¿ALKYE tqanil in kanet tuʼna aj tkubʼ tuʼjina periódico, aj tok tqʼoʼn twitza tiʼj televisión moqa aj tok tbʼiʼna radio? ¡At nim (bʼampo) nya bʼaʼn in kubʼ bʼinchen ik tzeʼn bʼiybʼel ex nimaq qʼoj! Ax ikx ximana tiʼjju nya bʼaʼn in tzaj tiʼja. Ik tzeʼn jun yabʼil moqa ma kyim jun toj tjaya ex txqantl nya bʼaʼn. Jakule tnaʼya ik tzeʼnj tnaʼ Job, jun tbʼanel xjal ten ojtxe, tej tqʼama qa ‹otaq tzaj nim tbʼis tuʼn nim nya bʼaʼn otaq tzaj tiʼj› (Job 6:2, 3).

Jakulo kubʼ t-ximana jlu:

• ¿Tajtaq (tgantoq) Dios tuʼn ttzaj jlu wiʼje ex kyiʼj kykyaqil xjal?

• ¿Jatumel chin xeʼle jyol onbʼil tuʼn wexe twitz nya bʼaʼn?

• ¿Kpolpetzele jun qʼij jatumel che najal xjal toj mujbʼabʼil twitz Txʼotxʼ?

Oʼkxku toj Tyol Dios jaku che kanet tzaqʼwebʼil quʼn.

«Kʼelel tsuʼn Dios taʼl kywitz kykyaqil; ex mintiʼtl kamik, ex mintiʼtl bʼis, ex mintiʼtl oqʼel, ex mintiʼtl kʼixkʼoj.» (Apocalipsis 21:4)

«Che jawil tʼikpaj qe kox ik tzaʼn masat.» (Isaías 35:6)

«Kjaqetel kywitz qe moẍ.» (Isaías 35:5)

 «Kykyaqil xjal maquʼn [...] che jawitz anqʼin.» (Juan 5:28, 29)

«Mi jun xjal [...] ok tma kyjaʼ: Yabʼ qine, chiwt.» (Isaías 33:24)

«Kchmetel nim twitz triw [moqa wabʼj twitz] txʼotxʼ.» (Salmo 72:16)

Miʼ kubʼ t-ximana qa aju ma tzaj qʼamaʼn kyoj t-xaq uʼj ma che kyaj miʼ japun twiʼ. Quʼn a Dios o tzaj tziyinte, ex in tzaj tqʼamaʼn Tyol alkye tten kbʼantel jlu.

Nya oʼkxju, ax ikx in tzaj t-xnaqʼtzaʼn Tyol Dios qa jaku qo tzalaj toj ambʼil jaʼlo (jaʼla). Ximana tiʼj tkyaqil nya bʼaʼn in tzaj tiʼja. Atlo toklen jlu tukʼe pwaq (tumi), kyukʼe qe toj tjaya, tukʼe jun yabʼil moqa tuʼnju o kyim jun toj tjaya. A Tyol Dios in tzaj onin qe tuʼn qex twitz nya bʼaʼn, ax ikx in nok tqʼuqbʼaʼn qkʼuʼj aj ttzaj tqʼoʼn tzaqʼwebʼil kye qeju xjel (pregunta) lu:

• ¿Tiquʼn in tzaj yajbʼil qiʼj?

• ¿Tiʼ kbʼantel quʼn tuʼn miʼ ttzaj bʼaj qkʼuʼj tuʼn nya bʼaʼn?

• ¿Tiʼ kbʼantel quʼn tuʼn qtzalajxix kyukʼe toj qja?

• ¿Tiʼ in bʼaj qiʼj aj qkyim?

• ¿Okpetzele qo tel juntl maj kyukʼe toj qja o che kyim?

• ¿Tiquʼn jaku tzʼok qʼuqeʼ qkʼuʼj qa kbʼantel aju o tzaj ttziyen Dios?

 Qa in kubʼ tuʼjina, moqa in kubʼ t-ẍchʼina uʼj lu; in kubʼ tyekʼuna qa tajbʼila (tgana) tuʼn tok tojtzqiʼna aju in tzaj t-xnaqʼtzaʼn Tyol Dios. Aju uʼj lu kʼonil tiʼja. Bʼaʼn tuʼn tok tqʼoʼn twitza kyiʼj xjel kyiʼj qeju taqikʼ. Tbʼanel o tzʼel toj kywitz nimxix xjal aju tzeʼn tten in kubʼ kyxnaqʼtzaʼn testigos de Jehová Tyol Dios, aju tukʼe xjel ex tzaqʼwebʼil, ax ikx teya bʼaʼnwt tzʼela toj twitza. Awt Dios tzʼonin tiʼja aj t-xnaqʼtzana tiʼj aju in tzaj t-xnaqʼtzaʼnxix Tyol Dios.