1. ¿Tiʼ tbʼanel tzul qe qa ma qo ajbʼen te Dios ik tzeʼn in tzaj tqʼamaʼn?

KʼUJLAʼNXIX qoʼ tuʼn Jehová. Tuʼntzunju, taj (tgan) tuʼn ttzaj tyekʼun qbʼe. Qa ma qo ajbʼen te ik tzeʼn in tzaj tqʼamaʼn, ok qo tzalajel ex jaku tzʼel laqʼeʼ nim (bʼampo) nya bʼaʼn qiʼj. Ax ikx qo tzajel tkʼiwlaʼn ex qo tzajel tonin (Isaías 48:17). Naqtzen tuʼnj, at nim okslabʼil (nimbʼil) twitz txʼotxʼ. Kykyaqil qe jlu in kyqʼamaʼn qa in kubʼ kyxnaqʼtzaʼn ax tok (bʼanax) tiʼj Dios, pero nya junx kyxnaqʼtzbʼil tiʼj alkye Dios ex tiʼ taj tuʼn tbʼant quʼn.

2. ¿Tzeʼn jaku tzʼok tojtzqiʼna alkye tten tuʼn qajbʼen te Jehová, ex alkye techel jaku kubʼ qqʼoʼn tiʼj jlu?

² ¿Tzeʼn jaku tzʼok tojtzqiʼna alkye tten tuʼn qajbʼen te Jehová? Nya il tiʼj tuʼn tkubʼ t-xnaqʼtzaʼna ex tuʼn tkubʼ tmojbʼaʼna aju in kubʼ kyxnaqʼtzaʼn kykyaqil okslabʼil. Oʼkx kxnaqʼtzala tiʼjju in tzaj t-xnaqʼtzaʼnxix Tyol Dios. Qqʼonku jun techel. Ojtzqiʼn quʼn qa kyoj nimku tnam o kubʼ kybʼinchaʼn xjal nya ax tok pwaq (tumi). Naqpe ximinxa qa ma tzaj qʼamaʼn teya tuʼn kyel tpaʼna nya ax tok pwaq (nya medixix) kyiʼj qeju pwaq ax tok. ¿Tzeʼn jaku tzʼel tnikʼa kyiʼj ax tok pwaq ex kyiʼj qeju nya ax tok? Nya il tiʼj tuʼn kyok tojtzqiʼna kykyaqil pwaq nya ax tok. Quʼn aju mas bʼaʼn tuʼn tbʼant tuʼna aju tuʼn t-xnaqʼtzaʼna tzeʼn qeju ax tok pwaq. Qa ma che ok tojtzqiʼna  pwaq ax tok, nya kwest kʼelel tnikʼa kyiʼj qeju nya ax tok pwaq. Ax ikx, qa ma tzʼok tojtzqiʼna tzeʼn axix (bʼanax) okslabʼil, lwey kʼelel tnikʼa kyiʼj qeju nya ax tok okslabʼil.

3. Ik tzeʼn tqʼama Jesús, ¿tiʼ kbʼantel quʼn tuʼn qel bʼaʼn toj twitz Dios?

³ Ilxix tiʼj tuʼn qajbʼen te Jehová ik tzeʼn in tzaj tqʼamaʼn. Nim xjal in kubʼ kyximin qa kykyaqil okslabʼil bʼaʼn in che ela toj twitz Dios, pero nya aju in tzaj t-xnaqʼtzaʼn Tyol Dios. Nya oʼkx kxel qqʼamaʼn qa okslal (nimil) qoʼ, quʼn tqʼama Jesús jlu: «Aqeju in kymaʼn weye: Tat, Tat, mya kykyaqil che okex tuj kawbʼil in tzaj tuj kyaʼj; noq oʼkx kʼokex aju in tbʼinchaʼn tajbʼil [moqa tvoluntad] Nmane aju at tuj kyaʼj». Kyjuʼtzun, oʼkx qo elel bʼaʼn toj twitz Dios qa ma qo xnaqʼtzan tiʼjju in tzaj tqanin qe ex qa ma kubʼ qbʼinchen. Ok tqʼoʼn Jesús kybʼi qeju mitiʼ (tiloʼ) in kubʼ kybʼinchaʼn tajbʼil Dios te «bʼinchal mya bʼaʼn» (Mateo 7:21-23). Ik okslabʼil nya ax tok ik tzeʼn pwaq nya ax tok: mitiʼx tajbʼen, ax ikx in tzaj nim nya bʼaʼn tuʼn.

4. ¿Tiʼ kyxilen kabʼe bʼe yolin Jesús kyiʼj ex jatumel in chex kyiʼn xjal?

⁴ In xi tqʼoʼn Jehová ambʼil kye kykyaqil xjal tuʼn kyanqʼin te jun majx (juneleʼx). Pero tuʼn qanqʼin te jumajx toj Tbʼanel Najbʼil, ilxix tiʼj tuʼn qnimen te Dios ik tzeʼn in tzaj tqʼamaʼn ex tuʼn tkubʼ qbʼinchaʼn aju bʼaʼn. Naqtzen tuʼnj, nim xjal nya kygan tuʼn tbʼent jlu kyuʼn, tuʼntzunju tqʼama Jesús: «Kyokxe ttzi pwert chʼin; porque aju ttzi pwert maʼ ex ju bʼe maʼ tuj, atzunju in pon tuj najen, ex nimku xjal in cheʼx tuj. Atzunju ttzi ja chʼin ex ju bʼe chʼin tuj, atzunju in pon tuj chwinqlal, ex [naq] junjun xjal in knet ttzi ja chʼin kyuʼn, ex ju bʼe chʼin tuj» (Mateo 7:13, 14). A jlu in tzaj tyekʼun qa aju axix okslabʼil in chex tiʼn xjal toj chwinqlal te jumajx, ex aju nya ax tok okslabʼil in chex tiʼn xjal toj najen. Pero nya taj Jehová tuʼn tkyim jun xjal, kyjuʼtzun in tzaj tqʼoʼn ambʼil kye kykyaqil xjal tuʼn tok ojtzqiʼn kyuʼn (2 Pedro 3:9). Nim toklen aju alkye tten in qo ajbʼen te Dios, quʼn jaku ten qchwinqlal (qanqʼibʼil) tuʼn jlu moqa jaku qoʼx toj najen tuʼn.

5. ¿Alkye tten jaku tzʼel qnikʼ kyiʼj axix okslal?

⁵ ¿Tzeʼn jaku kanet quʼn aju ‹bʼe in qox tiʼn toj chwinqlal›? Tqʼama Jesús qa lwey jaku tzʼel qnikʼ kyiʼj ax tok okslal qa ma tzʼok qqʼoʼn qwitz kyiʼj. Tqʼama jlu: «Tiʼj kybʼinchbʼen kʼelel kynikʼe kyiʼj», quʼn «tkyaqil tzeʼ bʼaʼn, in tqʼoʼn twitz bʼaʼn» (Mateo 7:16, 17). Toj juntl yol, jaku tzʼel nikʼ kyiʼj ax tok okslal tuʼn kyxnaqʼtzbʼil ex tuʼn kybʼinchbʼen. Aj ilqe ex at maj in bʼant junjun tiʼchaq kyuʼn nyaxix toj tumel, pero kykyaqil in nok tilil kyuʼn tuʼn tkubʼ kybʼinchen tajbʼil Dios. Qo xnaqʼtzan kyiʼj waqaq yekʼbʼil, moqa techel, tuʼn tel qnikʼ kyiʼj axix okslal.

6, 7. ¿Tiʼ kyxim axix okslal tiʼj Tyol Dios ex alkye techel kyaj tqʼoʼn Jesús?

⁶ Aʼyeju ax tok okslal atz in jatz kyiʼn kyxnaqʼtzbʼil toj Tyol Dios. Ax Tyol Dios in qʼamante jlu: «Tkyaqil aju tzʼibʼan tuj Tuʼjil, a Dios o qʼmante ex at tajbʼen te xnaqʼtzbʼil qe, ex tuʼn qmayonjtz tuʼn miʼn qbʼinchante mya bʼaʼn, ex tuʼn tjiqumanjtz tiʼj qnabʼl, ex tuʼn qxnaqʼtzanjtz tuʼn qbʼet tuj tumelxix, tuʼntzun tten tnabʼl ju xjal in ajbʼen te Dios, ex bʼanin tten tuʼn tbʼinchante tkyaqil aqʼuntl bʼaʼn» (2 Timoteo 3:16, 17). Xi ttzʼibʼin apóstol Pablo jlu kye terman: «Aju kybʼiye qeye; tej t-xi kyokslaʼne mintiʼ o kymaye qa tyol xjal, oʼkx o kymaye qa tyol Dios, porque ax tok tyol Dios» (1 Tesalonicenses 2:13). Tuʼntzunju, aju kyxnaqʼtzbʼil axix tok okslal nya atz in jatz toj kyxnaqʼtzbʼil xjal ex aju kybʼinchbʼen nya atz in nel kykanoʼn kyiʼj xjal. Quʼn atz in jatz kyiʼn toj Tyol Dios.

⁷ Kyaj tqʼoʼn Jesús techel, quʼn jatz tiʼn t-xnaqʼtzbʼil toj Tyol Dios. Tqʼama jlu te Ttat toj naʼj Dios: «Aju tyola axix tok» (Juan 17:17). Qʼuqlitaq tkʼuʼj Jesús tiʼj Tyol Dios ex tkyaqilju in kubʼtaq t-xnaqʼtzaʼn tkuʼxtaq toj Tyol Dios. Nim maj tqʼama: «At jun yol in tmaʼn tuj Tuʼjil», ex in xi tqʼamaʼn jun texto (Mateo 4:4, 7, 10). Ax ikx qeju in che ajbʼen te Dios  jaʼlo (jaʼla) mitiʼ in kubʼ kyxnaqʼtzaʼn aju kyex kyxim. Quʼn aju in bʼent kyuʼn, in nok qʼuqeʼ kykʼuʼj tiʼj Tyol Dios ex atz in jatz kyiʼn kyxnaqʼtzbʼil toj.

8. ¿Alkye junjun tiʼchaq in bʼent kyuʼn qeju in che ajbʼen te Jehová?

⁸ Aqeju ateʼkx toj ax tok okslabʼil oʼkx in che kʼulun, moqa in che nimen, te Jehová ex in xi kyqʼamaʼn tbʼi kye xjal. Tqʼama Jesús jlu: «Twitz Qman [Jehová] tuʼn kykʼulune, aju Kydiose, ex oʼkx te tuʼn kyajbʼene» (Mateo 4:10). Kyjuʼtzun, aʼyeju in che ajbʼen te Jehová oʼkx in che kʼulun te. Aj t-xi kyqʼamaʼn tbʼi ex aʼyeju tbʼanel tmod kye xjal in che nimen te. In tzaj tqʼamaʼn Isaías 42:8: «Aqine Jehová ne porque atzun nbʼiye, ex mlay waqʼe ambʼil tuʼn tjaw nimsaʼn tbʼi juntl ex tuʼn kyok ten kʼulul kywitz qe tilbʼilal te nxele». Aʼyeju ax tok okslal in che ok lepeʼ tiʼj Jesús aj kyonin kyiʼj xjal tuʼn tok kyojtzqiʼn Dios. Xi tqʼamaʼn Jesús jlu te Ttat: «Ma jaw nnimsaʼne tbʼiya twitz txʼotxʼ» (Juan 17:4). Ax ikx jaʼlo, in xi kyqʼamaʼn axix okslal kye xjal aju tbʼi, aju t-xim ex aju tmod Jehová.

9, 10. ¿Alkye tten in kubʼ kyyekʼun axix tok okslal qa at kykʼuʼj kyiʼj txqantl?

⁹ Aʼyeju in che ajbʼen te Dios in nok kykʼujlan kyibʼ tukʼe tkyaqil kykʼuʼj. Tqʼama Jesús jlu: «Qa ma kykʼujla kyibʼe kyxolxe, tuʼntzun jlu kʼelel kynikʼ kykyaqil xjal kyiʼje qa nxnaqʼtzbʼen qeye» (Juan 13:35). Aʼyeju tnejel okslal in noktaq kykʼujlan kyibʼ ik tzeʼn jlu. Aju kykʼujlabʼil qeju in che ajbʼen te Dios in nonin kyiʼj tuʼn miʼ tel kyikʼen xjal te junxitl tnam ex te junxitl kyyajil ex qa qʼininqe moqa mebʼaqe, aju kykʼujlabʼil in nok mojbʼan kye ik tzeʼn kyitzʼin kyibʼ moqa kytzik kyibʼ (kjawil uʼjit Colosenses 3:14). Mitiʼ kʼujlabʼil lu kyxol qeju nya ax tok okslal. Naqwit in nok kykʼujlan kyibʼ mitiʼwtle in kubʼ kybʼiyon kyibʼ tuʼnju junxitl kytnam ex junxitl kyyajil. Aʼyeju axix okslal mitiʼ in che kubʼ kybʼiyoʼn kyerman ex txqantl xjal. In tzaj tqʼamaʼn Tyol Dios: «Tuʼntzun jlu nneʼl nikʼbʼaj kyiʼj alkye qe tkʼwaʼl Dios ex alkye qe tkʼwaʼl tajaw il; porque tkyaqilju mintiʼ in tbʼinchaʼn aju  tzʼaqlxix, myatzun te Diosju, ax ikx mya te Dios ju xjal, aju mintiʼ in tkʼujlaʼn terman. [...] Tuʼn qkʼujlante qibʼ qxolx. Ex miʼn qo ok ik tzaʼn te Caín, te tajaw il te ex kubʼ tbʼyoʼn aju titzʼin» (1 Juan 3:10-12; 4:20, 21).

¹⁰ Nya oʼkx mitiʼ in che kubʼ qbʼiyoʼn xjal tuʼnju at qkʼuʼj kyiʼj, quʼn at mastl in bʼant tuʼnju at qkʼuʼj kyiʼj xjal. Aʼyeju axix tok okslal in najbʼen ambʼil, kyipumal ex kyqʼinumabʼil tuʼn kyonin kyibʼ (Hebreos 10:24, 25). In che onin kyibʼ aj ttzaj nya bʼaʼn kyiʼj ex mitiʼ in che kubʼ kysbʼuʼn txqantl. In kubʼ kybʼinchaʼn «bʼaʼn kye kykyaqil» (Gálatas 6:10).

11. ¿Tiquʼn ilxix tiʼj tuʼn tok qʼuqeʼ qkʼuʼj qa a Jesús in najbʼen tuʼn Dios tuʼn qklet?

¹¹ Qʼuqli kykʼuʼj axix okslal qa a Jesús in najbʼen tuʼn Dios tuʼn kyklet xjal. In tzaj tqʼamaʼn Tyol Dios qa «mi aʼl juntl klol qe; porque tuj tkyaqil twitz txʼotxʼ mintiʼ ma tzaj tmaʼn Dios qa at juntl tuʼn qklet tuʼn» (Hechos 4:12). Ik tzeʼn o xnaqʼtzan tiʼj toj xnaqʼtzbʼil 5, xi tqʼon tibʼ Jesús tuʼn tkyim tuʼn kyklet xjal in che ajbʼen te Dios (Mateo 20:28). Ax ikx o txi tqʼoʼn Jehová toklen tuʼn Tkawin toj tkawbʼil atz toj kyaʼj ex kkawil tibʼaj tkyaqil twitz Txʼotxʼ. Kyjuʼtzun taj Dios tuʼn tokx qbʼiʼn Jesús ex tuʼn qok lepeʼ tiʼj t-xnaqʼtzbʼil. Oʼkx qa ma bʼant jlu quʼn jaku qo anqʼin te jumajx. Tuʼntzen jlu, in tzaj tqʼamaʼn Tyol Dios: «Alkye ma tzʼokslan tiʼj Tkʼwaʼl Dios, at tchwinqlal te jumajx; atzunju tkʼiʼ tzʼokslan tiʼj Tkʼwaʼl Dios, mlayx ten tchwinqlal» (Juan 3:36).

12. ¿Tiʼ mitiʼ in kubʼ kybʼinchen axix okslal tuʼn miʼ kyok ik tzeʼn qe xjal twitz txʼotxʼ?

¹² Aʼyeju in che ajbʼen te Dios in nel kypan kyibʼ tiʼj kybʼinchbʼen xjal. Xi tqʼamaʼn Jesús jlu te ajkawil Pilato tej attaq twitz: «Aju nkawbʼile mya te twitz txʼotxʼ» (Juan 18:36). Jaxku tumel najleqe ax tok okslal in nokx kyqʼon kyibʼ tjaqʼ tKawbʼil Jesús. Tuʼntzun jlu, mitiʼ in nokx kyqʼon kyibʼ kyxol ajkawil ex mitiʼ in jaw kybʼuyin kyibʼ tuʼn kyqʼojin. Pero qa ateʼ xjal kyaj tuʼn kyonin kyiʼj qeju kygan tuʼn kyok te ajkawil moqa aʼyex kyaj tuʼn kyok  te ajkawil ex moqa kygan tuʼn kyvotarin, mitiʼ in nel kyiʼn axix tok okslal ambʼil kye. Pero in xi kybʼiʼn aju kawbʼil in kubʼ kyqʼoʼn ajkawil. ¿Tiquʼn? Tuʼnju in tzaj tqʼamaʼn Tyol Dios jlu: «Kykyaqile il tiʼj tuʼn t-xi kynimane qe aj sanjelal te gobierni» (Romanos 13:1). Pero qa ma tzaj tqʼamaʼn jun kawil tuʼn tkubʼ bʼinchet jun tiʼ aju nya bʼaʼn in nela toj twitz Dios, aʼyeju ax tok okslal in che ok lepeʼ tiʼj techel kyaj kyqʼoʼn t-apóstol Jesús, aʼyeju kyqʼama: «Tnejel ilxix tiʼj tuʼn  t-xi qnimane Dios, ex mya qe xjal» (Hechos 5:29; Marcos 12:17).

13. ¿Alqiʼj in nok qʼuqeʼ kykʼuʼj axix okslal ex tiʼ in bʼant kyuʼn tuʼn jlu?

¹³ Aʼyeju lepchiqeʼk tiʼj Jesús in xi kyqʼamaʼn qa oʼkx tiʼj tKawbʼil Dios jaku tzʼok qʼuqeʼ kykʼuʼj xjal. Kyaj tqʼamaʼn Jesús jlu: «Aju tqanil bʼaʼn lu tiʼj tkawbʼil Dios kxel pakbʼet tuj tkyaqil twitz txʼotxʼ, tuʼntzun tchikʼbʼanjtz ju yol lu kye kykyaqil nasyon; maxitzun tzul mankbʼil tqʼijlalil» (Mateo 24:14). Mitiʼ in xi kyqʼamaʼn axix okslal kye xjal tuʼn tok qʼuqeʼ kykʼuʼj kyiʼj ajkawil twitz txʼotxʼ, quʼn mlay tzʼel kyiʼn tkyaqil nya bʼaʼn. Aju in xi kyqʼamaʼn qa oʼkx jaku tzʼok qʼuqeʼ kykʼuʼj xjal tiʼj tKawbʼil Dios (Salmo 146:3). Kyaj tqʼamaʼn Jesús tuʼn t-xi qqanin toj qnaʼj Dios tuʼn tul tbʼanel kawbʼil lu, tej tqʼama: «E ttzaj ju tkawbʼila. Bʼant-xwit ju tajbʼila twitz txʼotxʼ ik tzaʼn in bʼant tuj kyaʼj» (Mateo 6:10). In tzaj tqʼamaʼn Tyol Dios qa aju Kawbʼil lu «che bʼel bʼaj kykyaqil mastl kawbʼil tuʼn, atzunte kukx ktel te jumajx» (Daniel 2:44; Apocalipsis 16:14; 19:19-21).

14. Toj teya t-ximbʼetz, ¿alkye jun kʼloj okslal in kubʼ kybʼinchen tkyaqilju ma qo xnaqʼtzan tiʼj?

¹⁴ Ik tzeʼn ma qo xnaqʼtzaʼn tiʼj, ximana tiʼj jlu: ¿Alkye jun kʼloj okslal in jatz kyiʼn tkyaqil kyxnaqʼtzbʼil toj Tyol Dios ex in xi kyqʼamaʼn qa ate Dios tbʼi Jehová? Ax ikx, ¿alkye jun kʼloj okslal in kubʼ kyyekʼun kykʼujlabʼil kyxol, in nok qʼuqeʼ kykʼuʼj tiʼj Jesús, in nel kypan kyibʼ tiʼj kybʼinchbʼen xjal twitz txʼotxʼ ex in xi kyqʼamaʼn qa oʼkx tiʼj tKawbʼil Dios jaku tzʼok qʼuqeʼ kykʼuʼj xjal? Kyxol kykyaqil okslabʼil twitz Txʼotxʼ, ¿alkye jun in bʼant tkyaqil jlu tuʼn? Aju kybʼinchbʼen testigos de Jehová in tzaj tyekʼun qa aʼye axix tok okslal (kjawil uʼjit Isaías 43:10-12).

15. Qa ojtzqiʼn quʼn qa at Dios, ¿tiʼ mastl kbʼantel quʼn?

¹⁵ Tuʼn ttzalaj Dios quʼn nya oʼkx kʼokel qojtzqiʼn. Quʼn axpe ikx qe taqʼunal Tajaw il ojtzqiʼn kyuʼn qa at Dios  (Santiago 2:19). Pero mitiʼ in bʼent tajbʼil Jehová kyuʼn ex nya bʼaʼn in che ela toj twitz. Tuʼn qel bʼaʼn toj twitz Dios, kbʼel qbʼinchaʼn tajbʼil. Ax ikx ilxix tiʼj tuʼn qetz toj okslabʼil nya ax tok ex tuʼn qokx toj okslabʼil axix tok.

16. ¿Tiʼ kbʼantel quʼn tuʼn miʼ tok qmojbʼan qibʼ kyukʼil nya ax tok okslal?

¹⁶ Tqʼama apóstol Pablo qa nya bʼaʼn tuʼn tok qchmon qibʼ kyukʼil nya ax tok okslal. Kubʼ ttzʼibʼan jlu: «Kyetze kyxol ex kypaʼmil kyibʼe kyiʼj, chi Qman; ex miʼn tzʼok kymakoʼne aju ttzʼilil. Oktzun che kʼmetele wuʼne» (2 Corintios 6:17; Isaías 52:11). Tuʼntzun jlu, in nel kyikʼen axix okslal tkyaqilju at toklen tukʼe nya ax tok okslabʼil.

17, 18. ¿Al te qechel in kubʼ qʼoʼn «Nintz tnam Babilonia» ex tiquʼn ilxix tiʼj tuʼn qetz toj?

¹⁷ In tzaj tqʼamaʼn Tyol Dios qa kykyaqil okslabʼil nya ax tok in nok kybʼi te «Nintz [moqa matij] tnam Babilonia» (Apocalipsis 17:5). * In tzaj qnaʼn ojtxe tnam Babilonia tuʼn bʼibʼaj lu, atz jatumel tzaj tzyet nya ax tok okslabʼil tej otaqxi tzikʼ Nim Jbʼal toj ambʼil te Noé. Chʼixmi tkyaqil kyxnaqʼtzbʼil ex kybʼinchbʼen nya ax tok okslabʼil, atz tzajni toj ojtxe tnam Babilonia. Jun techel, in che nimentaq xjal te Babilonia kywitz oxechaq kybʼet dios, ax ikx jaʼlo nim okslabʼil in kubʼ kyxnaqʼtzaʼn qa at oxe kybʼet Dios. Pero in tzaj tqʼamaʼn Tyol Dios qa oʼkx jun Dios axix tok at, aju Jehová ex qa ate Jesucristo tKʼwaʼl Dios (Juan 17:3). Ax ikx in kyqʼamaʼntaq aj Babilonia qa mitiʼtaq in kyim tanmi xjal ex qa jakutaq ten toj kʼixkʼej. Ax ikx jaʼlo chʼixmi kykyaqil okslabʼil in kubʼ kyxnaqʼtzaʼn qa mitiʼ in kyim tanmi xjal ex qa in xiʼ toj qʼaqʼ.

¹⁸ Aju okslabʼil in kubʼtaq kyxnaqʼtzaʼn xjal toj ojtxe tnam Babilonia xi sputj (taʼlen tibʼ) twitz tkyaqil Txʼotxʼ. Tuʼntzunju aju matij, moqa nim, tnam Babilonia te jaʼlo in nok  te kyechel kykyaqil okslabʼil nya ax tok. O kyaj tqʼamaʼn Dios qa naq minabʼen (tzenx metzaqʼle) ok che kbʼel najsaʼn kykyaqil okslabʼil nya ax tok twitz tkyaqil txʼotxʼ. ¿In nel teya tnikʼ tiquʼn ilxix tiʼj tuʼn tel tpan tibʼa tiʼj matij tnam Babilonia? Tuʼnju taj Jehová ‹tuʼn tetza lwey tuj›, quʼn atx ambʼil (kjawil uʼjit Apocalipsis 18:4, 8).

19. ¿Tiʼ ktel teya qa ma tzʼajbʼena te Jehová?

¹⁹ Aj tkubʼ t-ximana tuʼn tetza toj okslabʼil nya ax tok, atlo junjun xjal kʼelel tpan tibʼ tiʼja. Pero qa ma tzʼajbʼena junx kyukʼe Tmajen Jehová, ok ktel nim tbʼanel teya twitzju kjel ttzaqpiʼna. Ok che tel nim termana ik tzeʼn kye tnejel okslal tuʼnju kyaj kytzaqpiʼn tiʼchaq at kye tuʼn kyok lepeʼ tiʼj Jesús. Ok ktela kyxol qeju nimxix axix tok okslal twitz tkyaqil txʼotxʼ aʼyeju ok kʼokel kʼujlaʼnxixa kyuʼn. Ex ktel tchwinqlala «te jumajx tuj tqʼijlalil tzul» (kjawil uʼjit Marcos 10:28-30). Ax ikx, aʼyeju xjal kʼelel kypan kyibʼ tiʼja tuʼnju junxitl tokslabʼila, jakule che xnaqʼtzan tiʼj Tyol Dios aj tbʼet ambʼil ex jaku che ok te ajbʼel te Jehová.

20. ¿Tiʼ ktel kye qeju ateʼkx toj axix tok okslabʼil?

²⁰ In tzaj tqʼamaʼn Xjan Uʼj (Biblia) qa chʼixtl kykubʼ tnajsaʼn Dios nya bʼaʼn xjal ex qa oʼkx qeju tbʼanel xjal che kyjel tjaqʼ tKawbʼil (2 Pedro 3:9, 13). ¡Tbʼanelxix che tel xjal twitz txʼotxʼ! Junx okslabʼil ktel toj. Qa ma kubʼ t-ximana tuʼn t-xiʼya kyukʼe qeju in che ajbʼen te Dios, ¡tbʼanelxix jlu!