1. ¿Tiquʼn xi tqanin jun xjal in najbʼentaq toj ja te kawbʼil te Etiopía tuʼn tjaw aʼ twiʼ?

«LU JUN aʼ lu; ¿myapelo bʼaʼn tuʼn nbʼyane [moqa tuʼn tjaw aʼ nwiʼye]?», chi jun xjal in najbʼentaq toj ja te kawbʼil te Etiopía toj tnejel syent abʼqʼi. Tzmataq tbʼajlen tyekʼun Felipe  tukʼe Tyol Dios te aj Etiopía qa a Jesús Skʼoʼn maj tuʼn Dios. Tbʼanelxix ela toj twitz xjal lu aju otaq tzaj xnaqʼtzaʼn te, tuʼntzunju xi tqanin tuʼn tkuʼx toj aʼ tuʼn tjaw aʼ twiʼ (Hechos 8:26-36).

2. ¿Tiquʼn ilxix tiʼj tuʼn tkubʼ t-ximana tuʼn tjaw aʼ twiʼya?

² Qa o xnaqʼtzana kyiʼj qeju xnaqʼtzbʼil ateʼkux toj uʼj lu tukʼil jun testigo de Jehová, ax ikx teya jakule tqʼamaya: «¿Myapelo bʼaʼn tuʼn nbʼyane?». O xnaqʼtzana tiʼjju in tzaj tqʼamaʼn Tyol Dios qa ok che anqʼil xjal te jun majx (juneleʼx) toj jun Tbʼanel Najbʼil (Mateo 5:5; Apocalipsis 21:3, 4). Ax ikx o tzʼok tojtzqiʼna alkye axix tok (bʼanax) kyiʼj kyimni ex qa ok che jawil anqʼin juntl maj (Eclesiastés 9:5; Juan 5:28, 29). Male bʼet ambʼil in xiʼya kyoj chmabʼil in nok kyuʼn testigos de Jehová ex o tzʼok tqʼoʼn twitza kyiʼj qa ax tok okslalqe (Juan 13:35). Ex aju mas tbʼanel twitz tkyaqil jlu, malo txi laqʼeʼya mas ttxlaj Jehová.

3. a) ¿Tiʼ kyaj tqʼamaʼn Jesús kye qeju lepchiqeʼk tiʼj? b) ¿Alkye tten in jaw aʼ twiʼ jun xjal?

³ ¿Alkye tten jaku kubʼ tyekʼuna qa taja (tgana) tuʼn tajbʼena te Dios? Kyaj tqʼamaʼn Jesús jlu kye qeju lepchiqeʼk tiʼj: «Kyxiʼye, kymanxe kye xjal tuʼn kyok te nxnaqʼtzbʼene kyuj kykyaqil nasyon, ex tuʼn kybʼyan kyuʼne» (Mateo 28:19). Kyaj tqʼoʼn Jesús techel qwitz, quʼn ax ikx te kuʼx toj aʼ tuʼn tjaw aʼ twiʼ. Pero nya naq jax chitin ex nya naq kubʼ qoʼn aʼ toj j twiʼ (Mateo 3:16). Aju yol ajbʼen toj yol griego tiʼj yol «bʼyal», a t-xilenju qa bʼiʼx in kux bʼaj xjal toj aʼ. Kyjuʼtzun, aj tjaw aʼ twiʼ jun xjal bʼiʼx kbʼelex bʼaj tjaqʼ aʼ.

4. ¿Tiʼ in kubʼ qyekʼun aj tjaw aʼ qwiʼ?

⁴ Kykyaqil qeju kyajbʼil (kygan) tuʼn kyok te tamiw Jehová che kbʼelex toj aʼ tuʼn tjaw a kywiʼ. Aj tjaw a twiʼ jun xjal, in kubʼ tyekʼun kywitz txqantl qa taj tuʼn tajbʼen te Dios ex qa in tzalaj tuʼnju in kubʼ tbʼinchaʼn tajbʼil (tvoluntad) Dios (Salmo 40:7, 8). Pero tuʼn jaw aʼ qwiʼ, at junjun tiʼchaq kbʼantel quʼn.

5. a) Tuʼn tjaw aʼ qwiʼ, ¿tiʼ kbʼantel quʼn tnejel? b) ¿Tiquʼn nim kyoklen qeju chmabʼil in kubʼ kyikʼsaʼn testigos de Jehová?

⁵ Tuʼnleju in xnaqʼtzana tiʼj Tyol Dios, ma txi tzyet tuʼn tok tojtzqiʼna Jehová ex Jesús, atzun tnejelju kbʼantel quʼn (kjawil uʼjit Juan 17:3). Pero jaku ten mastl tojtzqibʼila. Aʼyeqe okslal kyaj «tuʼn kyojtzqinte[...] tkyaqilju tajbʼil» Dios (Colosenses 1:9). Aʼyeju chmabʼil in nok kyuʼn testigos de Jehová jaku tzʼonin tiʼja tuʼn tten mas tojtzqibʼila. Tuʼntzunju, il tiʼj tuʼn kukx tbʼeta kyoj chmabʼil (Hebreos 10:24, 25). Qa kukx xbʼeta kyoj chmabʼil, kʼokel tojtzqiʼna Dios.

6. ¿Jniʼ tojtzqibʼila ktel tiʼj Tyol Dios tuʼn tjaw aʼ twiʼya?

⁶ Tuʼn tjaw aʼ twiʼya nya il tiʼj tuʼn tok tojtzqiʼna tkyaqilju tkuʼx toj Tyol Dios. Pero qa ma tzaj tnaʼna, aju xjal te Etiopía attaq chʼin tojtzqibʼil tiʼj Tyol Dios, pero xi qʼoʼn onbʼil te tuʼn tel tnikʼ tiʼj junjuntl taqikʼ Tyol Dios (Hechos 8:30, 31). Ax ikx teya atx tuʼn tok tojtzqiʼna Dios, quʼn mlay bʼaj tuʼn tok qojtzqiʼn Dios (Eclesiastés 3:11). Pero tuʼn tjaw aʼ twiʼya ilxix tiʼj tuʼn tok tojtzqiʼna ex tuʼn tok qʼuqeʼ tkʼuʼja kyiʼj junjun xnaqʼtzbʼil aʼyeju nim kyoklen (Hebreos 5:12). Junjun xnaqʼtzbʼil kyxol qeju nim kyoklen aju tuʼn tok tojtzqiʼna jatumel ateʼqe kyimni, jniʼ toklen tbʼi qMan Dios ex jniʼ toklen tKawbʼil.

7. ¿Tiʼ juntl ktel teya qa in xnaqʼtzana tiʼj Tyol Dios?

⁷ Pero nya oʼkx ktel qojtzqibʼil, quʼn «qa mintiʼ qokslabʼl mlayx tzalaj Dios qiʼj» (Hebreos 11:6). In tzaj tqʼamaʼn Tyol Dios tiʼ bʼant kyuʼn junjun xjal te ojtxe tnam Corinto, in tzaj tqʼamaʼn qa tej tok kybʼiʼn Tyol Dios aju xi kyqʼamaʼn okslal kye, «xi kyokslaʼn ex e bʼyan» (Hechos 18:8). Ikxwit teya bʼant tuʼn. Qa in xnaqʼtzana tiʼj Xjan Uʼj, awtloju in nonin tiʼja tuʼn tok qʼuqeʼ tkʼuʼja qa tkyaqilju tkuʼx toj uʼj lu atz tzajni tukʼil Dios. Ax ikx awtle jlu in nonin tiʼja tuʼn tok qʼuqeʼ tkʼuʼja qa kjapunel twiʼ tkyaqilju o tzaj ttziyen  Dios ex qa jaku kleta tuʼn Dios tuʼnju tkyimlen Jesús (Josué 23:14; Hechos 4:12; 2 Timoteo 3:16, 17).

8. ¿Tiʼ kʼonil tiʼja tuʼn tyolina tiʼjju o xnaqʼtzana tiʼj?

⁸ Aj tchʼiy qʼuqbʼil tkʼuʼja, nya kwest kʼelel toj twitza tuʼn t-xi tqʼamaʼna aju ma xnaqʼtzana tiʼj (Jeremías 20:9). Ax ikx ok ktel mas tajbʼila tuʼn t-xi tqʼamaʼna kye xjal alkye Dios ex alkyeqe t-xim (kjawil uʼjit 2 Corintios 4:13).

9, 10. a) Tnejel, ¿alqechaq jaku txi tqʼamaʼna Tyol Dios? b) ¿Tiʼ kbʼantel tuʼna qa taja tuʼn texa pakbʼal junx kyukʼe testigos de Jehová?

⁹ Tnejel, jaku txi tqʼamaʼna Tyol Dios kye toj tjaya, kye tamiwoya, kye tukʼila toj aqʼuntl ex kye qeju in che najan ttxlaj tjaya. Aj tbʼet ambʼil oklo ktel tajbʼila tuʼn texa pakbʼal junx kyukʼe testigos de Jehová. Aj tpon ambʼil, qʼamanxa teju testigo de Jehová in qʼon xnaqʼtzbʼil teya tiʼj Tyol Dios qa taja tuʼn texa pakbʼal. Aj tok tqʼoʼn twitz aju in qʼon xnaqʼtzbʼil teya qa ya in che japuntl tkawbʼil Dios tuʼna, ok kbʼel ximit tiʼj tuʼn kyyolin kabʼe ansyan kyukʼile.

¹⁰ Iktzun tten che okel tojtzqiʼnxixa junjun ansyan, aʼyeju in che xqʼuqin kyiʼj t-ẍneʼl, moqa t-rit Dios (Hechos 20:28; 1 Pedro 5:2, 3). Ok kʼokel kyqʼoʼn kywitz tiʼja qa in nel tnikʼa kyiʼj xnaqʼtzbʼil nim kyoklen aʼyeju ateʼkux toj Tyol Dios, ex qa qʼuqli tkʼuʼja kyiʼj, qa in nanqʼina ik tzeʼn in tzaj tqʼamaʼn Tyol Dios, ex qa tajxixa tuʼn toka te testigo de Jehová. Qa ik ttenju, ok kxel qʼamaʼn teya qa jaku tzʼexa pakbʼal maske, moqa inchq, naʼmx tjaw aʼ twiʼya.

11. ¿Tiʼchaq il tiʼj tuʼn tbʼent kyuʼn junjun xjal naʼmxtaq kyex pakbʼal?

¹¹ Pero at maj jaku tzʼok kyqʼoʼn ansyan kywitz tiʼj jun xjal qa atx junjun tiʼchaq il tiʼj tuʼn tkyaj ttzaqpiʼn tuʼntzen tex pakbʼal. Jun techel, qa in kubʼ tbʼinchen jun xjal nya bʼaʼn toj ewaj, ok kjel ttzaqpiʼn. Tuʼntzun jlu, naʼmxtaq tex jun xjal pakbʼal ex naʼmxtaq tjaw aʼ twiʼ, ilxix tiʼj tuʼn tkyaj ttzaqpiʼn tkyaqil nya bʼaʼn, ik tzeʼn qa in kʼan nim  qʼeʼn, qa in kʼan droga ex moqa in najbʼen tchibʼjal tuʼn tkubʼ tbʼinchaʼn jun nya bʼaʼn (kjawil uʼjit 1 Corintios 6:9, 10; Gálatas 5:19-21).

12. ¿Tiquʼn il tiʼj tuʼn tajtz tiʼj tanmiya?

¹² ¿Tiʼ mastl kbʼantel tuʼna tuʼn tjaw aʼ twiʼya? Tqʼama apóstol Pedro jlu: «Tajtztzun tiʼj kyanmiye, ex kyajtz meltzʼaje tukʼil Dios tuʼn tkubʼ najset kyile» (Hechos 3:19). Qa ax tok ma tzʼajtz tiʼj tanmi jun xjal, in tzaj tbʼis tuʼnju nya bʼaʼn otaq kubʼ tbʼinchaʼn. Pero nya oʼkx qeju xjal in kubʼ kybʼinchaʼn nya bʼaʼn il tiʼj tuʼn tajtz tiʼj kyanmi, ax ikx qeju xjal in kubʼ kybʼinchen bʼaʼn. ¿Tiquʼn? Tuʼnju qkyaqilx aj il qoʼ ex qaj (qgan) tuʼn tkubʼ tnajsaʼn Dios qil (Romanos 3:23; 5:12). Tej naʼmxtaq tok tena xnaqʼtzal tiʼj Tyol Dios mitiʼtaq (tiloʼtoq) ojtzqiʼn tuʼna alkye tajbʼil Dios. Tuʼntzun jlu, mitiʼtaq in kubʼ tbʼinchaʼna tkyaqilju at toklen tukʼil tajbʼil Dios. A jlu in tzaj tyekʼun qa ilxix tiʼj tuʼn tajtz tiʼj tanmiya.

13. ¿Tiʼ t-xilen aju tuʼn tkubʼ qchʼexpun qibʼ?

¹³ Aj tajtz tiʼj tanmiya il tiʼj tuʼn tkubʼ tchʼexpun tibʼa. ¿Tiʼ t-xilen jlu? Aju qa il tiʼj tuʼn tkyaj ttzaqpiʼna tkyaqil nya bʼaʼn in kubʼtaq tbʼinchaʼna ex nya oʼkx tuʼn ttzaj tbʼisa tuʼn. Toj ambʼil aju, ok kʼokel tilil tuʼna tuʼn tkyaj ttzaqpiʼna tkyaqilju nya bʼaʼn. Naʼmxtaq tjaw aʼ qwiʼ il tiʼj tuʼn tajtz tiʼj qanmi ex tuʼn tkubʼ qchʼexpun qibʼ.

14. ¿Tiʼ juntl kbʼantel tuʼna naʼmxtaq tjaw aʼ twiʼya?

¹⁴ ¿Tiʼ juntl kbʼantel tuʼna naʼmxtaq tjaw aʼ twiʼya? Aju tuʼn t-xi tqʼamaʼna te Jehová qa taja tuʼn tajbʼena te.

15, 16. Naʼmxtaq tjaw aʼ qwiʼ, ¿tiʼ kxel qqʼamaʼn te Jehová toj naʼj Dios, ex tiʼ kʼonil qiʼj tuʼn tbʼant jlu quʼn?

¹⁵ Jaku txi qqʼamaʼn te Jehová toj jun naʼj Dios qa ma kubʼ qximan tuʼn qajbʼen oʼkxku te (Deuteronomio 6:15).  Pero ¿tiquʼn kxel qtziyen te Dios qa oʼkx qo ajbʼel te? Qqʼonku jun techel, qa ma tzʼok yolin jun txin, moqa jun qʼapoj tuʼn jun qʼa. Aj tbʼet ambʼil kʼokel tojtzqiʼn qʼa twitz txin ex kʼokel tkʼujlaʼn mas aj tok tqʼoʼn twitz kyiʼj qeju tbʼanel tmod. Tuʼnju tkʼujlabʼil qʼa lu, ok kxel tqʼamaʼn te txin qa taj tuʼn tkubʼ mojeʼ tukʼil. Ax tok, aj tkubʼ mojeʼ qʼa lu ok kʼaqʼunal mastl. Pero tuʼnju tkʼujlabʼil at tiʼj txin ok kbʼel mojeʼ tukʼil.

¹⁶ Aj tok qojtzqiʼn ex aj tok qkʼujlaʼn Jehová, a jlu kʼonil qiʼj tuʼn qajbʼen te tuʼn tkyaqil qanmi, ex toj tkyaqil ambʼil. Aju xjal taj tuʼn tok lepeʼ tiʼj tKʼwaʼl Dios, aju Jesucristo, kbʼel ‹t-xkʼayin tibʼ teju tex tajbʼil› (Marcos 8:34). Jaku bʼent jlu quʼn qa ma kubʼ qqʼoʼn Jehová tnejel ex nya aju qe qajbʼil. Naʼmxtaq tjaw aʼ twiʼya, il tiʼj tuʼn tkubʼ t-ximana qa aju mas nim toklen, aju tuʼn tbʼant tajbʼil Jehová tuʼna (kjawil uʼjit 1 Pedro 4:2).

17. ¿Tiquʼn at junjun xjal mitiʼ in xi kyqʼamaʼn te Jehová qa kyaj tuʼn kyajbʼen te?

¹⁷ At junjun xjal mitiʼ in xi kyqʼamaʼn te Jehová qa kyaj tuʼn kyajbʼen te, tuʼnju in che tzaj xobʼ qa mlay bʼant tajbʼil Jehová kyuʼn. In che tzajlo xobʼ tuʼnju in kubʼ kyximan qa ma jaw aʼ kywiʼ, ok kxel kyqʼoʼn tajlal te Dios. In kubʼ kyximan qa jakule kubʼ kybʼinchaʼn jun nya bʼaʼn aju jaku tzaj tbʼis Jehová tuʼn, tuʼntzen jlu in kubʼ kyximan qa mas bʼaʼn tuʼn miʼ t-xi kyqʼamaʼn te Jehová qa kyaj tuʼn kyajbʼen te.

18. ¿Tiʼ kʼonil tiʼja tuʼn t-xi tqʼamaʼna te Jehová qa taja tuʼn tajbʼena te?

¹⁸ Aj tchʼiy tkʼujlabʼila tiʼj Jehová, atzunju kʼonil tiʼja tuʼn t-xi tqʼamaʼna qa taja tuʼn tajbʼena te ex tuʼn tok tilil tuʼna tuʼn tjapun aju ma txi ttziyena te (Eclesiastés 5:4). Aj tbʼaj tqʼamaʼna te Jehová qa taja tuʼn tajbʼena te, okle kʼokel tilil tuʼna tuʼn ‹tbʼeta bʼaʼnxix ik tzaʼn tajbʼil Jehová, tuʼntzun ttzalaj tiʼja tuj tkyaqil› (Colosenses 1:10). Tuʼnju tkʼujlabʼila at tiʼj  Dios nya kwest kʼelel toj twitza tuʼn tbʼent tajbʼil tuʼna. Qa ikju, jakulo ten t-xima ik tzeʼn te apóstol Juan tej tqʼama jlu: «Qa kʼujlaʼn Dios quʼn, che japunel qe tmandamyent quʼn; ex qe tmandamyent mya kyuw qe», toj juntl yol, nya jun iqtzqe (1 Juan 5:3).

19. ¿Tiquʼn mitiʼ tuʼn ttzaj xobʼa tuʼn t-xi tqʼamaʼna te Jehová qa taja tuʼn tajbʼena te?

¹⁹ Mitiʼ in tzaj tqʼamaʼn Dios tuʼn tok jun xjal te tzʼaqli aju taj tuʼn tajbʼen te, quʼn ojtzqiʼn tuʼn alkye jaku bʼent tuʼn ex alkye melay bʼant tuʼn (Salmo 103:14). Ok tzul tqʼoʼn Dios tkyaqil onbʼil teya, quʼn taj tuʼn ttzalaja (kjawil uʼjit Isaías 41:10). Qa ma tzʼok qʼuqeʼ tkʼuʼja tiʼj Jehová tuʼn tkyaqil tanmiya, a kxel qʼin teya toj «bʼe jiqun tiʼj» (Proverbios 3:5, 6).

20. Aj tbʼaj tqʼamaʼna te Jehová qa ok kʼajbʼela te, ¿tiʼ juntl kbʼantel tuʼna?

²⁰ Qa ma kubʼ tena ximil tiʼjju ma qo xnaqʼtzaʼn tiʼj, jakulo tzʼonin jlu tiʼja tuʼn t-xi tqʼamaʼna tjunalxa te Jehová toj jun naʼj Dios qa taja tuʼn tajbʼena te. Kykyaqil qeju kʼujlaʼnxix Dios kyuʼn ok kbʼantel juntl tiʼ kyuʼn: aju tuʼn t-xi ‹kychikʼbʼaʼn tuʼn kytziʼ› (Romanos 10:10). ¿Alkye tten in bʼant jlu?

21, 22. ¿Alkye tten jaku txi ‹tqʼamaʼna tukʼe ttziʼya› qa at qʼuqbʼil tkʼuʼja?

 ²¹ Qʼamanxa te jun ansyan atz jatumel in nok tchmon tibʼa qa taja tuʼn tjaw aʼ twiʼya. Aju ansyan lu kyolil kyukʼe txqantl ansyan tuʼn t-xi kyqanin junjun xjel (pregunta) teya kyiʼj junjun xnaqʼtzbʼil nim kyoklen aʼyeju ateʼkux toj Tyol Dios. Aj tok kyqʼoʼn kywitz ansyan qa ya in che japuntl tkawbʼil Dios tuʼna, ok kxel kyqʼamaʼn teya qa jaku jaw aʼ twiʼya. * Aj tpon qʼij tuʼn kykuʼx xjal toj aʼ, in netz qʼamaʼn tiʼ t-xilen aju in jaw aʼ qwiʼ. Aj tbʼaj yolin erman, in tzaj tqanin kabʼe xjel kye qeju che kbʼelex toj aʼ tuʼn tjaw aʼ kywiʼ, ex kykyaqil qeju kjawil aʼ kywiʼ in xi kytzaqʼweʼn tuʼn tkyaqil tqʼajqʼajel kywiʼ. Atzun jun tten jlu in xi ‹kyqʼamaʼn tuʼn kytziʼ› qa at qʼuqbʼil kykʼuʼj.

²² Aj tjaw aʼ twiʼya, ok kbʼel tyekʼuna kywitz txqantl qa o txi tqʼamaʼna te Dios tuʼn tajbʼena te ex qa ya ma tzʼoka te testigo de Jehová. Aʼyeju in jaw aʼ kywiʼ bʼiʼx in che kux bʼaj tjaqʼ aʼ tuʼntzen t-xi yekʼet kye kykyaqil qa o txi kyqʼamaʼn te Jehová tuʼn kyajbʼen te.

23. ¿Tiʼ t-xilen aju in jaw aʼ qwiʼ ‹tuj tbʼi Mambʼaj, tuj tbʼi Kʼwaʼlbʼaj, ex tuj tbʼi Xewbʼaj Xjan›?

²³ Kyaj tqʼamaʼn Jesús qa ok kjawil aʼ kywiʼ qeju che okel lepeʼ tiʼj ‹tuj tbʼi Mambʼaj, tuj tbʼi Kʼwaʼlbʼaj, ex tuj tbʼi Xewbʼaj Xjan› (Mateo 28:19). A jlu in tzaj tyekʼun qa aʼyeju kjawil aʼ kywiʼ ojtzqiʼn kyuʼn alkye toklen Jehová ex alkye toklen Jesucristo (Salmo 83:18; Mateo 28:18). Ax ikx ojtzqiʼn kyuʼn tiʼ in bʼant tuʼn xewbʼaj xjan, aju tipumal (tbʼalor) Dios in najbʼen tuʼn (Gálatas 5:22, 23; 2 Pedro 1:21).

24, 25. a) ¿Tiʼ t-xilen aju in qo kuʼx toj aʼ? b) ¿Alkye xjel tzul tzaqʼweʼn toj juntl xnaqʼtzbʼil?

²⁴ At juntl t-xilen aju in qo kuʼx toj aʼ. Aj tkuʼxa toj aʼ  in kubʼ qʼoʼn te techel qa in «kyima», toj juntl yol, in kyaj ttzaqpiʼna aju ojtxe ttena. Ex aj tjatza toj aʼ tzul tyekʼun qa jun ajbʼeltla te Dios. Mitiʼ tuʼn tel naj tiʼj tkʼuʼja qa in najbʼena te Jehová, nya te jun aqʼuntl, nya te jun tiʼ, nya te jun xjal ex nya te jun kʼloj xjal. In xi tzyet tamiwbʼela tukʼil Jehová aj t-xi tqʼamaʼna qa taja tuʼn tajbʼena te ex aj tjaw aʼ twiʼya (Salmo 25:14).

²⁵ Pero nya tuʼnju ma jaw aʼ qwiʼ ya ma qo klet. Kubʼ ttzʼibʼen apóstol Pablo jlu: «Japunx kyuʼne aju in tmaʼn kolbʼil kyeye [moqa tzʼokx tilil kyuʼne tuʼn kyklete], atwit tchi Dios tuj kywitze tuʼn kyxobʼe twitz» (Filipenses 2:12). Aj tjaw aʼ qwiʼ atz in xi tzyet tuʼn qajbʼen te Dios. Pero qo ximan tiʼj jlu: ¿tzeʼn tuʼn qten kukx ttxlaj Dios ex tuʼn qkyaj ten toj tkʼujlabʼil Dios? Ok ktzajel tzaqʼweʼn jlu toj juntl xnaqʼtzbʼil.