O TZAJ qʼamaʼn kye okslal tuʼn tkubʼ kynaʼn Tkyimlebʼil Jesús, ax ikx in nok qʼoʼn tbʼi jlu te «wabʼj kyaj tmaʼn Qajaw» (1 Corintios 11:20). ¿Tiquʼn ilxix tiʼj tuʼn tkubʼ ikʼset jlu? ¿Jteʼ maj in kubʼ ikʼset toj abʼqʼi ex alkye tten?

Kubʼ tikʼsaʼn Jesús jlu toj qonikʼan te Xjan Qʼij toj abʼqʼi 33 tiʼj ambʼil iqʼin quʼn jaʼlo (jaʼla). Aju Xjan Qʼij naq jun maj in kubʼtaq ikʼsaʼn toj jun abʼqʼi, toj 14 te nisán (aju nisán jun xjaw in najbʼentaq kyuʼn aj judiy). Aju t-xjawil nisán in xitaq tzyet aj tjaʼwil akʼaj xjaw (qyaʼ) otaqxi tzikʼ junjun qʼij tibʼajxi tnejel seman te marzo. Toj ambʼil aj tqʼanchaʼlix akʼaj xjaw, in xitaq tzyet tnejel qʼij te t-xjawil Nisán. Ajtzun tikʼtl 13 qʼij, in kubʼtaq kyikʼsaʼn judiy Xjan Qʼij.

Toj qonikʼan aju, kubʼ tikʼsaʼn Jesús Xjan Qʼij kyukʼe t-apóstol, tej tex bʼet Judas Iscariote e waʼn tiʼj Wabʼj te qale. Aju wabʼj lu ok te t-xel (tchʼixel) Xjan Qʼij aju in kubʼtaq kyikʼsaʼn judiy, tuʼntzen jlu, junx maj in kubʼ ikʼset Wabʼj te Qale toj jun abʼqʼi.

 In tzaj tqʼamaʼn Mateo jlu: «Tzaj ttzyuʼn Jesús pan, xi tqʼoʼn chjonte te Dios ex kubʼ tpiẍkʼuʼn, xi tqʼoʼn kye t-xnaqʼtzbʼen, ex xi tmaʼn: —kytzyunxe ex kywaʼnxe; atzun [‹techlal› *] nximlale jlu. Ex tzaj ttzyuʼn jun vas xi tqʼoʼn chjonte te Dios, xi tqʼoʼn kye, ex xi tmaʼn: —kykʼanxe jlu kykyaqile, porque atzun [‹techel›*] nchkʼele jlu te kyuwsabʼl te akʼaj yol, aju ma kyaj bʼant tiʼj tuʼn Dios kyukʼile; atzun nchkʼele kʼelel chitj tuʼn kylaj nimku [moqa bʼampo] xjal, tuʼn tnajset kyil» (Mateo 26:26-28).

At junjun xjal in kubʼ kyximan qa ok tchibʼjal Jesús te pan ex qa ok tchkʼel te vino. Pero nya ik ttenju, quʼn tej t-xi tqʼoʼn Jesús pan kye t-apóstol entertaq taʼ t-ximlal (tchibʼjil). ¿Jaku txi qʼamet qa xi kywaʼn apóstol tchibʼjal Jesús ex qa xi kykʼaʼn tchkʼel? Melay, quʼn nya bʼaʼn tuʼn t-xi tchyoʼn jun xjal tchibʼjal juntl xjal ex mitiʼwtle japun tley Dios kyuʼn (Génesis 9:3, 4; Levítico 17:10). Toj Lucas 22:20 tqʼama Jesús jlu: «Aju tkuʼx tuj vas lu, atzun [‹techel›*] akʼaj yol ma kyaj bʼant tiʼj tuʼn Dios kyukʼile, ex aju nchkʼele kʼelel chitj te kolbʼil kyeye, atzunju kʼokel te kyuwsabʼl teju yol lu». ¿Ok aju tkuʼx toj vas te akʼaj yol kyaj bʼant tiʼj? Mitiʼ (tiloʼ), quʼn aju yol kyaj bʼant tiʼj jun trat jlu; nya jun tiʼ aju qʼanchaʼl.

A jlu in tzaj tyekʼun qa aju pan ex aju vino naq in che kubʼ qʼoʼn te techel. Aju pan in nok te techel t-xmilal Jesús aju mitiʼ il toj. Ajbʼen jun pan tuʼn Jesús aju kyaj tiʼj Wabʼj te qale te Xjan Qʼij, aju mitiʼ kux qʼoʼn ttxʼamil moqa mitiʼ kux qʼoʼn t-samel tuʼn tjaw mal tkʼuʼj (Éxodo 12:8). Chʼixmi tkyaqil maj, in najbʼen ttxʼamel, moqa t-samel, pan tuʼn Tyol Dios te techel il ex te techel aju in kubʼ qʼay. A jlu in tzaj tyekʼun qa aju pan ok te techel t-ximlal Jesús tej t-xi tqʼon tibʼ, aju xmilal lu mitiʼxtaq il toj (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Aju vino kyaq twitz in nok te techel tchikʼel Jesús, aju kyaj bʼant tiʼj akʼaj yol tuʼn. Tqʼama Jesús qa oktaq kʼelel chitj tchkʼel «tuʼn tnajset kyil» xjal. Tuʼn chikʼ lu, saq in che ela junjun xjal toj twitz Jehová ex at kyoklen tiʼj akʼaj yol kyaj bʼant tiʼj (Hebreos 9:14; 10:16, 17). Tuʼnju yol kyaj bʼant tiʼj, ok che xel 144.000 tbʼanel xjal toj kyaʼj. Atz toj kyaʼj ok che okel te kawil ex te pal tuʼn kyonin kyiʼj  kykyaqil xjal (Génesis 22:18; Jeremías 31:31-33; 1 Pedro 2:9; Apocalipsis 5:9, 10; 14:1-3).

¿Alkyeqe at kyoklen tuʼn kywaʼn tiʼj pan ex tuʼn kykʼaʼn tiʼj vino aʼyeju in che kubʼ qʼet toj ikʼsbʼel tkyimlen Jesús? Ik tzeʼn ma qo xnaqʼtzan tiʼj, oʼkx qeju at kyoklen tiʼj akʼaj yol kyaj bʼant tiʼj, moqa aʼyeju ok che xel toj kyaʼj. Aju t-xew Dios in xi tqʼamaʼn kye qa ma che jaw jyoʼn tuʼn kyok te ajkawil toj kyaʼj (Romanos 8:16). Ax ikx at kyoklen qeju xjal lu tiʼj yol kyaj bʼant tiʼj tuʼn kykawin tukʼe Jesús (Lucas 22:29).

¿Tiʼ in bʼant kyuʼn qeju ok che anqʼil te jun majx (juneleʼx) aj tok Txʼotxʼ te jun tbʼanel najbʼil? Ik tzeʼn kyaj tqʼamaʼn Jesús, in che ten aj tkubʼ ikʼset Wabʼj te Qale, iktzen tten in kubʼ kyyekʼun qa nim toklen jlu kye, maske mitiʼ in che waʼn tiʼj pan ex mitiʼ in che kʼan tiʼj vino. Junx maj toj abʼqʼi in kubʼ kyikʼsaʼn testigos de Jehová aju Wabʼj te Qale te Jesús, aj tkux bʼaj Qʼij, atz toj ambʼil lu in xi tzyet 14 te nisán. Inchq nya nim kybʼet xjal in kyqʼamaʼn qa che xel toj kyaʼj, aju ikʼsbʼel Wabʼj lu nimxix toklen kye kykyaqil okslal. Atzun jun ambʼil jlu tuʼn kyximan tiʼj nimxix tkʼujlabʼil Jehová ex Jesucristo (Juan 3:16).