XNAQʼTZBʼIL 16
¿Tiʼ bʼant tuʼn Jesús tej tten tzalu twitz Txʼotxʼ?
Ateʼ nim xjal in kubʼ kyximen qa jun tal neʼ Jesús ex qa mintiʼ tipumal, qa jun profeta at nim tnabʼil moqa noq jun xjal xi tqʼon tibʼ tuʼn tkyim. Pero, ¿nyapetzulo mas jaku tzʼok qojtzqiʼn Jesús qa ma qo xnaqʼtzan tiʼj tkyaqilju bʼant tuʼn tej tten tzalu twitz Txʼotxʼ? Toj xnaqʼtzbʼil lu, kʼokel qojtzqiʼn junjun tiʼchaq bʼant tuʼn Jesús ex tzeʼn jaku tzʼonin jlu qiʼj.
1. ¿Alkye aqʼuntl mas nim toklen bʼant tuʼn Jesús?
Aju aqʼuntl mas nim toklen bʼant tuʼn Jesús aju tuʼn t-xi pakbʼet tbʼanel tqanil «tiʼj tkawbʼil Dios» kye xjal (uʼjinktza Lucas 4:43). Xi tqʼamaʼn Jesús kye xjal qa kbʼel tqʼoʼn Dios jun kawbʼil ex kʼelel tiʼn tkyaqil nya bʼaʼn. a Toj oxe abʼqʼi tukʼil mij moqa nikʼjan, pakbʼan Jesús tiʼj tbʼanel tqanil lu (Mateo 9:35).
2. ¿Tiquʼn e bʼant qe milagr tuʼn Jesús?
In tzaj tqʼamaʼn Tyol Dios jlu: «O kyile qe tbʼinchbʼen [Jesús] nim kyipumal ex qe señ e bʼant tuʼn, ax Dios o qʼonte tipumal» (Hechos 2:22). Noq tuʼn tipumal Dios, weʼ jun kyqʼiqʼ jbʼal tuʼn Jesús, xi tqʼoʼn kywa nim mil xjal, e qʼanit yabʼ tuʼn ex e jaw anqʼin junjun xjal tuʼn (Mateo 8:23-27; 14:15-21; Marcos 6:56; Lucas 7:11-17). Tzaj kyyekʼin milagr bʼant tuʼn Jesús qa otoq tzaj samaʼn tuʼn Dios. Ax ikx tzaj kyyekʼin qa at tipumal Jehová tuʼn t-xi tbʼinchaʼn tiʼj tkyaqil nya bʼaʼn in tzaj qiʼj.
3. ¿Tiʼ xnaqʼtzbʼil jaku tzʼel qiʼn tiʼjju alkye tten anqʼin Jesús?
Nimen Jesús te Jehová toj tkyaqil ambʼil (uʼjinktza Juan 8:29). Kukx ten tzʼaqli twitz ex kukx xi tbʼinchaʼn aju otoq tzaj tqʼamaʼn te tzmaxi tej tkyim, maske ok tilil kyuʼn xjal tuʼn miʼn tbʼant tuʼn. Tuʼn tkyaqilju bʼant tuʼn, kubʼ tyekʼin qa kukx jaku qo ajbʼen te Dios maske in qo ok weʼ twitz nya bʼaʼn. Tuʼn jlu, kubʼ tqʼoʼn Jesús jun tbʼanel techel kywitz t-xnaqʼtzbʼen «tuʼntzun kukx kyok lepeʼ tiʼj» (1 Pedro 2:21).
QO JYON MAS TQANIL
Qo xnaqʼtzan tiʼj alkye tten pakbʼan Jesús ex tzeʼn e bʼant qe milagr tuʼn.
4. Pakbʼan Jesús tiʼj tbʼanel tqanil
Xi tbʼetin Jesús nim kilómetro kyoj bʼe at nim quq kyoj noq tuʼn t-xi tqʼamaʼn tbʼanel tqanil kye nimku xjal. Kyuʼjinktze Lucas 8:1 ex che yolin kyiʼj xjel lu:
-
¿Oʼkxpe pakbʼan Jesús kye xjal e pon bʼilte?
-
¿Tiʼ bʼant tuʼn Jesús tuʼn kykanet xjal tuʼn?
Kyaj tqʼamaʼn Dios qa kpakbʼaltoq Mesías tiʼj tbʼanel tqanil. Kyuʼjinktze Isaías 61:1 ex 2, ex che yoline kyiʼj xjel lu:
-
¿Tzeʼn japun profecía lu tuʼn Jesús?
-
Tiʼ teya t-ximbʼetz tiʼj, ¿nimpe toklen tuʼn tok kybʼiʼn xjal tbʼanel tqanil lu?
5. Tqʼama Jesús tbʼanel consej
Nya oʼkx pakbʼan Jesús tiʼj tbʼanel tqanil, sino ax ikx xi tqʼoʼn tbʼanel consej kye xjal. Qo xnaqʼtzan tiʼjju tqʼama toj jun tchikʼbʼabʼil twi jun witz. Kyuʼjinktze Mateo 6:14, 34 ex 7:12, ex che yoline kyiʼj xjel lu:
-
¿Alkyeqe tbʼanel consej tqʼama Jesús kyoj texto lu?
-
¿In kubʼpe t-ximen teya qa jaku che onin consej lu kyiʼj xjal toj ambʼil jaʼlo?
6. E bʼant milagr tuʼn Jesús
Xi tqʼoʼn Jehová tipumal Jesús tuʼn tbʼant nim milagr tuʼn. Tuʼn tok kyojtzqiʼne jun techel, kyuʼjinktze Marcos 5:25 a 34 moqa kyqʼonke kywitze tiʼj VIDEO. Yajxitl che yoline kyiʼj xjel lu:
-
Ik tzeʼn setz yekʼin toj video, ¿tiʼ ok qeʼ tkʼuʼj xuʼj tiʼj?
-
¿Alkye jun tiʼ mas tbʼanel ma tzʼela toj twitza tiʼj milagr lu?
Kyuʼjinktze Juan 5:36 ex che yoline tiʼj xjel lu:
-
¿Tiʼ in tzaj kyyekʼin milagr e bʼant tuʼn Jesús?
¿Ojtzqiʼn jlu tuʼna?
Chʼixme tkyaqilju ojtzqiʼn quʼn tiʼj tanqʼibʼil Jesús atz in kanet quʼn kyoj uʼj te Mateo, Marcos, Lucas ex Juan. E yolin aj tzʼibʼil kyiʼj uʼj lu tiʼj junxichaq tiʼchaq ikʼ toj tanqʼibʼil Jesús. Aj quʼjin kyiʼj qeju kyaje uʼj lu, in nel qnikʼ tiʼj tkyaqilju bʼant tuʼn Jesús.
-
MATEO
Atzun tnejel uʼj lu kubʼ tzʼibʼin tiʼj tanqʼibʼil Jesús. Mas in yolin kyiʼj t-xnaqʼtzbʼil Jesús ex tiʼjju tqʼama tiʼj Tkawbʼil Dios.
-
MARCOS
Atzun uʼj lu mas tal chʼin kubʼ tzʼibʼin. Toj uʼj lu, in tzaj qʼamaʼn nim tbʼanel tiʼchaq bʼant tuʼn Jesús.
-
LUCAS
Toj uʼj lu, in tzaj qʼamaʼn qa ok tqʼoʼn Jesús toklen naʼj Dios ex qa kubʼ tyekʼin tbʼanel tmod kyukʼil xuʼj.
-
JUAN
In nonin uʼj lu qiʼj tuʼn tel qnikʼ tiʼj qa ten tbʼanel tmod Jesús, tuʼnju in tzaj tqʼamaʼn nimku tiʼchaq yolin Jesús tiʼj kyukʼil tamiw ex junjuntl xjal.
AJU IN TZAJ KYQʼAMAʼN JUNJUN XJAL: «A Jesús Dios».
-
¿Tiʼ t-ximbʼetza tiʼj jlu?
TOJ CHʼIN YOL
Pakbʼan Jesús tiʼj Tkawbʼil Dios, e bʼant milagr tuʼn ex nimen te Jehová.
Aju ma qo yolin tiʼj
-
¿Alkye aqʼuntl mas nim toklen bʼant tuʼn Jesús tej tten tzalu twitz Txʼotxʼ?
-
¿Tiʼ in tzaj kyyekʼin qe milagr e bʼant tuʼn Jesús?
-
¿Alkyeqe tbʼanel consej tqʼama Jesús?
OJTZQINKA CHʼINTL
¿Alkye tqanil mas yolin Jesús tiʼj?
«¿Tiquʼn nim toklen te Jesús aju Tkawbʼil Dios?» (Aju Xqʼuqil, 1 te octubre te 2014)
Ojtzqinka tiquʼn jaku tzʼok qeʼ qkʼuʼj tiʼj qa ax tok qe milagr e bʼant tuʼn Jesús.
«¿Tiʼ xnaqʼtzbʼil jaku tzʼel qiʼn kyiʼj milagr bʼant tuʼn Jesús?» (Aju Xqʼuqil, 15 te julio te 2004)
Ojtzqinka tzeʼn chʼexpaj tanqʼibʼil jun xjal tej tok tojtzqiʼn qa nya oʼkx ximen Jesús tiʼjx.
«Oʼkxtoq in chin ximane wiʼjxe» (Xnaqʼtzbʼil toj uʼj Xqʼuqil)
Ojtzqinka qe tiʼchaq bʼaj toj tanqʼibʼil Jesús.
«Aju ikʼ toj tanqʼibʼil Jesús tzalu twitz Txʼotxʼ» (Onbʼil tuʼn qxnaqʼtzan, Xnaqʼtzbʼil 4-B)
a Kyoj xnaqʼtzbʼil 31 a 33 kʼelel mas qnikʼ tiʼj tiʼ aju Tkawbʼil Dios.
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
