XNAQʼTZBʼIL 17
¿Tzeʼn tmod Jesús?
Aj tel qnikʼ tiʼjju bʼant tuʼn Jesús tej tten twitz Txʼotxʼ ex tiʼjju tqʼama, kʼonil qiʼj tuʼn qok laqʼeʼ mas ttxlaj ex ttxlaj Jehová, aju Ttat. ¿Alkyeqe tbʼanel tmod Jesús kubʼ tyekʼin? ¿Tiʼ jaku bʼant quʼn tuʼn tel qkanoʼn qe tmod Jesús?
1. ¿Alkye tten el tkanoʼn Jesús qe tmod Ttat?
O ten Jesús nim millón abʼqʼi toj kyaʼj ex o tzʼok tqʼoʼn twitz tiʼj tkʼujlabʼil Ttat ex o tzʼel tkanoʼn tiʼj. Tuʼntzunju, ax t-ximbʼetz at ik tzeʼn te, axju in kubʼ tnaʼn ex aʼyex tiʼchaq in kubʼ tbʼinchaʼn (uʼjinktza Juan 5:19). Nya oʼkxju, ax ikx in kubʼ tyekʼin qe tbʼanel tmod Ttat ex ax qʼamante jlu: «Alkye ma chin ilwaje tuʼn, ma ilwaj Dios Mambʼaj tuʼn» (Juan 14:9). Tuʼntzunju, qa mas ma tzʼok tojtzqiʼna Jesús mas kʼokel tojtzqiʼna Jehová. Jun techel, kubʼ tyekʼin Jesús qʼaqʼbʼil tkʼuʼj kyiʼj xjal, a jlu in tzaj tyekʼin qa in kubʼ tyekʼin Jehová qʼaqʼbʼil tkʼuʼj tiʼja.
2. ¿Tzeʼn kubʼ tyekʼin Jesús qa kʼujlaʼn Ttat tuʼn?
Tqʼama Jesús jlu: «Il tiʼj tuʼn tel kynikʼ kykyaqil xjal tiʼj qa kʼujlaʼn Nmane wuʼne, ex in nbʼinchaʼne ik tzaʼnx tzaj tmaʼn Nmane weye» (Juan 14:31). Tej tten Jesús tzalu twitz Txʼotxʼ, kubʼ tyekʼin qa kʼujlaʼntoq Ttat tuʼn tej tnimen te toj tkyaqil ambʼil, axpe ikx tej tok weʼ twitz nya bʼaʼn. Ax ikx, tgantoq Jesús tuʼn tyolin tiʼj Ttat ex tuʼn tonin kyiʼj txqantl tuʼn kyok te tamiw Dios (Juan 14:23).
3. ¿Tzeʼn o kubʼ tyekʼin Jesús qa kʼujlaʼn qe xjal tuʼn?
In tzaj tqʼamaʼn Tyol Dios qa kʼujlaʼn qe xjal tuʼn Jesús (Proverbios 8:31). Kubʼ tyekʼin tkʼujlabʼil kyiʼj tej t-xi tqʼuqbʼaʼn kykʼuʼj ex tej tonin kyiʼj, ex mintiʼ ayon tuʼn taj qʼoʼn t-xel te. Ax ikx, kubʼ tbʼinchaʼn qe milagr tuʼnju tzaj qʼaqʼin tkʼuʼj kyiʼj xjal ex nya tuʼn tkubʼ tyekʼin tipumal (Marcos 1:40-42). Kubʼ tyekʼin tbʼanel tmod kyukʼil kykyaqil xjal ex xi tqʼuqbʼaʼn kykʼuʼj qeju attoq jun tbʼanel kyanmi. Ax ikx, kubʼ t-ximen tuʼn tikʼx kʼixkʼoj tuʼn ex tuʼn t-xi tqʼoʼn tchwinqlal kyiʼj xjal. Ex mas at tkʼujlabʼil kyiʼj qeju in xi kybʼiʼn t-xnaqʼtzbʼil (uʼjinktza Juan 15:13, 14).
QO JYON MAS TQANIL
Qo xnaqʼtzan mas kyiʼj tbʼanel tmod Jesús, ax ikx qo xnaqʼtzan tiʼj tzeʼn jaku tzʼel qkanoʼn tkʼujlabʼil ex tzeʼn jaku txi qbʼinchaʼn xtalbʼil kyiʼj txqantl ik tzeʼn te.
4. Kʼujlaʼn Tman Jesús tuʼn
Kyaj tyekʼin Jesús tzeʼn tuʼn tkubʼ qyekʼin qkʼujlabʼil tiʼj Dios. Kyuʼjinktze Lucas 6:12 ex Juan 15:10 ex 17:26. Yajxitl che yoline tiʼj xjel lu:
-
Aj tok qojtzqiʼn aju bʼant tuʼn Jesús, ¿tzeʼn jaku kubʼ qyekʼin qkʼujlabʼil tiʼj Jehová?
Kubʼ tyekʼin Jesús qa kʼujlaʼntoq Ttat tuʼn ex kukx naʼn Dios te.
5. Ximen Jesús kyiʼj txqantl
Nya oʼkx ximen Jesús tiʼjx sino ximen kyiʼj txqantl. Axpe ikx tej otoq sikt Jesús, el tpaʼn ambʼil ex ajbʼen tipumal tuʼn tuʼn tonin kyiʼj txqantl. Kyuʼjinktze Marcos 6:30 a 44 ex che yoline kyiʼj xjel lu:
-
Ik tzeʼn ma jaw quʼjin, ¿tzeʼn kubʼ tyekʼin Jesús qa ximen kyiʼj txqantl? (Kyqʼonke kywitze kyiʼj versículo 31, 34, 41 ex 42).
-
¿Tiquʼn onin Jesús kyiʼj xjal lu? (Kyqʼonke kywitze tiʼj versículo 34).
-
Tuʼnju kubʼ tyekʼin Jesús qe tbʼanel tmod Ttat, ¿tiʼ in tzaj tyekʼin jlu teya tiʼj Jehová?
-
¿Tzeʼn jaku kubʼ qyekʼin qa in qo ximen kyiʼj txqantl ik tzeʼn bʼant tuʼn Jesús?
6. Bʼinchan Jesús xtalbʼil kyiʼj txqantl
Maske nyatoq nim tiʼchaq at te Jesús, bʼinchan xtalbʼil ex in tzaj tqʼamaʼn qe tuʼn tbʼant jlu quʼn. Kyuʼjinktze Hechos 20:35 ex che yoline tiʼj xjel lu:
-
Ik tzeʼn tqʼama Jesús, ¿tiʼ jaku tzaj qʼonte tzalajbʼil qe?
Kyqʼonke kywitze tiʼj VIDEO ex che yoline tiʼj xjel lu:
-
¿Tzeʼn jaku txi qqʼoʼn chʼin kye txqantl maske nya nim tiʼchaq at qe?
¿Ojtzqiʼn jlu tuʼna?
In tzaj t-xnaqʼtzaʼn Biblia qa il tiʼj tuʼn qnaʼn Dios te Jehová toj tbʼi Jesús (kyuʼjinktze Juan 16:23, 24). Qa ma bʼant jlu quʼn, in kubʼ qyekʼin qa in nok qqʼoʼn toklen chojbʼil bʼant tuʼn Jesús tuʼnju in nonin qiʼj tuʼn qok te tamiw Jehová.
AJU IN TZAJ KYQʼAMAʼN JUNJUN XJAL: «Mintiʼ in tzaj qʼaqʼin tkʼuʼj Dios qiʼj aj qikʼ toj nya bʼaʼn».
-
Tuʼnju in kubʼ tyekʼin Jesús qe tbʼanel tmod Jehová, ¿alkye tten in tzaj tyekʼin jlu qa mintiʼ in kubʼ tqʼoʼn Jehová kykastiw xjal?
TOJ CHʼIN YOL
Kʼujlaʼn Jehová tuʼn Jesús ex kʼujlaʼn qe xjal tuʼn. In kubʼ tyekʼin Jesús qe tbʼanel tmod Ttat, tuʼntzunju, qa mas ma tzʼok tojtzqiʼna, mas kʼokel tojtzqiʼna Jehová.
Aju ma qo yolin tiʼj
-
Aj qximen tiʼj techel kubʼ tqʼoʼn Jesús, ¿tzeʼn jaku kubʼ qyekʼin qa kʼujlaʼn Jehová quʼn?
-
Aj qximen tiʼj techel kubʼ tqʼoʼn Jesús, ¿tzeʼn jaku kubʼ qyekʼin qa kʼujlaʼn qe xjal quʼn?
-
¿Alkyeqe tmod Jesús mas tbʼanel in nela toj twitza?
OJTZQINKA CHʼINTL
Qo xnaqʼtzan kyiʼj junjun tmod Jesús jaku tzʼel qkanoʼn.
«Qkanoʼmil techel kyaj tqʼoʼn Jesús» (Jesús: el camino, la verdad y la vida, t-xaq 317)
Tzʼel tnikʼa tiʼj tiquʼn nim toklen tuʼn qnaʼn Dios toj tbʼi Jesús.
«¿Tiquʼn il tiʼj tuʼn qnaʼn Dios toj tbʼi Jesús?» (Aju Xqʼuqil, 1 te febrero te 2008)
¿In tzajpe tqʼamaʼn Biblia tzeʼn keʼyin Jesús?
¿Tiʼ xnaqʼtzbʼil jaku tzʼel qiʼn tiʼj tmod Jesús kubʼ tyekʼin kyukʼil xuʼj?
«In nok tqʼoʼn Dios kyoklen xuʼj» (Aju Xqʼuqil, 1 te septiembre te 2012)
Bʼalo ax ikx tgana jlu
AʼYEJU XJEL MAS IN CHE TZAJ QANIN
¿Tzeʼn in xi kyqʼoʼn testigos de Jehová xnaqʼtzbʼil tiʼj Tyol Dios?
Aj t-xnaqʼtzana tiʼj Tyol Dios kyukʼil testigos de Jehová, jaku tzʼajbʼen texa ttraducción tiʼj Tyol Dios ex jaku che tzaj ttxkoʼna qe toj tjaya ex qe tamiwa tuʼn kyten tukʼila.
