MITIʼ in tzaj tqʼamaʼn Tyol Dios alkyexix ambʼil ul itzʼj Jesús. Pero in qo tzaj tonin tuʼn tkubʼ qximen qa nya toj diciembre ul itzʼj Jesús.

Toj Belén atz jatumel ul itzʼj Jesús, ¿tzeʼn taʼ ambʼil toj diciembre? At jun xjaw (qyaʼ) kislev tbʼi kyuʼn aj judiy aju in kubʼ tzʼaq toj noviembre ex diciembre, toj xjaw lu at cheʼw ex in kubʼ jbʼal. Aj tbʼaj kislev in xi tzyet juntl xjaw tebet tbʼi aju in kubʼ tzʼaq toj diciembre ex enero, toj xjaw lu at mas cheʼw ex kyoj tembʼil jawni in kubʼ ttxa cheʼw. ¿Tiʼ in tzaj tqʼamaʼn Tyol Dios tiʼj ambʼil toj Belén? Qo xnaqʼtzan tiʼj.

Jun kyxol qeju xjal kubʼ kytzʼibʼin Tyol Dios, Esdras tbʼi, in tzaj tqʼamaʼn qa toj t-xjawil kislev attaq cheʼw ex in kubʼtaq jbʼal. In tzaj tqʼamaʼn qa «tuj winqin tajlal tbʼelajin xjaw» aju kislev, ok kychmon kyibʼ nim (bʼampo) xjal toj Jerusalén ex «in che luʼlun [...] tuʼn tlaj jbʼal in kubʼtoq kyibʼaj». Ax ikx in tzaj tqʼamaʼn Esdras qa aʼyeju xjal otaq tzʼok kychmon kyibʼ kyqʼama jlu tiʼj ambʼil: «Mintiʼ tuʼn tikʼ jbʼal ex mlay bʼant ax tuʼn qkyaj tene tuj kay» (Esdras 10:9, 13; Jeremías 36:22).  Tuʼnju in kubʼtaq nim jbʼal kyoj qeju tembʼil lu, in che ajtaq meltzʼaj juntl maj xjal kyukʼil kyrit, moqa kyẍneʼl, chʼixtaq tul kanin diciembre.

Pero tej tul itzʼj Jesús in tzaj tqʼamaʼn Tyol Dios qa in che xqʼuqintaq xjal kyẍneʼl toj kojbʼil. Axpe ikx in tzaj tqʼamaʼn Lucas, jun kyxol qeju kubʼ kytzʼibʼen Tyol Dios, qa «niqayin [moqa qayni] ttxaʼn tnam Belén ateʼtoq junjun pastor, ax in che kyaj ten tuj kojbʼil te qonikʼan tuʼn kykwentin kyẍneʼl» (Lucas 2:8-12). Aju texto lu in tzaj tyekʼun qa nya oʼkx in che xqʼuqintaq kyẍneʼl toj qʼij, ax ikx in che kyaj tentaq xqʼuqil kyẍneʼl te qonikʼan. Qa attaq nim cheʼw ex qa in kubʼtaq jbʼal toj diciembre atz toj tnam Belén, ¿jaku che kyaj xjal xqʼuqil kyẍneʼl toj kojbʼil? Mlayx. A jlu in tzaj tyekʼun qa nya toj diciembre ul itzʼj Jesús. *

In tzaj tqʼamaʼn Tyol Dios alkye ambʼil kyim Jesús, pero mitiʼ (tiloʼ) in tzaj tqʼamaʼn alkyexix ambʼil ul itzʼj. Aj jlu in tzaj tnaʼn qe aju tqʼama Salomón: «Mas bʼaʼn qa ma che yolin xjal bʼaʼn qiʼj twitz ju perjum tbʼanilxix. Mas bʼaʼn ju qʼij ok qkyim twitz ju qʼij tej qul itzʼj» (Eclesiastés 7:1). A jlu in tzaj tyekʼun tiquʼn mas in yolin Tyol Dios tiʼjju taqʼun Jesús bʼent ex tiʼj tkyimlen, atzen tiʼj titzʼjlen mitiʼxix in yolin.