¿TIʼ IN nul toj twiʼya aj t-xi tbʼiʼna aju yol Tqʼijlal Juicio (Día del Juicio)? Nim (bʼampo) xjal in kubʼ kyximen qa ok che ikʼel nimxix xjal twitz tqʼuqbʼil Dios tuʼn kyok toj xjel (pregunta). Ax ikx in kubʼ kyximen qa at junjun che xel toj kyaʼj ex qa at txqantl kbʼel kykastiw te jun majx (juneleʼx) toj qʼaqʼ. Atzunte Tyol Dios in tzaj tqʼamaʼn qa aju Tqʼijlal Juicio jun ambʼil te tzalajbʼil jatumel che okel juntl maj xjal te tzʼaqle ik tzeʼnj tnejel.

Toj Apocalipsis 20:11, 12 in tzaj tqʼamaʼn apóstol Juan tzeʼn Tqʼijlal Juicio: ‹Ex o wile, moqa nlome, jun qʼuqbʼil maʼxix ex saq jatum in kawin Dios, ex o wile aju qʼuql tuj qʼuqbʼil. El oq txʼotxʼ twitz tukʼix kyaʼj, ex bʼiʼx e kubʼ naj. Ex o wile qe kyimni, qeju maʼ kyoklen ex qeju chʼin kyoklen, waʼl qe twitz Dios; ex e jaqet qe libro, ex juntl libro jaqet, aju libro te chwinqlal. Ex e oktzen kyimni toj malbʼil tzeʼnkuxju tzʼibʼin kyuj libro ex tzeʼnkuxju otaq bʼant kyuʼn›. ¿Alkye Jwes qʼuqle toj qʼuqbʼil lu?

A Jehová Jwes Nimxix Toklen kyibʼaj kykyaqil xjal. Pero o kyaj tqʼoʼn malbʼil toj tqʼabʼ juntl xjal. Ik tzeʼnj in tzaj tqʼamaʼn apóstol Pablo toj Hechos 17:31 qa «ma kyaj techan Dios jun qʼij tuʼn kyok kykyaqil xjal tuj xjel tuj tumelxix tuʼn jun xinaq [moqa ichan], aju ma tzʼok tqʼoʼn Dios te jwes». Aju Jwes in tzaj qʼamaʼn  toj texto lu a Jesucristo aju o jatz anqʼin kyxol kyimni (Juan 5:22). Pero ¿jtoj txi tzyet aju Tqʼijlal Juicio ex jteʼ ambʼil ktel?

In tzaj tqʼamaʼn Apocalipsis qa aju Tqʼijlal Juicio ok kxel tzyet aj tbʼaj Armagedón aju tqʼoj Dios, atz jatumel kbʼajel tkyaqilju tokx tjaqʼ tkawbʼil Satanás (Apocalipsis 16:14, 16; 19:19–20:3). * Aj tbʼaj Armagedón ok kbʼelex jupuʼn Satanás kyukʼex qeju nya bʼaʼn t-anjel toj jun jul nimxix t-xeʼ, atz jatumel ok che tel mil abʼqʼi. Toj ambʼil lu, ok che okel xjal toj malbʼil kyuʼn qeju 144.000, aʼyeju 144.000 lu, ‹che kawil tukʼil Crist jun mil abʼqʼi› toj kyaʼj (Apocalipsis 14:1-3; 20:1-4; Romanos 8:17). Ik tzeʼnj ma qo xnaqʼtzan tiʼj, aju Tqʼijlal Juicio nya jun qʼij te 24 or, quʼn a jlu jun mil abʼqʼi ktel.

Toj mil abʼqʼi lu, ok «che okel qe xjal tuj xjel tzaʼnx qeju itzʼ ikx qe kyimni» tuʼn Jesucristo (2 Timoteo 4:1). Aju yol «qeju itzʼ» in yolin kyiʼj qeju «nimxix kyajlal xjal» che kjel anqʼin aj ttzaj Armagedón aju tqʼoj Dios (Apocalipsis 7:9-17). Ax ikx til, moqa tlom, apóstol Juan «qe kyimni [...] waʼl qe twitz Dios» tuʼn kyok toj malbʼil. Tqʼama Jesús jlu: «Kykyaqil xjal maquʼn [...] ok kybʼi tqʼajqʼajel nwiʼye, ex che jawitz anqʼin tuj muqbʼil» (Juan 5:28, 29; Hechos 24:15). Pero ¿alkye kybʼinchbʼen xjal tzul naʼn aj kyok toj malbʼil?

Tojju tzaj yekʼun te Juan «e jaqet qe libro» ex ‹e oktzen kyimni toj malbʼil tzeʼnkuxju tzʼibʼin kyuj libro ex tzeʼnkuxju otaq bʼant kyuʼn› (Apocalipsis 20:12). ¿Tkuʼx aju bʼent kyuʼn xjal toj ambʼil ojtxe kyoj qeju uʼj lu? Mitiʼ (tiloʼ). Melay tzaj naʼn toj juicio aju bʼant kyuʼn xjal tej naʼmxtaq kykyim. ¿Tiquʼn in xi qqʼamaʼn jlu? Tuʼnju in tzaj tqʼamaʼn Tyol Dios qa ‹aju o kyim, tzoqpiʼmajtl tjaqʼ til› (Romanos 6:7). Ya miʼn tzaj naʼntl kyil qeju che jawil anqʼin juntl maj. Tuʼntzen jlu, aʼye qeju uʼj in che jaqet naq in che kubʼ te kyechel qeju akʼaj kawbʼil che ul tqʼoʼn Dios. Tuʼn kyanqʼin te jun majx, aʼyeju che kjel anqʼin toj Armagedón ex aʼyeju che jawil itzʼje juntl maj, il tiʼj tuʼn tokx kybʼiʼn qeju tkawbʼil Dios. Kyxol qeju kawbʼil lu, ateʼ qeju kawbʼil ok che ul tqʼoʼn Jehová toj mil  abʼqʼi. Iktzun tten, teyelex te junjun ok kʼokel toj malbʼil naq alkye tbʼinchbʼen kbʼantel toj Tqʼijlal Juicio.

Toj Tqʼijlal Juicio, ok kxel qʼoʼn ambʼil kye nimxix xjal aʼyeju mitiʼ ok kyojtzqiʼn Dios ex mitiʼ kubʼ kybʼinchen tajbʼil (tvoluntad). Tuʼn tok kyojtzqiʼn xjal aju tajbʼil Dios, ok kxel qʼet xnaqʼtzbʼil kye kykyaqil. Atzun jlu konil kyiʼj «tuʼn kybʼinchante aju tzʼaqlxix» (Isaías 26:9). Naqtzen tuʼnj, nya kykyaqil xjal ok kbʼel kybʼinchen tajbʼil Dios. In tzaj tqʼamaʼn Isaías 26:10 kyjalu: «Maske tzaj qʼaqʼan tkʼuʼja kyiʼj qe xjal mya bʼaʼn, atzun kye mlayx bʼant kyuʼn tuʼn kybʼet tuj tumelxix; maske najl qe kyxol qe xjal bʼaʼn che niman, pero kukx in kybʼinchaʼn mya bʼaʼn ex mintiʼ nneʼl kynikʼ tiʼj ju maʼxix toklena». Aʼyeju xjal nya bʼaʼn lu, ok che kbʼel najsaʼn te jun majx toj Tqʼijlal Juicio (Isaías 65:20).

Aj tbʼaj Tqʼijlal Juicio, aʼyeqe xjal kukx che anqʼil otaq che ok te tzʼaqle ik tzeʼntaq Adán tukʼe Eva tnejelku (1 Corintios 15:24-28). Oktzun che okel xjal toj junxtl malbʼil. Tuʼn tbʼent jlu, ok kʼeletz tzaqpiʼn Satanás ex kxel qʼoʼn ambʼil te tuʼn tok ten juntl maj sbʼul kye xjal (Apocalipsis 20:3, 7-10). Aʼyeqe xjal kʼelel kyikʼen tajaw il ok che tel aj tjapunxix kywiʼ yol lu: «Qe xjal bʼaʼn ok che etzal tiʼj ju txʼotxʼ, ex ax che tel tuj te jumajx» (Salmo 37:29). Ik tzeʼnj ma qo xnaqʼtzan tiʼj, aju Tqʼijlal Juicio ok tzul tiʼn nim tbʼanel kye qeju xjal kukx che ajbʼel te Dios.