1, 2. ¿Tiʼchaq in tzaj qiʼj, ex alkyeqe xjel in che ximin xjal kyiʼj?

TOJ jun tnam jatumel otaq tzaj yajbʼil tuʼn qʼoj, ok juntl qʼoj jatumel e kyim nim (bʼampo) xuʼj ex kʼwaʼl. Kykyaqil qeju xjal lu e kux muquʼn toj junx jul ex e ok qʼoʼn cruz tiʼjele jul ax ikx ok tzʼibʼen jlu kyiʼj cruz: «¿Tiquʼn?». Ax yol jlu najbʼen kyuʼn qeju xjal in tzaj nya bʼaʼn kyiʼj. Tukʼe bʼisbʼajil in kyqʼamaʼn jlu aj tkyim jun xjal kʼujlaʼn kyuʼn moqa aj tkubʼ xitj kyja, tuʼn nimaq qʼoj, tuʼn xitbʼil tuʼnx twitz txʼotxʼ, tuʼn yabʼil ex tuʼn bʼiybʼel, ax ikx in tzaj txqantl nya bʼaʼn kyiʼj. Kyajbʼil (kygan) tuʼn ttzaj qʼamaʼn kye tiquʼn in tzaj tkyaqil jlu.

² ¿Tiquʼn in tzaj tqʼoʼn Jehová ambʼil te yajbʼil? Qa at nimxix tipumal (tbʼalor), nimxix tnabʼil, nimxix tkʼujlabʼil ex tzʼaqlexix, ¿tiquʼn at nimxix ikʼbʼil ex nya bʼaʼn in nok bʼinchen kyiʼj xjal? ¿O ximinxi teya kyiʼj xjel (pregunta) lu?

3, 4. a) ¿Alkye techel at qa jaku txi qqanin tiquʼn in tzaj tqʼoʼn Dios ambʼil te kʼixkʼej? b) ¿Tzeʼn in nela nya bʼaʼn ex yajbʼil toj twitz Jehová?

³ ¿Jaku txi qqʼamaʼn qa nya bʼaʼn tuʼn t-xi qqanin tiquʼn in tzaj tqʼoʼn Dios ambʼil te kʼixkʼej? At junjun xjal in kubʼ kyximen qa ma txi qqanin in kubʼ qyekʼun qa mitiʼ (tiloʼ) qʼuqbʼil qkʼuʼj tiʼj Dios ex moqa mitiʼ in qo nimin te. Pero qa ma kux quʼjin, moqa ma kux qẍchʼiʼn, toj Tyol Dios; ok che kanetel techel quʼn qa ateʼ tmajen Dios xi kyqanin chʼixme aʼyex xjel lu. Jun techel tiʼj jlu, aju xi tqʼamaʼn Habacuc  te Jehová: «¿Tiquʼn taja tuʼn tikʼ nwitze tiʼj yajbʼil ex mya bʼaʼn in kybʼinchaʼn xjal? Nwitze in tzaj nim kytxʼuʼjil xjal ex nim xitbʼil kyxol; tuj tkyaqil part in bʼaj kyikʼlen kyibʼ xjal ex in che qʼojin» (Habacuc 1:3).

⁴ ¿Ok tilen Jehová Habacuc tuʼnju xi tqanin jlu? Mitiʼ, quʼn aju bʼent tuʼn Jehová, e kyaj tqʼoʼn qeju axix (bʼanax) tyol Habacuc toj Tuʼjil Tyol. Nya oʼkxju, ax ikx onen tiʼj Habacuc tuʼn tel mas tnikʼ tiquʼn in tzajtaq tqʼoʼn ambʼil tuʼn ttzaj nya bʼaʼn ex onen tiʼj tuʼn tchʼiy qʼuqbʼil tkʼuʼj. Ax ikx taj Jehová tuʼn tonin tiʼja. Qa naʼnx tuʼna in tzaj tqʼamaʼn Xjan Uʼj (Biblia) qa «ate Dios kwentil» qe (1 Pedro 5:7). Mas in nel tikʼen Dios aju nya bʼaʼn ex aju yajbʼil in tzaj qiʼj twitz alkyexku xjal (Isaías 55:8, 9). Qa ikju, ¿tiquʼn at nim yajbʼil twitz txʼotxʼ?

5. ¿Tiquʼn in tzaj nim yajbʼil che chi xjal, pero tiʼ in tzaj t-xnaqʼtzaʼn Tyol Dios?

⁵ Nim xjal te junxichaq okslabʼil (nimbʼil) o txi kyqanen kye kynejenel ex kye qeju xnaqʼtzal kye tiquʼn in tzaj nim yajbʼil qiʼj, in tzaj tzaqʼweʼn kye qa a tajbʼil (tvoluntad) Dios jlu; ex qa o kyaj bʼant tiʼj tuʼn Dios aju kbʼajel, axpe ikx  tkyaqil nya bʼaʼn in tzaj qiʼj. O txi qʼamaʼn kye nim xjal qa mlay tzʼel qnikʼ tiʼj t-xim Dios ex qa in chex tiʼn Dios xjal, axpe ikx qe tal kʼwaʼl, tuʼn kyten tukʼe toj kyaʼj. Pero ik tzeʼnj o xnaqʼtzan tiʼj melay kubʼ tbʼinchen Jehová jun nya bʼaʼn. In tzaj tqʼamaʼn Xjan Uʼj qa «ate Dios aju at tipumal tuʼn tbʼant tkyaqil tuʼn mintiʼ in tbʼinchaʼn jun mya bʼaʼn ex [mo]qa aju mya tzʼaqlixix» (Job 34:10).

6. ¿Tiquʼn nim xjal in nok kyqʼoʼn tpaj Dios tiʼj tkyaqil yajbʼil in tzaj qiʼj?

⁶ ¿Ojtzqiʼn tuʼna tiquʼn in kyqʼamaʼn xjal qa a Dios at tpaj tiʼj tkyaqil yajbʼil in tzaj qiʼj? At maj, tuʼnju in kubʼ kyximen xjal qa a Dios aju at-xix tipumal in kawin kyibʼaj xjal. Mitiʼ ojtzqiʼn kyuʼn aju axix tok (bʼanax) in tzaj t-xnaqʼtzaʼn Tyol Dios, aju o xnaqʼtzana tiʼj toj xnaqʼtzbʼil 3 te uʼj lu. Aju qa a Satanás in kawin kyibʼaj xjal.

7, 8. a) ¿Alkye tten in kubʼ kyyekʼun xjal qa ik kymod ik tzeʼn te Satanás aju in kawin kyibʼaj? b) ¿Tiʼ taj xjal tuʼnju aj il ex tiʼ in tzaj tuʼnju «noq minabʼen in tzaj mya bʼaʼn tibʼaj»?

⁷ In tzaj tqʼamaʼn Tyol Dios qa «kykyaqil xjal twitz txʼotxʼ ateʼ tjaqʼ tipumal tajaw il» (1 Juan 5:19). A jlu in tzaj tyekʼun tiquʼn at nim nya bʼaʼn twitz txʼotxʼ. In kubʼ kyyekʼun xjal tmod tajaw il «aju in sbʼun kyiʼj kykyaqil xjal twitz txʼotxʼ» (Apocalipsis 12:9). Nim in qʼojen ex in sbʼun Satanás. Tuʼntzen jlu, ax ikx qe xjal atqeʼkx tjaqʼ tipumal, in che qʼojen ex in che sbʼun. Atzun tnejel jlu tiquʼn at nim yajbʼil twitz txʼotxʼ.

⁸ Aju tkabʼ tiquʼn in tzaj yajbʼil twitz txʼotxʼ, aju o xnaqʼtzan tiʼj toj xnaqʼtzbʼil 3, atxix tej tel tpan tibʼ Adán tiʼj Dios toj tbʼanel najbʼil te Edén ok te aj il ex te nya tzʼaqle. Tuʼntzen jlu, taj xjal tuʼn tten toklen ex in nok tilil tuʼn, tuʼn tten jlu te, a jlu o tzaj tiʼn nimaq qʼoj, yajbʼil ex kʼixkʼej (Eclesiastés 4:1; 8:9). Aju toxen tiquʼn in tzaj yajbʼil aju in tzaj tqʼamaʼn Tyol Dios qa «noq minabʼen in tzaj mya bʼaʼn tibʼaj» xjal (kjawil uʼjit Eclesiastés 9:12). Mitiʼ in che ok t-xqʼuqen Jehová xjal tuʼnju nya a kawil kyibʼaj. Tuʼntzun jlu jaku tzaj alkyexku nya bʼaʼn kyiʼj ex toj alkyexku ambʼil.

9. ¿Tiquʼn jaku tzʼok qʼuqeʼ qkʼuʼj qa at tiquʼn in tzaj tqʼoʼn Jehová ambʼil tuʼn ttzaj yajbʼil?

 ⁹ In qo tzalaj tuʼnju nya tuʼn Dios in tzaj nya bʼaʼn. Nya tuʼn in tzaj nimaq qʼoj, bʼiybʼel, yajbʼil, ex aju xitbʼel tuʼnx twitz txʼotxʼ aʼyeju o tzaj kyiʼn nimxix chyon toj qanqʼibʼil. Pero naʼmx ttzaj tzaqʼweʼn xjel aju tiquʼn in tzaj tqʼoʼn Dios ambʼil tuʼn ttzaj tkyaqil yajbʼil lu. Qa at-xix tipumal Dios tuʼn tel tiʼn tkyaqil jlu, ¿tiquʼntzen naʼmx tel tiʼntz? O tzʼok qojtzqiʼn Jehová ex o tzʼok qqʼoʼn qwitz tiʼj qa at-xix te tkʼujlabʼil, a jlu in nok tqʼuqbʼaʼn qkʼuʼj qa at tiquʼn in tzaj tqʼoʼn ambʼil tuʼn ttzaj yajbʼil (1 Juan 4:8).

10. ¿Alqiʼj yolin Satanás nya bʼaʼn: tiʼj tipumal Jehová moqa tiʼj toklen tuʼn tkawin, ex tzeʼn tena jlu tuʼn?

¹⁰ Tuʼn tkanet tzaqʼwebʼil tiquʼn in tzaj tqʼoʼn Dios ambʼil tuʼn ttzaj yajbʼil, bʼaʼn tuʼn qximen tiʼj ambʼil tej ttzaj tzyet nya bʼaʼn. Tej kyel tpaʼn Satanás Adán tukʼe Eva tiʼj Jehová, tzaj jun nya bʼaʼn. Mitiʼ tqʼama Satanás qa mitiʼ tipumal Jehová, quʼn ojtzqiʼntaq tuʼn qa mlay bʼaj tipumal. Quʼn tuʼnju tqʼama kubʼ tyekʼun qa mitiʼtaq Toklen Jehová tuʼn tkawin. Tej tqʼama Satanás qa in yolin Dios nya ax yol ex qa nya taj tuʼn kytzalaj xjal tiʼj tkyaqil tbʼanel, tukʼe jlu tqʼama qa jun nya bʼaʼn ajkawil te Dios (kjawil uʼjit Génesis 3:2-5). Ax ikx tukʼe jlu tqʼama qa mastaq bʼaʼn che tel xjal qa mitiʼ xkawin Dios kyibʼaj. Iktzun tten ok lipen Satanás tiʼj toklen Jehová tuʼn tkawin.

11. ¿Tiquʼn mitiʼ e kubʼ tnajsaʼn Jehová qeju bʼinchel nya bʼaʼn toj tbʼanel najbʼil te Edén?

¹¹ Tej tel kypan kyibʼ Adán tukʼe Eva tiʼj Jehová, chʼixmi a jlu kyqʼama: «Nya il tiʼj tuʼn tkawin Dios qibʼaje, quʼn jaku bʼent tuʼn tkubʼ qximane alkye bʼaʼn ex alkye nya bʼaʼn». ¿Tiʼtaq kbʼantel tuʼn Jehová tuʼn tkyaj nya bʼaʼn toj tbʼanel? ¿Tiʼtaq kbʼantel tuʼn Jehová tuʼn tkubʼ tyekʼun kywitz kykyaqil t-anjel qa aʼyeju el kypan kyibʼ tiʼj, nya iktaq tten  aju otaq tzaj kyqʼamaʼn ex qa aju tzeʼn tten in bʼant tiʼchaq tuʼn a mas tbʼanel jlu? At junjun xjal in kubʼ kyximen qa maswitlo bʼaʼn naqwit bʼiʼx e kubʼ tnajsaʼn Dios qeju bʼinchel nya bʼaʼn ex e kubʼwitle tbʼinchen kabʼetl xjal. Naqtzen tuʼnj, otaq tzaj tqʼamaʼn Dios alkyetaq t-xim at tiʼj Txʼotxʼ aju tuʼn tok te jun tbʼanel najbʼil ex tuʼn tkubʼ noj twitz kyuʼn qeju tkʼwaʼl Adán tukʼe Eva (Génesis 1:28). Aju in kubʼ t-ximen Jehová tuʼn tbʼent tuʼn, tkyaqil in japen bʼaj twiʼ (Isaías 55:10, 11). Ax ikx naqwit e kubʼ tnajsaʼn Dios qeju bʼinchel nya bʼaʼn toj tbʼanel najbʼil te Edén, mitiʼwtlo el nikʼ qa at toklen Dios tuʼn tkawin.

12, 13. ¿Alkye techel in kubʼ qʼoʼn tuʼn ttzaj tyekʼun tiquʼn xi tqʼoʼn Jehová ambʼil te Satanás tuʼn tkawin kyibʼaj xjal ex tuʼn tkubʼ kykawin kyibʼ xjal?

¹² Qqʼonku jun techel tiʼj jlu. Jun ajxnaqʼtzal in xi tchikʼbʼaʼn kye kʼwaʼl alkye tten jaku bʼaj ajlet jun tajlal kwest. Jun kyxol qeju kʼwaʼl lu aju sekʼ pero nya bʼaʼn tmod in xi tqʼamaʼn qa nya ik tten tuʼn tajlet jlu, iktzun in kubʼ tyekʼun qa mitiʼ in bʼent tqʼon ajxnaqʼtzal xnaqʼtzbʼil. Tajxix kʼwaʼl tuʼn tkubʼ tyekʼun qa at juntl mas tbʼanel tumel tuʼn tbʼaj ajlet jlu. At junjun in kubʼ kyximen qa jaku bʼent tuʼn, ex in che  ok lepeʼ tiʼj. ¿Tiʼ kbʼantel tuʼn ajxnaqʼtzal? Jakule che ex tlajoʼn qeju nya bʼaʼn kʼwaʼl lu, pero ¿tiʼ jaku kubʼ kyximen qeju txqantl? Jakulo kubʼ kyximen qa aju kyukʼe ex qeju otaq che ok lepeʼ tiʼj ax tok kyuʼn. Jakule mlay tzʼokx kybʼiʼntl ajxnaqʼtzal ex jakulo kubʼ kyximen qa in tzaj xobʼ tuʼnju ok kʼelel toj qʼanchaʼl qa nya ik tten xnaqʼtzbʼil in xi tqʼoʼn. ¿Yejtzun qa ma txi tqʼoʼn ajxnaqʼtzal ambʼil te kʼwaʼl tuʼn tkubʼ tyekʼun kywitz kykyaqil qa ax tok aju in xi tqʼamaʼn?

¹³ Chʼixme axju o bʼant tuʼn Jehová. Qa naʼnx tuʼna nya oʼkx qeju el kypan kyibʼ tiʼj Jehová toj tbʼanel najbʼil te Edén attaq kyoklen tiʼj jlu, ax ikx kyil, moqa kylom, nimxix anjel aju otaq tzikʼ (Job 38:7; Apocalipsis 5:11). Aju ok kbʼanteltaq tuʼn Jehová tuʼn tkyaj nya bʼaʼn toj tbʼanel, attaq toklen toj kywitz anjel, ex aj tbʼet ambʼil attaq toklen toj kywitz qeju txqantl tbʼinchbʼen. Tuʼntzen jlu, ¿tiʼ o bʼent tuʼn Jehová? O txi tqʼoʼn ambʼil te Satanás tuʼn tkubʼ tyekʼun alkye tten tuʼn tkawin kyibʼaj xjal. Ax ikx o txi tqʼoʼn ambʼil kye xjal tuʼn tkubʼ kykawin kyibʼ tjaqʼ tipumal Satanás.

14. ¿Alkyechaq ok kʼelel nikʼ tiʼj tuʼnju xi tqʼoʼn Jehová ambʼil kye xjal tuʼn kykawin kyibʼaj txqantl?

¹⁴ Aju ajxnaqʼtzal in qo yolintaq tiʼj, ojtzqiʼn tuʼn qa nya ax tok aju in tzaj tqʼamaʼn kʼwaʼl nya bʼaʼn tmod kyukʼex qeju ma che ok lepeʼ tiʼj. Pero ax ikx ojtzqiʼn tuʼn qa ma txi tqʼoʼn ambʼil kye kʼwaʼl tuʼn tjaw kyiʼn tajlal, ok kʼelel kynikʼ kykyaqil kʼwaʼl alkye at toklen tuʼn t-xnaqʼtzaʼn. Aj tel nikʼ qa mitiʼ xbʼent tajlet aju tajlal lu kyuʼn kʼwaʼl, aʼyeju tbʼanel kʼwaʼl ok kxel kyqʼamaʼn qa oʼkx ajxnaqʼtzal at tnabʼil tuʼn t-xi tqʼoʼn xnaqʼtzbʼil. Ex ok kʼelel kynikʼ tiquʼn che elex tlajoʼn ajxnaqʼtzal qeju kʼwaʼl lu toj tja xnaqʼtzbʼil. Ax ikx ojtzqiʼn tuʼn Jehová qa ok kʼelel kynikʼ kykyaqil qeju tbʼanel anjel ex kykyaqil qeju tbʼanel xjal qa nya ax tok aju tqʼama Satanás kyukʼex qe nya bʼaʼn t-anjel ex qa mlayx bʼent kykawin xjal kyibʼaj txqantl. Ok kʼelel kynikʼ tiʼjju tqʼama Jeremías: «Nman, bʼaʼn wuʼne, mya ax te xjal tajaw tchwinqlal, ex  mlay tzʼel tnikʼ xjal tiʼj alkye bʼe bʼaʼn tuʼn tbʼet tuj» (Jeremías 10:23).

15, 16. a) ¿Tiquʼn o tzaj tqʼoʼn Jehová nim ambʼil tuʼn qten toj yajbʼil? b) ¿Tiquʼn mitiʼ in nonin Dios kyiʼj xjal aj ttzaj nya bʼaʼn?

¹⁵ ¿Tiquʼn o tzaj tqʼoʼn Jehová nim ambʼil tuʼn qten toj yajbʼil? ¿Ex tiquʼn in tzaj tqʼoʼn ambʼil tuʼn ttzaj nya bʼaʼn qiʼj? Qo ximen tiʼj kabʼe tiʼ mitiʼ bʼant tuʼn ajxnaqʼtzal. Tnejel, mitiʼ el tiʼn ambʼil te nya bʼaʼn kʼwaʼl tuʼn tkubʼ tyekʼun qa ax tok aju in tzaj tqʼamaʼn, tkabʼ mitiʼ onin tiʼj kʼwaʼl tuʼn tbʼant jlu tuʼn. Ax ikx te Jehová at kabʼe tiʼ mitiʼ o bʼent tuʼn. Tnejel, mitiʼ o tzʼel tiʼn ambʼil te Tajaw il kyukʼex qeju anjel o che ok lepeʼ tiʼj tuʼn tkubʼ kyyekʼun qa ax tok aju o tzaj kyqʼamaʼn. Tuʼntzun jlu o tzaj tqʼoʼn Dios nim ambʼil. Toj nim ambʼil lu o tzʼajbʼen tkyaqil wiq, moqa tten, kawbʼil kyuʼn xjal ax ikx atqeʼ xjal at nim kynabʼil tuʼn tbʼant nim tiʼchaq kyuʼn. Pero kukx in nok bʼinchen nya bʼaʼn kyiʼj xjal, kukx tchʼiy nimaq qʼoj, at nim xjal mebʼa (prow) ex at mas tiʼchaq nya bʼaʼn in bʼant kyuʼn xjal. A jlu in tzaj tyekʼun qa mlayx bʼant kykawin xjal.

¹⁶ Tkabʼ, mitiʼ o tzʼonin Jehová tiʼj Satanás tuʼn tkawin kyibʼaj xjal. Naqwit in nonin Dios tuʼn miʼ ttzaj nya bʼaʼn, jaku tzaj tyekʼun jlu qa in nonen Dios kyiʼj qeju el kypan kyibʼ tiʼj, ax ikx jakule kubʼ qximen qa jaku bʼent kykawin xjal ex qa melay tzaj nya bʼaʼn tjaqʼ kykawbʼil. Naqwit ik in bʼentju tuʼn Jehová, jaku kubʼ tyekʼun jlu qa in nonin tuʼn tjapun twiʼ jun nya ax yol. Pero «mlay bʼant tuʼn tnikʼan [moqa tuʼn tsbʼun] Dios yol» (Hebreos 6:18).

17, 18. ¿Tiʼ kbʼantel tuʼn Jehová tukʼe tkyaqil nya bʼaʼn o tzaj tuʼn kykawbʼil xjal ex tuʼnju in bʼent tuʼn Satanás?

¹⁷ ¿Tiʼ kbʼantel tuʼn Jehová tukʼe tkyaqil nya bʼaʼn o tzaj tuʼnju el kypan kyibʼ xjal tiʼj? Qa ma tzaj qnaʼn, at-xix tipumal Jehová. A jlu in tzaj tyekʼun qa jaku kyaj tkyaqil nya bʼaʼn tuʼn toj tbʼanel. Ik tzeʼnj o qo xnaqʼtzan tiʼj, ya mlay  kubʼ yajintl Txʼotxʼ ex ok kʼokel te jun tbʼanel najbʼil. Oʼkx qa ma tzʼok qʼuqeʼ qkʼuʼj tiʼjju xi tqʼon tibʼ Jesús te chojbʼil, jaku qo tzaqpaj tiʼj tkyaqilju in tzaj tuʼn il. Aʼyetzen kyimni ok che jawil anqʼin juntl maj. Iktzun tten kʼajbʼel Jesús tuʼn Dios «tuʼntzun tkubʼ xitj tkyaqil taqʼunbʼen tajaw il» (1 Juan 3:8). Ok kbʼantel jlu tuʼn Jehová toj ambʼil aju ximen tuʼn. In qo tzalaj tuʼnju naʼmx tbʼent jlu tuʼn, quʼn tuʼnju at tpasens o tzaj tqʼoʼn ambʼil qe tuʼn tok qojtzqiʼn aju axix tok ex tuʼn qajbʼen te (kjawil uʼjit 2 Pedro 3:9, 10). Pero kukx in jyon Dios kyiʼj qeju xjal kyajbʼil tuʼn kyajbʼen te ex in nonin kyiʼj tuʼn tikʼx tkyaqil yajbʼil kyuʼn aju in tzaj tuʼn nya bʼaʼn (Juan 4:23; 1 Corintios 10:13).

¹⁸ Atle junjun xjal jaku kubʼ ximinte qa naqwit bʼiʼx e kubʼ tbʼinchen Dios Adán tukʼe Eva tuʼn miʼ tel kypan kyibʼ tiʼj, mitiʼwtlo in tzaj tkyaqil yajbʼil lu. Tuʼn tok toj qwiʼ tiquʼn mitiʼ bʼent jlu tuʼn, bʼaʼn tuʼn ttzaj qnaʼn jun oyaj (kotz) nim toklen o tzaj tqʼoʼn Jehová qe.

19. ¿Alkye oyaj nimxix toklen o tzaj tqʼoʼn Jehová qe, ex tiquʼn qo tzalajel tiʼj oyaj lu?

¹⁹ Ik tzeʼn o qo xnaqʼtzan tiʼj toj xnaqʼtzbʼil 5, o qo kubʼ tbʼinchaʼn Dios tuʼn tkubʼ qximen alkye bʼaʼn ex alkye nya bʼaʼn. Aju oyaj lu nimxix toklen quʼn tzaqpiʼn qoʼ tuʼn qximen. Ax ikx o che kubʼ tbʼinchen Dios nimxix txkup, pero mlay bʼent kyximen alkye bʼaʼn ex alkye nya bʼaʼn. Naqwit o qo kubʼ tbʼinchen Dios ik tzeʼn qe txkup, ¿jaku qo tzalaj? Melayx. Tuʼntzen jlu in qo tzalaj tuʼnju tzaqpiʼn qoʼ tuʼn qximen tzeʼn qo okela, alkye  qanqʼibʼil kjawil qjyoʼn ex alkyeqe qamiw che tel. In qo tzalaj tuʼnju tzaqpiʼn qoʼ ex taj Dios tuʼn qten ikju.

20, 21. ¿Tzeʼn jaku tzʼajbʼen aju tbʼanel oyaj quʼn tojxix tumel, ex tiquʼn kbʼantel jlu quʼn?

²⁰ Mitiʼ in qo ok tchqʼoʼn (obligar) Jehová tuʼn qajbʼen te (2 Corintios 9:7). ¿Alkye mas bʼaʼn toj twitz jun manbʼaj (tat) moqa jun txubʼaj: aju tuʼn t-xi tqʼamaʼn tal moqa tkʼwaʼl te qa nim tkʼujlabʼil tiʼj naq tuʼnju ma txi kyqʼamaʼn te, moqa mas bʼaʼn tuʼn ttzaj tqʼamaʼn kʼwaʼl aju tkuʼx toj tanmi? Tuʼntzunju bʼaʼn tuʼn t-ximana tiʼj jlu: «¿Tzeʼn kʼajbʼel weʼ tzaqpibʼil wuʼn aju ma tzaj tqʼoʼn Jehová weye?». Nya bʼaʼn ajbʼen jlu tuʼn Satanás, tuʼn Adán ex tuʼn Eva, tuʼnju el kyikʼen Jehová. ¿Yejtzun teya tzeʼn kʼajbʼel jlu tuʼna?

²¹ In tzaj qʼoʼn ambʼil teya tuʼn tajbʼen tbʼanel oyaj lu tuʼna tojxix tbʼanel. Jaku tzʼok tmojbʼan tibʼa kyukʼe qeju nimxix kyajlal xjal in che ajbʼen te Jehová. Nim in tzalaj Dios kyuʼn qeju xjal lu, quʼn in kubʼ kyyekʼun qa nya ax yolen Satanás ex jun nya bʼaʼn ajkawil te (Proverbios 27:11, TNM). Ax ikx teya jaku bʼent jlu tuʼna qa ma jaw tjyona tuʼn tajbʼena te Dios. Toj juntl xnaqʼtzbʼil tzul qʼamaʼn alkye tten jaku bʼent jlu tuʼna.