1, 2. ¿Jatumel jaku qoʼx klol qibʼ?

XIMANA tiʼj jlu, ma tzʼexa bʼetel, pero naq minabʼen ma tzaj yupj twitz kyaj ax ikx ma tzaj qoptzʼaj ex tinin twitz kyaʼj ex ma txi tzyet tuʼn ttzaj nimxix jbʼal. Ok kʼelel lipena tuʼn t-xiʼya jyol jun tembʼil jatumel kʼokex tklon tibʼa. Aj t-xi tqʼoʼn twitza tiʼj, lu jun tembʼil jatumel tuʼn t-xmuʼjina ex mitiʼ in kuʼtz aʼ toj. ¡In tzalaja tuʼnju ma kanet jlu tuʼna!

² In qo anqʼin jaʼlo toj jun ambʼil nya bʼaʼn jatumel at nim (bʼampo) xobʼajil, quʼn aju in nikʼ twitz txʼotxʼ xiʼni t-xiʼ toj il. Pero at jun klol qe aju jaku qo tzaqpaj tuʼn tiʼj tkyaqil nya bʼaʼn jaku tzaj qiʼj. ¿Alkye? Qbʼinx aju in tzaj tqʼamaʼn Tyol Dios: «Kxel nmaʼne te Qman [Jehová] kyjaʼ: Aya jun ja kyuw bʼinchbʼen te jatum tuʼn tokx nklon wibʼe, aya Ndiose qʼuql nkʼuʼje tiʼja» (Salmo 91:2).

3. ¿Tiʼ kbʼantel quʼn tuʼn tkolin Jehová qiʼj?

³ A Jehová aju Bʼinchel tkyaqil ex aju nim Toklen tibʼaj tkyaqil, jaku kolin qiʼj. ¡Tbʼanelxix jlu! Mas nim tipumal (tbʼalor) twitz  alkyexku xjal ex alkyexku tiʼchaq aju jaku tzaj nya bʼaʼn qiʼj tuʼn. Qa ma tzʼok bʼinchen nya bʼaʼn qiʼj, jaku tzʼel tiʼn Jehová tkyaqil nya bʼaʼn lu. ¿Tiʼ kbʼantel quʼn tuʼn tkolin Jehová qiʼj? Il tiʼj tuʼn tok qʼuqeʼ qkʼuʼj tiʼj. Nya oʼkxju, ax ikx in tzaj tqʼoʼn Tyol Dios txokbʼil lu qe: «Ax che tenkje tuj tkʼujlalil Dios» (Judas 21). A jlu in tzaj tyekʼun qa mitiʼ (tiloʼ) tuʼn tkyaj qtzaqpiʼn tkʼujlabʼil Dios ex tuʼn kukx qten ttxlaj. Qa ma bʼent jlu quʼn, jaku tzʼok qʼuqeʼ qkʼuʼj qa ok kkolel qiʼj. Pero ¿tzeʼn jaku ten tbʼanel qxol tukʼil qMan Dios?

4, 5. ¿Alkyechaq yekʼbʼil at qa kʼujlaʼn qoʼ tuʼn Dios?

⁴ Nim tten o tzaj tyekʼun Jehová tkʼujlabʼil qiʼj. ¿Alkyechaq tten? Qo xnaqʼtzan juntl maj kyiʼj, quʼn a jlu kʼonil qiʼj tuʼn qkyaj ten toj tkʼujlabʼil Dios. Bʼaʼn tuʼn t-ximana tiʼj junjun xnaqʼtzbʼil tkuʼx toj Tyol Dios aju o xnaqʼtzaʼna tiʼj toj uʼj lu. Tuʼn qanqʼin o tzaj tqʼoʼn Dios jun tbʼanelxix qnajbʼil, aju Txʼotxʼ, atz jatumel at nim awal, aʼ, txkup, ex at junjun plaj twitz txʼotxʼ tbʼanel in nela toj qwitz ex txqantl tiʼchaq in najbʼen qe. Ax ikx ojtzqiʼn quʼn qa a Dios o qʼamante tkyaqilju tkuʼx toj Xjan Uʼj (Biblia), atz toj in tzaj tqʼamaʼn qe tiʼ tbʼi ex alkyeqe tmod at. In tzaj tqʼamaʼn Xjan Uʼj qa tzaj t-samaʼn Dios tKʼwaʼl (tKyʼajol) tzalu twitz Txʼotxʼ ex tzaj tqʼoʼn ambʼil tuʼn tikʼx tkyaqil nya bʼaʼn tuʼn ex tuʼn tkyim tuʼn qpaj (Juan 3:16). Iktzen tten tzaj tqʼoʼn jun tbʼanel oyaj qe, tuʼn jlu at jun qʼuqbʼil qkʼuʼj tiʼj jun tbʼanel ambʼil chʼix tul.

⁵ Aju ambʼil lu ax ikx at toklen tukʼe jun kawbʼil o kubʼ tqʼoʼn Jehová toj kyaʼj ex o txi tqʼoʼn toj tqʼabʼ Jesucristo. Ya chʼixtl tpon ambʼil tuʼn tel tiʼn Kawbʼil lu tkyaqil nya bʼaʼn in tzaj qiʼj ex tuʼn tok Txʼotxʼ tuʼn te jun tbʼanel najbʼil. ¡Tbʼanelxix jlu! Aj tul ambʼil lu, ¡ok qo tzalajel ex ok qo anqʼil te jun majx (juneleʼx)! (Salmo 37:29). Akux in qo ayon tiʼj ambʼil lu, in che onin qeju tkawbʼil Dios qiʼj tuʼn qten chʼin toj  tbʼanel. Ax ikx o tzaj tqʼoʼn Jehová juntl oyaj (kotz) qe: aju naʼj Dios, a jlu in tzaj tqʼoʼn ambʼil qe tuʼn qyolin tukʼil toj tkyaqil ambʼil. Aʼye jlu naq junjun yekʼbʼil tiʼj tkʼujlabʼil Dios at qiʼj.

6. ¿Tiʼ teya kbʼantel tuʼn tuʼnju o tzaj tyekʼun Dios tkʼujlabʼil tiʼja?

⁶ Atzun jaʼlo (jaʼla), il tiʼj tuʼn t-ximana tiʼj jlu: «¿Tiʼ weʼ kbʼantel wuʼn tuʼnju ma tzaj tyekʼun Dios tkʼujlabʼil wiʼje?». Atlo nim xjal jaku kyqʼama jlu: «Tuʼn tok qkʼujlaʼn Jehová». ¿Ik teya t-ximju? Tqʼama Jesús alkye kawbʼil mas nim toklen tej tqʼama jlu: «Kykʼujlame Qman Dios tuʼn tkyaqil kyanmiye ex tuʼn tkyaqil kykʼuʼje ex tuʼn tkyaqil kynabʼle» (Mateo 22:37). At nim tiquʼn kʼokel tkʼujlaʼna Jehová. Pero tuʼn tok qkʼujlaʼn Jehová tuʼn tkyaqil qanmi, tuʼn tkyaqil qkʼuʼj ex tuʼn tkyaqil qnabʼil, nya oʼkx tuʼn tten qkʼuʼj tiʼj.

7. ¿Tzeʼn jaku kubʼ qyekʼun aju axix qkʼujlabʼil tiʼj Dios?

⁷ In tzaj tyekʼun Xjan Uʼj qa nya oʼkx tuʼn tok qkʼujlaʼn Dios. Quʼn aju ax tok (bʼanax) qkʼujlabʼil ilxix tiʼj tuʼn tkubʼ qyekʼun. Tuʼn tok jlu toj qwiʼ, qqʼonku jun techel: qa taj teya jun mansan, ¿jaku tzalaja qa oʼkx saj qʼoʼn jun ijaj (iyaj) teya? Melay. Ax tok nim toklen jun ijaj tuʼn tchʼiy jun wiʼ mansan, pero taj teya jun twitz nya oʼkx jun ijaj. Ax tzʼelpena qkʼujlabʼil tiʼj Jehová: ik tzeʼn jun ijaj, il tiʼj tuʼn tchʼiy ex tuʼn tel twitz. In tqʼamaʼn Tyol Dios jlu: «Qa kʼujlaʼn Dios quʼn, che japunel qe tmandamyent quʼn; ex qe tmandamyent mya kyuw qe», toj juntl yol, nya jun iqtzqe (1 Juan 5:3). A jlu in tzaj tyekʼun qa aju axix (bʼanax) qkʼujlabʼil tiʼj Dios kbʼel qyekʼun kyukʼe tbʼanel qbʼinchbʼen ik tzeʼn jun tzeʼ in nel tbʼanel twitz (kjawil uʼjit Mateo 7:16-20).

8, 9. ¿Tzeʼn in kubʼ qyekʼun qa kʼujlaʼn Dios quʼn ex qa in xi qqʼoʼn chjonte tiʼj tkyaqil o bʼant tuʼn?

⁸ Qa ma che okx qbʼiʼn tkawbʼil qMan Dios, in kubʼ qyekʼun  qa kʼujlaʼn quʼn. Nyaxix kwest qe jlu, quʼn aʼyeju tkawbʼil Jehová nya jun iqtzqe ex o che kubʼ ximen tuʼn kyonin qiʼj tuʼn qanqʼin toj tzalajbʼil (Isaías 48:17, 18). Qa ma txi qqʼoʼn ambʼil te Jehová tuʼn ttzaj tyekʼun qbʼe, in kubʼ qyekʼun qa in xi qqʼoʼn chjonte tiʼj tkyaqilju o bʼant tuʼn. Pero bʼisbʼajil tuʼnju nya nim xjal in xi kyqʼoʼn chjonte tiʼj tkyaqilju o tzaj tqʼoʼn Dios qe. Nya qaj (nya qgan) tuʼn qok ik tzeʼn junjun xjal toj ambʼil te Jesús, aʼyeju mitiʼ xi kyqʼoʼn chjonte. Toj jun maj, e kubʼ tqʼanin Jesús lajaj xjal yabʼqetaq tuʼn txʼaʼk, naqtzen tuʼnj, oʼkx jun xjal meltzʼaj qʼol chjonte (Lucas 17:12-17). Qaj tuʼn qok ik tzeʼn xjal lu, ex nya ik tzeʼn qeju bʼeljaj xjal aʼyeju mitiʼ e meltzʼaj qʼol chjonte.

⁹ ¿Alkyeqetzun tkawbʼil Jehová ilxix tiʼj tuʼn kyokx qbʼiʼn? At junjun o qo xnaqʼtzan kyiʼj toj uʼj lu. Pero qo xnaqʼtzan chʼintl kyiʼj junjun, quʼn qa ma chex qbʼiʼn tkawbʼil Dios, a jlu kʼonil qiʼj tuʼn miʼ tkyaj qtzaqpiʼn tkʼujlabʼil qMan Dios.

10. ¿Tiquʼn kukx kʼokel tilil quʼn tuʼn tok qojtzqiʼn Jehová?

¹⁰ Nim toklen tuʼn tok qojtzqiʼnxix Jehová, quʼn a jlu kʼonil qiʼj tuʼn qxi laqʼeʼ mas ttxlaj. Miʼ kyaj ttzaqpiʼna tuʼn tok tojtzqiʼna Jehová. Ximana tiʼj jlu, toj jun qonikʼan atz taʼya toj kʼul ex at nim cheʼw, tuʼntzen jlu ma kubʼ tqʼoʼna qʼaqʼ tuʼn tmeqʼtiya tuʼn. ¿Jaku txi tqʼoʼna ambʼil tuʼn tkubʼ yupj qʼaqʼ? Mlayx. Oklo kʼokex tqʼoʼna mas siʼ tuʼntzun miʼ tkubʼ yupj qʼaqʼ, quʼn jakule kyima qa mitiʼ xbʼent jlu tuʼna. Ik tzeʼn siʼ kukx in kʼant qʼaqʼ tuʼn, ax ikx qojtzqibʼil kukx in chʼiy qkʼujlabʼil tuʼn tiʼj Jehová (Proverbios 2:1-5).

11. ¿Tiʼ kynaʼ qeju lepcheqeʼktaq tiʼj Jesús tej t-xi tqʼamaʼn junjun xnaqʼtzbʼil kye?

¹¹ Tajtaq Jesús tuʼn tchʼiy kykʼujlabʼil t-xnaqʼtzbʼen tiʼj Jehová ex tiʼj axix tok tkuʼx toj Tyol. Tej tjaw anqʼin Jesús xi tqʼamaʼn kye kabʼe t-xnaqʼtzbʼen junjun yol kyaj qʼamaʼn toj Tyol Dios aju otaq japun twiʼ tuʼn. ¿Tiʼ kynaʼ tuʼn jlu? Yajxitl, kyqʼama jlu: «Ax tok ma qnaʼ jun tzalajbʼil tuj qanmi tej matoq in yolin qukʼil tuj bʼe ex tej saj ttxʼolbʼaʼn aju tzʼibʼan tuj Tuʼjil» (Biblia) (Lucas 24:32).

12, 13. a) ¿Tiʼ o bʼaj tiʼj kykʼujlabʼil nimku xjal tiʼj Jehová ex tiʼj Tyol? b) ¿Tiʼ kbʼantel quʼn tuʼn miʼ tkubʼ yupj qkʼujlabʼil?

¹² Tej in xnaqʼtzantaqa tiʼjju in tzaj t-xnaqʼtzaʼnxix Tyol Dios, axlo ikx tnaʼ teya jun tzalajbʼil toj tanmiya ex tenle mas tkʼujlabʼila tiʼj Dios. At nim xjal o kynaʼ jlu. Pero aju mas kwest aju tuʼn kukx tten ex tuʼn kukx tchʼiy qkʼujlabʼil tiʼj Dios. Nya qaj tuʼn qok ik tzeʼn «nimku xjal [mitiʼtl] kykʼujlalil kyxolx», ik tzeʼn kyaj tqʼamaʼn Jesús (Mateo 24:12). ¿Tiʼ teya kbʼantel tuʼn, tuʼn miʼ tchewix tkʼujlabʼila tiʼj Jehová ex tiʼj axix tok tkuʼx toj Tyol?

¹³ Kukx tzʼok tilil tuʼna tuʼn tok tojtzqiʼna Jehová ex Jesucristo (Juan 17:3). Ximana tiʼjju in kux tuʼjina toj Tyol Dios ex xjelunkuya: «¿Tiʼ in tzaj tyekʼun jlu tiʼj Jehová? ¿Jaku tzʼonin jlu wiʼje tuʼn tok nkʼujlaʼne tuʼn tkyaqil wanmiye, tuʼn tkyaqil nkʼuʼje ex tuʼn tkyaqil nnabʼile? (kjawil uʼjit  1 Timoteo 4:15). Qa ma bʼent jlu tuʼna, mlayx kubʼ yupj tkʼujlabʼila tiʼj Jehová.

14. ¿Tiquʼn kukx qo yolel tukʼil Jehová?

¹⁴ Aju juntl in nonin qiʼj tuʼn miʼ tkubʼ yupj qkʼujlabʼil tiʼj Jehová aju qa ma qo naʼn Dios tkyaqil qʼij (1 Tesalonicenses 5:17). O xnaqʼtzan tiʼj toj xnaqʼtzbʼil 17 qa aju naʼj Dios jun oyaj o tzaj tqʼoʼn Jehová qe. Qa kukx xqo yolin tukʼe jun xjal ex qa ax tok quʼn, kukx ktel tbʼanel qxol tukʼe. Ax ikx qa kukx xqo yolin tukʼil Jehová toj naʼj Dios kukx ktel tbʼanel qxol tukʼe. Mitiʼ tuʼn t-xi qqʼamaʼn ax qyolju toj qnaʼj Dios. Ok qo yolel tukʼil Jehová ik tzeʼn aj tyolin jun kʼwaʼl tukʼe ttat. Ax tok, ok kbʼel qiʼn qibʼ aj qyolin tukʼil Jehová, pero kxel qqʼamaʼn tkyaqilju in qnaʼn, tkyaqilju tkuʼx toj qanmi ex ax tok quʼn (Salmo 62:8). A jlu in tzaj tyekʼun qa tuʼn qajbʼen te Dios, ilxix tiʼj tuʼn qxnaqʼtzan qjunalx tiʼj Tyol ex tuʼn qnaʼn Dios tuʼn tkyaqil qkʼuʼj. Aj jlu kʼonil qiʼj tuʼn qkyaj ten toj tkʼujlabʼil qMan Dios.

15, 16. ¿Tiquʼn jun qoklen ex jun qʼinumabʼil aju tuʼn t-xi qqʼamaʼn tbʼanel tqanil tiʼj tKawbʼil Dios?

¹⁵ Aju xnaqʼtzbʼil tiʼj Tyol Dios ex aju naʼj Dios at kyoklen tukʼeju in qo ajbʼen te Dios qjunalx. Atzun jaʼlo qo yolen tiʼj jun tiʼ in bʼent quʼn kyukʼe txqantl xjal: aju tuʼn qyolin tiʼjju o tzʼok qojtzqiʼn. ¿O yolin teya tiʼjju in tzaj t-xnaqʼtzaʼn Tyol Dios tukʼil jun xjal? Qa oje, olo tzalaj teya tiʼj jun tbʼanel qoklen in tzaj tqʼoʼn Dios (Lucas 1:74). Qa ma txi qqʼamaʼn kye txqantl xjal aju o qo xnaqʼtzan tiʼj, in japun quʼn aju o tzaj qʼamaʼn kye kykyaqil axix okslal (nimil): aju tuʼn t-xi kyqʼamaʼn tbʼanel tqanil tiʼj tKawbʼil Dios (kjawil uʼjit Mateo 24:14; 28:19, 20).

¹⁶ Tuʼnju nimtaq toklen pakbʼabʼil te apóstol Pablo ok tqʼoʼn te jun qʼinumabʼil (2 Corintios 4:7). Aj qyolin tiʼj Jehová ex kyiʼj t-xim atzen mas tbʼanel aqʼuntl jlu jaku bʼant quʼn. Tnejel, tuʼnju in qo ajbʼen teju mas tbʼanel tajaw  aqʼuntl ex tkabʼ, tuʼnju in tzaj nim tbʼanel tuʼn jlu. Aj qyolin kyukʼe xjal tiʼj Tyol Dios in qo onin kyiʼj qeju xjal at jun tbʼanel kyanmi tuʼn kyok laqʼeʼ ttxlaj Dios ex tuʼn kyokx toj bʼe aju in xiʼ toj chwinqlal (anqʼibʼil) te jun majx. ¡Mitiʼ juntl aqʼuntl jaku qo tzalajxix tuʼn! Ax ikx aj qyolin tiʼj Jehová ex  tiʼjju tkuʼx toj Tyol, in chʼiy qʼuqbʼil qkʼuʼj ex qkʼujlabʼil tiʼj Jehová. Nim toklen toj twitz Jehová qa ma tzʼok tilil quʼn (Hebreos 6:10). Ik tzeʼn ma qo xnaqʼtzan tiʼj, qa ma tzʼok tilil quʼn tuʼn tbʼent aqʼuntl lu, ok kʼonil qiʼj tuʼn miʼ tkyaj qtzaqpiʼn aju tkʼujlabʼil qMan Dios (kjawil uʼjit 1 Corintios 15:58).

17. ¿Tiquʼn ilxix tiʼj tuʼn t-xi qʼamet aju tbʼanel tqanil tiʼj tkawbʼil Dios?

¹⁷ Bʼaʼn tuʼn ttzaj qnaʼn qa ilxix tiʼj tuʼn t-xi qʼamet aju tKawbʼil Dios. In tzaj tqʼamaʼn Tyol Dios jlu: «Tuʼn t-xi tpakbʼaʼna tyol Dios, noq bʼanin ttena» (2 Timoteo 4:2). ¿Tiquʼn ilxix tiʼj tuʼn tbʼent aqʼuntl lu jaʼlo? Tuʼnju in tzaj tqʼamaʼn Tyol Dios jlu qe: «Niqaʼ taʼ tuʼn tul kanun ju nintz tqʼijlalil jwisi tuʼn Qman. Niqaʼ taʼ, lu tzul naj» (Sofonías 1:14). Ax tok ya chʼix tpon ambʼil tuʼn tkubʼ tnajsaʼn Jehová tkyaqilju nya bʼaʼn in bʼaj twitz txʼotxʼ. ¡Ilxix tiʼj tuʼn tok kybʼiʼn xjal jlu! Ilxix tiʼj tuʼn tel kynikʼ qa a ambʼil jlu tuʼn tokx kybʼiʼn Jehová aju at toklen tuʼn tkawin, quʼn aju xitbʼil tzul «mlay tzikʼx tiʼj», moqa nya yaj tzul (Habacuc 2:3).

18. ¿Tiquʼn qo ajbʼel te Jehová junx kyukʼe axix okslal?

¹⁸ Taj Jehová tuʼn qajbʼen te junx kyukʼe qeju axix tok okslal. Kyjuʼtzun, in tzaj tqʼamaʼn Tyol kyjalu: «Qo ximan tiʼj tuʼn [qonin] qibʼ qxolx tuʼn qkʼujlante qibʼ ex tuʼn qbʼinchante bʼaʼn. Ex miʼn txi qkolin tuʼn tok qbʼuyin qibʼ, ik tzaʼn junjun ma che naqʼet mintiʼ in nnoʼk kybʼuyin kyibʼ; pero qqʼom qnabʼl qxolx, axixpe jlu tuʼn qbʼinchante, porque in laqʼex ttzaj tqʼijlalil» (Hebreos 10:24, 25). Aj tok qchmon qibʼ junx kyukʼil qerman atzen jun ambʼil jlu tuʼn tjaw qnimsen Jehová ex tuʼn qajbʼen te. Ax ikx in nok qqʼuqbʼan qkʼuʼj ex in qo onin qibʼ qxolx.

19. ¿Tiʼ kbʼantel quʼn tuʼn tten mas qkʼujlabʼil kyiʼj qerman?

¹⁹ Aj tok qchmon qibʼ kyukʼe txqantl tmajen Jehová, in nok qkʼujlan qibʼ ex in nok qamiwen qibʼ kyukʼil. Ilxix tiʼj tuʼn tok qqʼoʼn qwitz tiʼj tbʼanel kymod txqantl, ik tzeʼnj te Jehová in nok tqʼoʼn twitz kyiʼj tbʼanel qmod. Mitiʼ tuʼn tkubʼ qximen qa mlay che el txalpaj qerman, quʼn qkyaqil aj il  qoʼ. Ax ikx il tiʼj tuʼn ttzaj qnaʼn qa at junjun qe o bʼet ambʼil t-xilen tzyet t-xnaqʼtzbʼil ex at junjuntl tzma in xi tzyet t-xnaqʼtzbʼil (kjawil uʼjit Colosenses 3:13). Jyontz qe tamiwoya aʼyeju kʼujlaʼn Jehová kyuʼn tukʼil tkyaqil kykʼuʼj, a jlu kʼonil tiʼja tuʼn tchʼiya toj tokslabʼila. Qa ma tzʼajbʼena te Jehová junx kyukʼe qeju in che ajbʼen te, nya kwest kʼelel toj twitza tuʼn tkyaj tena toj tkʼujlabʼil. Atzun jaʼlo qo xnaqʼtzan tiʼ tzul tqʼoʼn Jehová kye qeju kukx in che ajbʼen te, ex mitiʼ in kyaj kytzaqpiʼn tkʼujlabʼil.

20, 21. ¿Tiʼ aju «chwinqlal axix tok», ex tiquʼn tbʼanelxix jlu?

²⁰ Ok tzul tqʼoʼn Jehová chwinqlal kye qeju kukx in che ajbʼen te, pero ¿alkye chwinqlal lu? Atle nim qe jaku tqʼama qa itzʼ qoʼ jaʼlo, tuʼnju at qxew, in qo waʼn ex in qo kʼan. Qa in qo tzalaj jun rat, jakulo qqʼama jlu: «¡Axixtzen te qanqʼibʼil jlu!». Pero in tzaj tqʼamaʼn Tyol Dios, qa nya itzʼxix qoʼ.

²¹ In tzaj tqʼamaʼn Tyol Dios tuʼn «[q]tzyunte ju chwinqlal axix tok» (1 Timoteo 6:19). Aju yol «chwinqlal axix tok» in yolin tiʼj jun qanqʼibʼil ktel toj ambʼil tzul. Aj qok te tzʼaqle xjal, atzun qʼij jlu qo anqʼil ik tzeʼn tajtaq Dios tnejelku. Aj tpon qʼij tuʼn qten toj Tbʼanel Najbʼil ok qo tzalajel tuʼnju ya miʼ qo yabʼtetl ex ya miʼ qo xobʼtl, ex ktel «[q]chwinqlal axix tok», toj juntl yol, ok qo anqʼil te jun majx (1 Timoteo 6:12). Tbʼanelxix ambʼil tzul, ¿tzeʼn teya toj twitz?

22. ¿Tzeʼn jaku ten teya «[t]chwinqlal axix tok»?

²² ¿Tzeʼn jaku ten «[q]chwinqlal axix tok»? Tej naʼmxtaq t-xi tqʼamaʼn apóstol Pablo qeju yol lu kye okslal, xi tqʼamaʼn «tuʼn kybʼinchante aju bʼaʼn, tuʼntzun tchmet kyaqʼunbʼen bʼaʼn ik tzaʼn jun qʼinumbʼl» (1 Timoteo 6:18). A jlu in tzaj tyekʼun qa tuʼn tten qchwinqlal, il tiʼj tuʼn tkubʼ qbʼinchen aju o qo xnaqʼtzan tiʼj toj Tyol Dios. Pero ¿tqʼamapetzele apóstol Pablo qa tuʼnju tbʼanel qbʼinchbʼen ok tzul qʼoʼn «[q]chwinqlal axix tok»? Mitiʼ. Quʼn naq «tuʼn t-xtalbʼil»  Dios tzul tqʼoʼn jlu qe (Romanos 5:15). Pero tbʼanel in nela toj twitz Jehová tuʼn ttzaj tqʼoʼn jun oyaj kye qeju kukx in che ajbʼen te. Taj tuʼn tten ‹tchwinqlala axix tok›, moqa tuʼn tanqʼina te jun majx toj tzalajbʼil. Atzun chwinqlal jlu tzul qʼoʼn kye qeju kukx ateʼ toj tkʼujlabʼil Dios.

23. ¿Tiquʼn mitiʼ tuʼn tkyaj qtzaqpiʼn tkʼujlabʼil qMan Dios?

²³ Teyele junjun qe kximel tiʼj jlu: «¿In chin ajbʼene te Dios ik tzeʼn in tzaj tqʼamaʼn toj Tyol?». Qa ik in bʼant quʼn tkyaqil qʼij, tbʼanel in bʼent quʼn. Jaku tzʼok qʼuqeʼ qkʼuʼj qa a Jehová kkolel qiʼj. Ok kkolel tiʼj ttnam kyoj qeju bʼajsbʼil qʼij nya bʼaʼn. Ax ikx, ok qo tzajel tonin tuʼn qten toj akʼaj twitz txʼotxʼ aju chʼixtl tul kanen. ¡Tbʼanelxix jlu! ¡Ok qo tzalajelxix wen tuʼnju otaq jaw qjyoʼn aju mas nim toklen kyoj qeju bʼajsbʼil qʼij! Qa ma jaw tjyoʼn teya aju mas nim toklen jaʼlo, ok ktzalajela te jumajx tiʼj ‹tchwinqlala axix tok›, aju anqʼibʼil tajtaq Jehová tuʼn tten qe.