. Pero miʼ tzaj xobʼa tuʼn t-xi tqanina onbʼil. Tqʼama Jesús qa bʼaʼn tuʼn tkubʼ qiʼn qibʼ ik tzeʼn jun tal kʼwaʼl (Mateo 18:2-4). Ma qo xnaqʼtzaʼn tiʼj qa nim xjel in xi kyqanin tal kʼwaʼl. Taj Dios tuʼn kykanet tzaqʼwebʼil tuʼna. In tzaj tqʼamaʼn Xjan Uʼj qa e ten junjun xjal aʼyeju kygantaq tuʼn tok kyojtzqiʼn Dios. Tuʼntzen jlu, e ok ten xnaqʼtzal tiʼj Tyol Dios tuʼn tkyaqil kyanmi tuʼntzun tel kynikʼ qa ax tok aju in kubʼtaq kyxnaqʼtzaʼn (kjawil uʼjit Hechos 17:11).

²⁴ Jun tbʼanel tumel tuʼn tok qojtzqiʼn Jehová aju qa ma qo xnaqʼtzaʼn tiʼj Tyol, aju jun uʼj junxitl kywitz txqantl. ¿Tiquʼn junxitl? Ok kbʼel qxnaqʼtzaʼn toj juntl xnaqʼtzbʼil.